തിരുവനന്തപുരം: തിരുവിതാംകൂര് ദേവസ്വം ബോര്ഡിലെ ഓഡിറ്റ് റിപ്പോര്ട്ടുകള് പുറത്തുവന്നുകൊണ്ടിരിക്കുമ്പോള് ഓരോ ഗ്രൂപ്പുകളിലും ലക്ഷങ്ങളുടെ വെട്ടിപ്പ് നടക്കുന്നെന്ന വിവരങ്ങള് പുറത്ത്. പുനലൂര് ഗ്രൂപ്പില് ജൂനിയര് സൂപ്രണ്ടിന്റെ ഓഡിറ്റ് റിപ്പോര്ട്ടില് ഒരു സബ് ഗ്രൂപ്പ് ഓഫീസറുടെ മാത്രം വെട്ടിപ്പ് 50 ലക്ഷം രൂപ.
നെയ്യാറ്റിന്കര ഗ്രൂപ്പില് ഒരു സബ് ഗ്രൂപ്പ് ഓഫീസറുടെ ഏഴാം നമ്പറിലും ഒമ്പതാം നമ്പരിലുള്ള ക്രമക്കേട് ഏകദേശം 50 ലക്ഷം കടന്നിട്ടുണ്ട്. വൈക്കം സബ്ഗ്രൂപ്പില് അഡ്മിനിസ്ട്രേറ്റീവ് ഓഫീസറുടെ ക്രമക്കേടും 50 ലക്ഷം കടന്നു. രണ്ടു വര്ഷം മുമ്പ് വൈക്കം ഗ്രൂപ്പില് ഒരു വാച്ചര് ഏതാണ്ട് 50 ലക്ഷത്തിനടുത്ത് ക്രമക്കേട് നടത്തിയെന്ന പരാതിക്കു പിന്നാലെയാണ് ഇപ്പോഴത്തെ വെട്ടിപ്പു പുറത്തുവരുന്നത്.
തുറവൂര് ഗ്രൂപ്പില് തിരുവാഭരണ ക്രമക്കേട് എത്ര ലക്ഷമെന്ന് അറിവായിട്ടില്ല. നെയ്യാറ്റിന്കര ഗ്രൂപ്പില് തിരുവാഭരണം, സ്വര്ണം, വെള്ളി എന്നിവ ഉള്പ്പെടെ നഷ്ടപ്പെട്ടിട്ട് അധികനാളായില്ല. ഈ റിപ്പോര്ട്ടിനുമേല് ഒരു നടപടിയും ഉണ്ടായിട്ടില്ല. കോട്ടയം ഗ്രൂപ്പില് മൂന്ന് ആറാം നമ്പര് രസീത് കാണാതായതിന്റെ പേരില് മജിസ്ട്രേറ്റ് കോടതിയില് ഇന്നും കേസ് നടക്കുകയാണ്. തിരുവനന്തപുരം ഗ്രൂപ്പില് ആറാം നമ്പര് ബുക്ക് കടത്തിയ വിവരം പുറത്തുവന്നിട്ടും നടപടിയില്ല. ക്ഷേത്രവരുമാനത്തിന്റെ നേര്ച്ചിത്രമാകേണ്ട ആറാം നമ്പര് ബുക്കുകള് 21 ഗ്രൂപ്പുകളിലും കൂടി എത്രയെണ്ണം നഷ്ടപ്പെട്ടുവെന്നുപോലും ദേവസ്വം ബോര്ഡില് ഒരു കണക്കുമില്ല.
കൊട്ടാരക്കരയിലെ ഒരു സബ് ഗ്രൂപ്പില് മൂന്ന് ആറാം നമ്പര് ബുക്ക് കാണാതായിട്ട് വാച്ചറുടെ വീട്ടില് തലയിണയ്ക്കു കീഴില്നിന്നാണ് കണ്ടെടുത്തത്. നടപടി പേരിനുമാത്രമായി. അതോടൊപ്പം ആറ് ലക്ഷത്തോളം രൂപയുടെ ക്രമക്കേടും അന്ന് അവിടെ നടന്നു.
