ഇന്ത്യയിലെ മാലിന്യസംസ്കരണത്തെക്കുറിച്ചുള്ള തെറ്റായ ധാരണകളെ ചോദ്യം ചെയ്ത് ബ്രിട്ടീഷ് സഞ്ചാരിയായ റോബർട്ട് വാൻ ട്രോമ്പ് പങ്കുവെച്ച വീഡിയോ സമൂഹമാധ്യമങ്ങളിൽ വൈറലാകുന്നു. മേഘാലയയിലെ ഏഷ്യയിലെ ഏറ്റവും വൃത്തിയുള്ള ഗ്രാമമായ മാവ്ലിനോങ് സന്ദർശിച്ച ശേഷമാണ് അദ്ദേഹം ഈ കുറിപ്പും വീഡിയോയും പങ്കുവെച്ചത്. ഇന്ത്യയിലെ എല്ലാ ഭാഗങ്ങളും മാലിന്യ പ്രശ്നം നേരിടുന്നുണ്ടെന്ന പൊതുധാരണ വലിയൊരു തെറ്റാണെന്ന് അദ്ദേഹം വിശേഷിപ്പിച്ചു.
വെറും 600 മാത്രം ജനസംഖ്യയുള്ള മാവ്ലിനോങ് ഗ്രാമം മാതൃകാപരമായ ശുചിത്വമാണ് സൂക്ഷിക്കുന്നത്. ഓരോ 100 മീറ്റർ കൂടുമ്പോഴും ഗ്രാമവാസികൾ തന്നെ നിർമ്മിച്ച ചവറ്റുകുട്ടകളും തുപ്പുന്നതിനായി പ്രത്യേക സ്ഥലങ്ങളും ഇവിടെ ഒരുക്കിയിട്ടുണ്ട്. ദിവസത്തിൽ രണ്ടുതവണ ഗ്രാമവാസികൾ തന്നെ തെരുവുകൾ വൃത്തിയാക്കുന്നു. കൂടാതെ പ്ലാസ്റ്റിക് ഉപയോഗത്തിനും പുകവലിക്കും ഇവിടെ കർശന നിരോധനവുമുണ്ട്.
' ദൈവത്തിന്റെ സ്വന്തം പൂന്തോട്ടം ' എന്ന് വിളിപ്പേരുള്ള ഈ ഗ്രാമത്തിൽ സന്ദർശകർക്കായി ഒരു പ്രത്യേക നിയമവുമുണ്ട്. ഗ്രാമത്തിന്റെ തനിമയും ശുചിത്വവും സംരക്ഷിക്കുന്നതിനായി എല്ലാ ഞായറാഴ്ചയും ഗ്രാമം സന്ദർശകർക്കായി അടച്ചിടാറുണ്ട്. ഞായറാഴ്ചകളിൽ പ്രവേശന കവാടത്തിൽ വലിയ ഗേറ്റുകൾ അടയ്ക്കും. ഈ ദിവസം ഗ്രാമവാസികൾ തങ്ങളുടെ യഥാർത്ഥ ഗ്രാമീണ ജീവിതവും പ്രാർത്ഥനകളും കുടുംബത്തോടൊപ്പമുള്ള സമയവും ആസ്വദിക്കുന്നു.
പച്ചപ്പുനിറഞ്ഞ പ്രകൃതിഭംഗിയും വെള്ളച്ചാട്ടങ്ങളും കൊണ്ട് മനോഹരമായ ഈ ഗ്രാമം ഇന്ത്യയെക്കുറിച്ചുള്ള ലോകത്തിന്റെ കാഴ്ചപ്പാടുകളെയാണ് മാറ്റിമറിക്കുന്നത്. ഗ്രാമവാസികളുടെ ഒത്തൊരുമയും കഠിനാധ്വാനവുമാണ് ഇവിടുത്തെ ശുചിത്വത്തിന് പിന്നിലുള്ളത്. സമൂഹമാധ്യമങ്ങളിൽ വലിയ സ്വീകാര്യതയാണ് വാൻ ട്രോമ്പിന്റെ വീഡിയോയ്ക്ക് ലഭിക്കുന്നത്. വടക്കുകിഴക്കൻ ഇന്ത്യയുടെ മാതൃകാപരമായ ജീവിതശൈലിയെ നിരവധിപേർ പ്രശംസിക്കുകയും ചെയ്തു.
