ഇന്ത്യയില് നത്തിങ് (Nothing) കമ്പനി തങ്ങളുടെ പുതിയ ഫോണായ 4b (Nothing Phone 4b) അവതരിപ്പിക്കുന്ന തീയതി ഔദ്യോഗികമായി പ്രഖ്യാപിച്ചു. കമ്പനിയുടെ നിലവിലുള്ള 'a' സീരീസ് ഫോണുകളേക്കാള് വില കുറഞ്ഞതായിരിക്കും പുതിയ 'b' സീരീസ് മോഡലുകള്. അടുത്തിടെയാണ് കമ്പനി പുതിയ 'B' സീരീസിനെക്കുറിച്ചുള്ള സൂചനകള് നല്കിത്തുടങ്ങിയത്. തിങ്കളാഴ്ച Carl Pei-യുടെ നേതൃത്വത്തിലുള്ള നത്തിങ് കമ്പനി ഈ സീരീസിലെ ആദ്യ ഫോണ് 'Nothing Phone 4b' ആയിരിക്കുമെന്ന് സ്ഥിരീകരിച്ചു. ഇതിന് പിന്നാലെ നത്തിങ് ഇന്ത്യയുടെ കോ-ഫൗണ്ടറും പ്രസിഡന്റുമായ അകിസ് ഇവാഞ്ചലിഡിസ് (Akis Evangelidis) ഈ ഫോണിന്റെ പ്രത്യേകതകളെക്കുറിച്ചും വില്പനയെക്കുറിച്ചുമുള്ള കൂടുതല് വിവരങ്ങള് പങ്കുവെച്ചു. കുറഞ്ഞ വിലയിലാണെങ്കിലും നത്തിങ് ഫോണുകളുടെ തനതായ ഡിസൈന് ശൈലി ഇതിലും നിലനിര്ത്തുമെന്ന് അദ്ദേഹം ഉറപ്പുനല്കുന്നു.
ഫോണിന്റെ പിന്ഭാഗത്തെ ഡിസൈന് വ്യക്തമാക്കുന്ന ചിത്രങ്ങള് പുറത്തുവന്നതിന് തൊട്ടുപിന്നാലെയാണ് ഇതിന്റെ കൃത്യമായ ലോഞ്ച് തീയതിയും പുറത്തുവന്നത്. ജൂലൈ ആദ്യവാരം ഫോണ് പുറത്തിറങ്ങുമെന്നായിരുന്നു ആദ്യ റിപ്പോര്ട്ടുകള്. വരാനിരിക്കുന്ന പുതിയ എന്ട്രി ലെവല് (കുറഞ്ഞ വിലയിലുള്ള) സ്മാര്ട്ട്ഫോണായ നത്തിങ് ഫോണ് 4b, ജൂലൈ 7-ന് ഉച്ചയ്ക്ക് 3:30-ന് (IST) ഇന്ത്യയില് അവതരിപ്പിക്കുമെന്ന് ചൊവ്വാഴ്ച കമ്പനി ഔദ്യോഗികമായി സ്ഥിരീകരിച്ചു. ഗുളികയുടെ ആകൃതിയിലുള്ള (pill-shaped) ക്യാമറ മോഡ്യൂളും എല്ഇഡി ഫ്ലാഷും അടങ്ങുന്നതായിരിക്കും ഇതിന്റെ പിന്ഭാഗം. കൂടാതെ നത്തിങ് ഫോണ് 4a-യിലേതുപോലെ തിരശ്ചീനമായ (horizontal) 'ഗ്ലിഫ് ബാര്' (Glyph Bar) ലൈറ്റിംഗ് ഇന്റര്ഫേസും ഇതിലുണ്ടാകുമെന്നാണ് സൂചന.
നിലവിലുള്ള 'A' സീരീസ് ഫോണുകളേക്കാള് കുറഞ്ഞ ബഡ്ജറ്റിലായിരിക്കും 'B' സീരീസ് വിപണിയിലെത്തുകയെന്ന് നത്തിങ് ഇന്ത്യയുടെ പ്രസിഡന്റ് അകിസ് ഇവാഞ്ചലിഡിസ് എക്സ് (X) പ്ലാറ്റ്ഫോമിലൂടെ വ്യക്തമാക്കി. 'കൂടുതല് ഉപഭോക്താക്കളിലേക്ക് എത്തുന്നതിനായി 'A' സീരീസിന്റെ വിജയത്തെ അടിസ്ഥാനമാക്കിയാണ് 'B' സീരീസ് ഒരുക്കിയിരിക്കുന്നത്, ഒപ്പം കൃത്യമായ ഒരു ഉല്പ്പന്ന ശ്രേണി നിലനിര്ത്താനും ഇത് സഹായിക്കും,' അദ്ദേഹം പറഞ്ഞു. പേരിലെ അക്കങ്ങള് തലമുറയെയും (generation), അവസാനത്തെ അക്ഷരങ്ങള് ഏത് വിഭാഗത്തില്പ്പെട്ട ഫോണ് (product segment) ആണെന്നതിനെയും സൂചിപ്പിക്കുന്നു. ഇതുകാരണം പേരുകളില് ഒരേപോലെയുള്ള വാക്കുകള് വീണ്ടും വീണ്ടും ഉപയോഗിക്കുന്നത് ഒഴിവാക്കാനും, കൂടുതല് ഫോണുകള് പുറത്തിറങ്ങുമ്പോള് ആശയക്കുഴപ്പമില്ലാതിരിക്കാനും സഹായിക്കുമെന്ന് അദ്ദേഹം കൂട്ടിച്ചേര്ത്തു.
ഈ ഫോണിനെക്കുറിച്ചുള്ള കൂടുതല് വിവരങ്ങള് ലഭ്യമായിട്ടില്ലെങ്കിലും ഫ്ലിപ്കാര്ട്ട് (Flipkart) വഴിയായിരിക്കും ഇന്ത്യയിലെ വില്പനയെന്ന് ഉറപ്പായിട്ടുണ്ട്. പുറത്തുവന്ന ചിത്രങ്ങള് പ്രകാരം സിംഗിള് റിയര് ക്യാമറ സിസ്റ്റവും, സ്ക്രൂകളും മറ്റ് ഭാഗങ്ങളും പുറത്തുകാണുന്ന തരത്തിലുള്ള സുതാര്യമായ (transparent) പിന്ഭാഗവും ഇതിനുണ്ടാകും. ഉയര്ന്ന മോഡലായ ഫോണ് 4a സീരീസിന് സമാനമായി പരന്ന പിന്ഭാഗവും വളഞ്ഞ കോണുകളുമാണ് (rounded corners) ഇതിനുള്ളത്.
