തിരുവനന്തപുരം : ദേവീദേവന്മാരുടേയും ബലിദാനികളുടേയും പേരില് സത്യപ്രതിജ്ഞ ചെയ്ത കൗണ്സിലര്മാരുടെ സത്യപ്രതിജ്ഞ ഹൈക്കോടതി അസാധുവാക്കിയതിന് പിന്നാലെ തിരുവനന്തപുരം കോര്പ്പറേഷനിലെ 19 ബിജെപി കൗണ്സിലര്മാര് വീണ്ടും സത്യപ്രതിജ്ഞ ചെയ്തു. സത്യപ്രതിജ്ഞ റദ്ദാക്കപ്പെട്ട 20 അംഗങ്ങളില് 19 അംഗങ്ങളാണ് വീണ്ടും സത്യപ്രതിജ്ഞ ചെയ്തത്. 4.30ന് കോര്പ്പറേഷനില് വെച്ചാണ് ചടങ്ങ് സംഘടിപ്പിച്ചത്. മേയര് വി വി രാജേഷ് സത്യവാചകം ചൊല്ലിക്കൊടുത്തു.
സത്യപ്രതിജ്ഞ ചടങ്ങിനെതിനെ എല്ഡിഎഫ് പരാതി നല്കി. നിയമവിരുദ്ധമായാണ് ചടങ്ങ് സംഘടിപ്പിച്ചത് എന്നാണ് പരാതി. തദ്ദേശ വകുപ്പ് പ്രിന്സിപ്പല് സെക്രട്ടറിക്കാണ് എല്ഡിഎഫ് പാര്ലമെന്ററി പാര്ട്ടി നേതാവ് എസ് പി ദീപക് പരാതി നല്കിയത്. മറ്റ് ജനപ്രതിനിധികള് അറിയാതെയാണ് സത്യപ്രതിജ്ഞ നടന്നത്. മറ്റുള്ളവരില് നിന്ന് മറച്ച് വെച്ച് നടത്തുന്ന ചട്ട വിരുദ്ധമായ ചടങ്ങ് തടയണമെന്നും പരാതിയില് ആവശ്യപ്പെട്ടിരുന്നു.
മതേതര മൂല്യങ്ങള് ഉയര്ത്തിക്കാട്ടി ഗാനരചയിതാവും കവിയുമായ എം ഡി രാജേന്ദ്രന്റെ കുറി വരച്ചാലും കുരിശു വരച്ചാലും കുമ്പിട്ടുനിസ്കരിച്ചാലും എന്ന വരികള് പരാമര്ശിച്ചാണ് ജസ്റ്റിസ് PV കുഞ്ഞികൃഷ്ണന്റെ ഉത്തരവ്.ഭരണഘടനാപ്രകാരം ദൈവനാമത്തിലോ, സഗൗരവം ദൃഢപ്രതീക്ജ്ഞയൊയാണ് എടുക്കേണ്ടത്. ദൈവം എന്നതിന് നിര്വചനം പഞ്ചായത്തിരാജ് ആക്ടിലൊ മുന്സിപ്പല് ആക്ടിലൊ പറഞ്ഞിട്ടില്ല.എല്ലാ ദൈവങ്ങളും ഒന്നാണ് എന്നാണ് ഗുരുദേവ സന്ദേശം. ദൈവത്തെ കേവലം ഒരു പേര് കൊണ്ട് നിവചിക്കേണ്ട കാര്യമില്ലെന്നും ഹൈക്കോടതി.
അതേസമയം ബിജെപി കൗണ്സിലര്മാര് 'ഗുരുദേവ നാമത്തില്, ഉദിയന്നൂര് ദേവിയുടെ നാമത്തില്, കാവിലമ്മയുടെ നാമത്തില്, ഭഗവത് നാമത്തില്, ശ്രീപ്തമനാഭ സ്വാമിയുടെ നാമത്തില്, ഭാരതാംബയുടെ നാമത്തില്, എന്റെ പ്രസ്ഥാനത്തിലെ ബലിദാനികളുടെ പേരില്, ഭാരത മാതാവിന്റെ നാമത്തില്, തിരുവല്ലം പരശുരാമന്റെ നാമത്തില്, ആറ്റുകാല് അമ്മയുടെ നാമത്തില്, ശ്രീ ഇരുംകുളങ്ങര ദുര്ഗ ഭഗവതിയുടെ നാമത്തില്, പത്മനാഭന്റേയും ശ്രീ മഹാവിഷ്ണുവിന്റെയും നാമത്തില്, ശ്രീകണ്ഠേശ്വരന് അമ്മയപ്പന് നാമത്തില്, അയ്യപ്പ നാമത്തില്, കാര്യവട്ടം ശ്രീ ധര്മ ശാസ്താവിന്റ നാമത്തില്' എന്നിങ്ങനെയാണ് സത്യപ്രതിജ്ഞ ചെയ്തതെന്നായിരുന്നു ഹര്ജിയിലെ ആരോപണം.
