കൊച്ചി: എറണാകുളം കുണ്ടന്നൂരിൽ നവജാത ശിശുവിനെ ഉപേക്ഷിച്ച നിലയിൽ കണ്ടെത്തി. ഒരു ദിവസം മാത്രം പ്രായമുള്ള കുഞ്ഞിനെയാണ് ഉപേക്ഷിച്ചിരിക്കുന്നത്. കുഞ്ഞിനെ അമ്മത്തൊട്ടിലിലേക്ക് മാറ്റിയിട്ടുണ്ട്. കുഞ്ഞിനെ ഉപേക്ഷിച്ചത് ആരെന്ന് പൊലീസ് തിരയുന്നു.
പുലർച്ചെ ഒരു മണിയോടെ കുഞ്ഞിന്റെ കരച്ചിൽ കേട്ട് എത്തിയ സമീപവാസികളാണ് ഉപേക്ഷിക്കപ്പെട്ട നിലയിലുള്ള പിഞ്ചു കുഞ്ഞിനെ കണ്ടത്. ഇവർ മരട് പൊലീസ് സ്റ്റേഷനിൽ വിവരമറിയിച്ചതിനെ തുടർന്ന് പൊലീസ് എത്തി കുഞ്ഞിനെ അമ്മത്തൊട്ടിലിൽ ആക്കുകയായിരുന്നു. സംഭവത്തെ കുറിച്ച് അന്വേഷണം ആരംഭിച്ചു. സമീപത്തെ കാർ ഷോറൂമിൽ മാത്രമേ സിസിടിവി ക്യാമറകളുള്ളൂ. ഇവിടെ നിന്നുള്ള ദൃശ്യങ്ങൾ പരിശോധിക്കുന്നുണ്ട്.
ഫോറം മാളിനോട് ചേര്ന്നുള്ള ഇടറോഡിലെ തട്ടുകടയുടെ പരിസരത്തുനിന്നാണ് പിഞ്ചുകുഞ്ഞിനെ കണ്ടെത്തിയത്. ഇവിടെയുള്ള ഒരു ബെഞ്ചില് കിടത്തിയ നിലയിലായിരുന്നു കുഞ്ഞ്. അമ്മത്തൊട്ടിലിൽ ആക്കിയ കുഞ്ഞിനെ ഡോക്ടർമാർ പരിശോധിച്ചു ആരോഗ്യപ്രശ്നങ്ങൾ ഒന്നുമില്ല എന്ന് ഉറപ്പാക്കിയിട്ടുണ്ട്.