കോട്ടയത്ത് ആറാം നമ്പര് മുക്കിയ വിഷയത്തില് സസ്പെന്ഷനായ അതേ വാച്ചര് തന്നെ തൃക്കാരിയൂര് ഗ്രൂപ്പില് മോഷണക്കുറ്റത്തിന് വീണ്ടും സസ്പെന്ഷനിലായി. മൂന്നോ നാലോ സസ്പെന്ഷന് ലഭിച്ചിട്ടും ഇപ്പോഴും ഇയാള് സര്വീസില് തുടരുന്നു. കരുനാഗപ്പള്ളി ഗ്രൂപ്പിലാണ് ജോലി ഇപ്പോള് ജോലിചെയ്യുന്നത്. ഈ വാച്ചര്ക്കെതിരായ സ്റ്റേറ്റ് വിജിലന്സ് അന്വേഷണം എങ്ങുമെത്തിയിട്ടില്ല.
തിരുവല്ലം സബ് ഗ്രൂപ്പില് ഒരു അഡ്മിനിസ്ട്രേറ്റീവ് ഓഫീസറുടെ പേരില് ഓഡിറ്റ് നടത്തിയപ്പോള് 23 ലക്ഷം രൂപയുടെ ക്രമക്കേട് കണ്ടെത്തിയിരുന്നു. വര്ക്കല ഗ്രൂപ്പിലും ആറാം നമ്പര് കാണാതെ പോയിട്ടുണ്ട്. പക്ഷേ കേസും അന്വേഷണവുമില്ല.
2003 മുതല് ഡി.ഒ.ടി, അക്കൗണ്ട് ടെസ്റ്റ് എന്നിവ പാസായി 2026 വരെയുള്ളവര് നില്ക്കുമ്പോഴാണ് അനധികൃത ഓഡിറ്റ് നിയമനം നടക്കുന്നത്.
ചങ്ങനാശേരി ഗ്രൂപ്പിലെ ശാന്തിക്കാരനെ വൈക്കം ഓഡിറ്റിലേക്ക് നിയമിച്ചു. ഇയാള് വൈക്കം ഗ്രൂപ്പില്നിന്നു സാമ്പത്തിക ക്രമക്കേടില് പണിഷ്മെന്റ് ട്രാന്സ്ഫറായി ചങ്ങനാശേരിയില് വന്നതാണ്. ചങ്ങനാശേരിയിലും
ആചാരലംഘനത്തിന്റെ പേരില് നടപടി നിലനില്ക്കുകയാണ്. അതില്നിന്നും രക്ഷപ്പെടുത്താനാണ് ഓഡിറ്ററായി നിയമനം നല്കിയിരിക്കുന്നത്. നിരവധി ക്ഷേത്രജീവനക്കാര് ടെസ്റ്റുകളെല്ലാം പാസായി നില്ക്കുമ്പോഴാണിത്.
ശബരിമലയില് വന്ക്രമക്കേട് നടത്തിയ ഇടതു സംഘടനാ നേതാവിനെ അടക്കം മൂന്നു ജീവനക്കാര്ക്കെതിരേ കര്ശന നടപടിക്ക് ശിപാര്ശ നല്കികൊണ്ടുള്ള ഉത്തരവും ഫയലിലൊതുങ്ങും എന്ന നിലയാണ്. ശബരിമലയില് അഷ്ടാഭിഷേക വഴിപാടിന് വേണ്ടതിലും അഞ്ചിരട്ടി സാധങ്ങള് വാങ്ങിയതായി വ്യാജരേഖകള് ഉണ്ടാക്കിയാണ് വന് വെട്ടിപ്പ് നടത്തിയത്.
ജി. അരുണ്
