500 രൂപ ടിപ്പ് ലഭിച്ചപ്പോൾ വികാരാധീനനായി ബ്ലിങ്കിറ്റ് ഡെലിവറി പാർട്ണർ; വീഡിയോ വൈറൽ

കൊടും വെയിലത്തും മഴയത്തും നഗരവീഥികളിലൂടെ ഓടിനടന്ന് നമുക്ക് ആവശ്യമായ സാധനങ്ങൾ വീട്ടുപടിക്കൽ എത്തിച്ചു നൽകുന്ന ഡെലിവറി പാർട്ണർമാരുടെ ജീവിതം അത്ര എളുപ്പമുള്ളതല്ല. അവരുടെ ദിവസങ്ങൾ പലപ്പോഴും കടുത്ത അധ്വാനത്തിന്റേതാണ്, എന്നാൽ അതിനനുസരിച്ചുള്ള പ്രതിഫലം പലപ്പോഴും അവർക്ക് ലഭിക്കാറുമില്ല. അത്തരത്തിൽ കഠിനാധ്വാനം ചെയ്യുന്ന ഒരു ബ്ലിങ്കിറ്റ് ഡെലിവറി പാർട്ണറുടെ വീഡിയോയാണ് ഇപ്പോൾ സോഷ്യൽ മീഡിയയിൽ വലിയ ചർച്ചയായിരിക്കുന്നത്. വെറും 15 രൂപയുടെ ചെറിയൊരു ഓർഡർ ഡെലിവറി ചെയ്തതിന് ശേഷം അദ്ദേഹത്തിന് ലഭിച്ച 500 രൂപയുടെ ടിപ്പ്, ഒരു സാധാരണ മനുഷ്യന്റെ ജീവിതത്തിൽ എത്ര വലിയ മാറ്റമാണ് ഉണ്ടാക്കുന്നതെന്ന് ആ വീഡിയോ നമ്മളെ ഓർമ്മിപ്പിക്കുന്നു.

താൻ അന്ന് കഷ്ടപ്പെട്ട് ജോലി ചെയ്തിട്ടും ആകെ ലഭിച്ചത് 97 രൂപ മാത്രമാണെന്ന് വീഡിയോയിൽ യുവാവ് പറയുന്നുണ്ട്. ആ സാഹചര്യത്തിലാണ് ഉപഭോക്താവിന്റെ ഭാഗത്തുനിന്നും അപ്രതീക്ഷിതമായി 500 രൂപയുടെ ടിപ്പ് ലഭിക്കുന്നത്. താൻ രണ്ട് ദിവസം മുഴുവൻ ജോലി ചെയ്താൽ മാത്രം ലഭിക്കുന്ന തുകയാണിതെന്ന് പറഞ്ഞ് വികാരാധീനനാകുന്ന അദ്ദേഹത്തെയാണ് വീഡിയോയിൽ കാണാൻ സാധിക്കുന്നത്. ആ സന്തോഷം അടക്കാനാവാതെ ഉപഭോക്താവിന് അദ്ദേഹം ആവർത്തിച്ച് നന്ദി പറയുന്നു. ഈ ദൃശ്യങ്ങൾ ഇതിനോടകം തന്നെ 13 ദശലക്ഷത്തിലധികം പേരാണ് കണ്ടത്.

ഈ വീഡിയോ കണ്ട പലരുടെയും കണ്ണുനനയിച്ചു എന്നതാണ് ഇതിന്റെ പ്രത്യേകത. സഹജീവികളോടുള്ള കാരുണ്യം ഇപ്പോഴും വറ്റിയിട്ടില്ലെന്ന് ഉപഭോക്താവ് തെളിയിച്ചപ്പോൾ, തങ്ങളുടെ ചെറിയ നേട്ടങ്ങളിൽ പോലും നന്ദിയുള്ളവരായിരിക്കുന്ന ഡെലിവറി പാർട്ണർമാരുടെ എളിമയും ആളുകൾ തിരിച്ചറിഞ്ഞു. കഠിനാധ്വാനം ചെയ്യുന്ന ഇത്തരം തൊഴിലാളികളെ കഴിവിനനുസരിച്ച് സഹായിക്കണമെന്നും, നമ്മുടെ ചെറിയൊരു ടിപ്പ് അവരുടെ വലിയൊരു ആശ്വാസമാണെന്നും ഓർമ്മിപ്പിച്ചുകൊണ്ടാണ് സോഷ്യൽ മീഡിയ ഈ വീഡിയോ ഏറ്റെടുത്തിരിക്കുന്നത്.