മൊഹാലിയിലെ ഫോർട്ടിസ് ആശുപത്രിയിൽ നടന്ന സിൽവർ ജൂബിലി ആഘോഷങ്ങൾക്കിടെ ഒരു ഡോക്ടർ ആശുപത്രി കെട്ടിടത്തിനുള്ളിലൂടെ മോട്ടോർസൈക്കിളിൽ എത്തിയത് സമൂഹമാധ്യമങ്ങളിൽ വലിയ ചർച്ചയാകുന്നു. ബോളിവുഡ് ചിത്രമായ 'ത്രീ ഇഡിയറ്റ്സി'ലെ പ്രശസ്തമായ രംഗം ഓർമ്മിപ്പിക്കുന്നതായിരുന്നു ഈ കാഴ്ച. ആശുപത്രിയിലെ റോബോട്ടിക് ഗൈനക്കോളജിക്കൽ സർജൻ, ആഘോഷവേദിയിലേക്ക് ബൈക്കിന്റെ പിന്നിലിരുന്ന് എത്തുന്ന ദൃശ്യങ്ങളാണ് വൈറലായത്. ജീവനക്കാരും അതിഥികളും വലിയ ആരവങ്ങളോടെയാണ് ഡോക്ടറെ സ്വീകരിച്ചത്.
എന്നാൽ ഈ സംഭവത്തിന് സമ്മിശ്ര പ്രതികരണമാണ് സോഷ്യൽ മീഡിയയിൽ ലഭിക്കുന്നത്. ആശുപത്രിയുടെ 25 വർഷത്തെ സേവനം ആഘോഷിക്കുന്നതിന്റെ ഭാഗമായാണ് ഇത്തരമൊരു പ്രവേശനം നടത്തിയതെങ്കിലും, രോഗികൾ ചികിത്സയിൽ കഴിയുന്ന ഒരു ആശുപത്രിയുടെ അന്തരീക്ഷത്തിൽ ഇത്തരത്തിലുള്ള ആഘോഷങ്ങൾ എത്രത്തോളം അനുയോജ്യമാണെന്ന ചോദ്യം ഉയരുന്നുണ്ട്. രോഗികൾക്ക് ബുദ്ധിമുട്ടുണ്ടാക്കുന്ന ഇത്തരം നടപടികൾ ഒഴിവാക്കേണ്ടതായിരുന്നുവെന്ന് വിമർശകർ ചൂണ്ടിക്കാട്ടുന്നു. അതേസമയം, ഇതൊരു നിയന്ത്രിത സാഹചര്യത്തിൽ നടന്ന ആഘോഷത്തിന്റെ ഭാഗമാണെന്നും ഇതിനെ അത്ര ഗൗരവമായി കാണേണ്ടതില്ലെന്നുമാണ് അനുകൂലിക്കുന്നവരുടെ പക്ഷം.
ആശുപത്രിയിൽ നടന്ന ഈ സംഭവം സിനിമാപ്രേമികളിൽ പഴയ ഓർമ്മകൾ ഉണർത്തിയിട്ടുണ്ട്. 'ത്രീ ഇഡിയറ്റ്സ്' എന്ന സിനിമയിലെ നിർണ്ണായകമായ ഒരു രംഗം ചിത്രീകരിച്ചത് ഇതേ ആശുപത്രിയിൽ വെച്ചായിരുന്നു എന്നതാണ് ഇതിലെ കൗതുകകരമായ വസ്തുത. സിനിമയിലെ ആ രംഗവുമായി സാമ്യമുള്ളതുകൊണ്ട് തന്നെ വീഡിയോ സോഷ്യൽ മീഡിയയിൽ അതിവേഗം പ്രചരിച്ചു. ആശുപത്രി അധികൃതർ ഔദ്യോഗിക സോഷ്യൽ മീഡിയ അക്കൗണ്ടുകളിൽ നിന്ന് വീഡിയോ നീക്കം ചെയ്തെങ്കിലും, വിവിധ പ്ലാറ്റ്ഫോമുകളിൽ ഇത് ഇപ്പോഴും ചർച്ചയാകുന്നുണ്ട്.
