കോഴിക്കോട്: മുഖ്യമന്ത്രി വി.ഡി. സതീശനെതിരെ സിപിഎം നേതാവും ബേപ്പൂർ എംഎൽഎയുമായ മുഹമ്മദ് റിയാസ് വിമർശനവുമായി രംഗത്തെത്തി. ദുരന്തസമയത്ത് മുഖ്യമന്ത്രി സ്വീകരിക്കേണ്ട സമീപനമല്ല ഇപ്പോഴുള്ളതെന്നും എല്ലാവരെയും ഒന്നിപ്പിക്കേണ്ട ഘട്ടത്തിൽ ഭിന്നിപ്പുണ്ടാക്കുകയാണെന്നും അദ്ദേഹം ആരോപിച്ചു.
നിയമസഭയിൽ വാചകമടിക്കുന്നതുപോലെയല്ല ഭരണചക്രം മുന്നോട്ടുകൊണ്ടുപോകേണ്ടതെന്നും കള്ളാടി ദുരന്തവുമായി ബന്ധപ്പെട്ട ചില കാര്യങ്ങൾ പിന്നീട് പറയാനുണ്ടെന്നും റിയാസ് പറഞ്ഞു. വിഷയത്തിൽ മന്ത്രിമാർ വ്യത്യസ്ത നിലപാടുകളാണ് സ്വീകരിക്കുന്നതെന്നും സർക്കാരിൽ കൂട്ടായ നേതൃത്വത്തിന്റെ അഭാവം പ്രകടമാണെന്നും അദ്ദേഹം മാധ്യമങ്ങളോട് പറഞ്ഞു.
അതേസമയം, മുഖ്യമന്ത്രിക്കെതിരെ സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷും രംഗത്തെത്തി. വിഴിഞ്ഞം ഓഹരി കൈമാറ്റ വിഷയത്തിൽ ജില്ലാ സെക്രട്ടറിക്ക് മാത്രമല്ല, ഓരോ മലയാളിക്കും താൽപര്യമുണ്ടെന്നും കേരളത്തിന്റെ പൊതുമുതൽ സംരക്ഷിക്കാനുള്ള ജാഗ്രതയാണ് ഉയരുന്ന ചോദ്യങ്ങളെന്നും അദ്ദേഹം പറഞ്ഞു.
ചോദ്യങ്ങൾ ഉയരുമ്പോൾ പൊതുപ്രവർത്തകരെ ഭീഷണിപ്പെടുത്താൻ ശ്രമിക്കരുതെന്നും അസഹിഷ്ണുത പ്രകടിപ്പിക്കുന്നത് മുഖ്യമന്ത്രി പ്രതിരോധത്തിലാണെന്ന സൂചനയാണെന്നും രാഗേഷ് വിമർശിച്ചു. വിഷയത്തിൽ ഇനിയും ചോദ്യങ്ങൾ ഉയരുമെന്നും അദ്ദേഹം കൂട്ടിച്ചേർത്തു.
