ഇന്നലെയായിരുന്നു ബോളിവുഡ് താരം അര്ജുന് കപൂറിന്റെ സഹോദരിയും സോഷ്യല് മീഡിയ ഇന്ഫ്ളുവന്സറുമായ അന്ഷുല കപൂറിന്റെ വിവാഹം. ദീര്ഘകാല സുഹൃത്തായ രോഹന് താക്കറാണ് വരന്. മുംബൈയില് വെച്ചായിരുന്നു വിവാഹം. സഹോദരി തന്റെ ജീവിതത്തിലെ പുതിയൊരു അധ്യായത്തിലേക്ക് കടന്നതിന്റെ സന്തോഷത്തിലും വികാരനിര്ഭരമായ നിമിഷങ്ങളിലുമാണ് അര്ജുന്.
ഇപ്പോഴിതാ അന്ഷുലയുടെ വിവാഹദിനത്തില് നിന്നുള്ള മനോഹരമായ ചിത്രങ്ങള് പങ്കുവെച്ചുകൊണ്ട് അര്ജുന് സോഷ്യല് മീഡിയയില് കുറിച്ച വാക്കുകള് ശ്രദ്ധനേടുകയാണ്. "ഓ എന്റെ അൻഷു, എന്നെ സംബന്ധിച്ചിടത്തോളം നീ എപ്പോഴും എന്റേതായിരിക്കും. എന്നാല് ഇപ്പോള് എനിക്ക് നിന്നെ വിട്ടുകൊടുക്കേണ്ടതുണ്ട്. ഇന്ന് നീ രോഹനോടൊപ്പം നിന്റെ പുതിയൊരു യാത്ര ആരംഭിക്കുകയാണ്. നിന്റെ പുഞ്ചിരി കാണുമ്പോള് എന്റെ ഹൃദയവും മനസ്സും ആത്മാവും ഒത്തിരി സന്തോഷിക്കുന്നു.
നീ വളര്ന്നു വലുതാകുന്നതും ഓരോ ചുവടിലും നമ്മുടെ അമ്മയെ പ്രതിനിധീകരിക്കുന്ന അത്ഭുതകരമായ ഒരു സ്ത്രീയായി മാറുന്നതും ഞാന് കണ്ടിട്ടുണ്ട്. നീ ഒട്ടും വിഷമിക്കേണ്ട, കാരണം അമ്മ എപ്പോഴും നിന്നെ നോക്കുന്നുണ്ട്, അനുഗ്രഹിക്കുന്നുമുണ്ട്. ഞാന് എപ്പോഴും ഇവിടെയുണ്ടാകും, എപ്പോഴും നിനക്ക് തുണയായുണ്ടാകും, നിന്റെ ഈ പുഞ്ചിരി ഒരിക്കലും മായാതിരിക്കാന് അര്ജുന് ഭയ്യ എപ്പോഴും കൂടെയുണ്ടാകും," അര്ജുന് കുറിച്ചു.
വിവാഹച്ചടങ്ങില് അന്തരിച്ച അമ്മ മോണ കപൂറിന്റെ ഓര്മ്മകളും നിറഞ്ഞുനിന്നു. മണ്ഡപത്തില് ദമ്പതികളുടെ അരികിലായി മോണ കപൂറിന്റെ ചിത്രവും സ്ഥാപിച്ചിരുന്നു. അമ്മയുടെ അനുഗ്രഹത്തോടെയാണ് തങ്ങള് പുതിയ ജീവിതത്തിലേക്ക് കടക്കുന്നതെന്ന് ചിത്രങ്ങള് പങ്കുവെച്ചുകൊണ്ട് അന്ഷുല കുറിച്ചു.
പരമ്പരാഗത ശൈലിയിലുള്ള സ്വര്ണ്ണക്കരയുള്ള പീച്ച് നിറത്തിലുള്ള ലെഹംഗയിലാണ് അന്ഷുല തിളങ്ങിയത്. മെറൂണ് നിറത്തിലുള്ള എംബ്രോയ്ഡറി കുര്ത്തയണിഞ്ഞ് അര്ജുന് കപൂറും ചടങ്ങില് ശ്രദ്ധാകേന്ദ്രമായി. കഴിഞ്ഞ വര്ഷം ജൂലൈയില് വിവാഹാഭ്യര്ത്ഥന നടത്തിയ രോഹനും അന്ഷുലയും ഒക്ടോബറിലാണ് ഔദ്യോഗികമായി വിവാഹനിശ്ചയം നടത്തിയത്. താരങ്ങളും ആരാധകരുമടക്കം നിരവധി പേരാണ് നവദമ്പതികള്ക്ക് ആശംസകളുമായി രംഗത്തെത്തുന്നത്.
