തന്റെ വീട്ടിൽ മൂന്ന് വർഷമായി ആത്മാർത്ഥമായി ജോലി ചെയ്യുന്ന ജോലിക്കാരിക്ക് സ്വന്തം കൈകൊണ്ട് രുചികരമായ പ്രഭാതഭക്ഷണം തയാറാക്കി നൽകി സ്നേഹം പ്രകടിപ്പിച്ച യുവതിയുടെ വീഡിയോ സമൂഹമാധ്യമങ്ങളിൽ വൈറലാകുന്നു. ചൂടുള്ള ചായയും പച്ചക്കറികൾ ചേർത്ത പൊഹയും ക്രിസ്പിയായ കന്ദ ഭജിയുമാണ് യുവതി സ്നേഹത്തോടെ തയാറാക്കി നൽകിയത്.
തനിക്ക് മുന്നിലേക്ക് അപ്രതീക്ഷിതമായി എത്തിയ ഈ പ്രത്യേക ഭക്ഷണവും ആദരവും കണ്ട ആ വീട്ടുജോലിക്കാരിയുടെ സന്തോഷം നിറഞ്ഞ മുഖഭാവം ഏവരുടെയും കണ്ണ് നനയിക്കുന്നതായിരുന്നു. വെറുമൊരു തൊഴിൽ ബന്ധത്തിനപ്പുറം പരസ്പരമുള്ള സ്നേഹവും വലിയ ബഹുമാനവും വെളിപ്പെടുത്തുന്നതായിരുന്നു ആ നിമിഷം.
യുവതിയുടെ ഈ കരുതലിനെ പ്രശംസിച്ച് നിരവധി പേരാണ് കമന്റ് ബോക്സിൽ രംഗത്തെത്തിയത്. ചെറിയൊരു സ്നേഹപ്രകടനം പോലും മറ്റുള്ളവരുടെ മനസ്സിൽ എത്രത്തോളം വലിയ സന്തോഷം നിറയ്ക്കുമെന്നതിന്റെ മനോഹരമായ ഉദാഹരണമായാണ് ആളുകൾ ഈ വീഡിയോയെ വിശേഷിപ്പിക്കുന്നത്.
സമൂഹമാധ്യമങ്ങളിൽ എന്നും കാണുന്ന നെഗറ്റീവ് വാർത്തകൾക്കിടയിൽ ഇത്തരത്തിലുള്ള നല്ല കാഴ്ചകൾ കാണുന്നത് മനസ്സിന് വലിയ ആശ്വാസം നൽകുന്നുവെന്നാണ് വീഡിയോ കണ്ടവരും പറയുന്നത്. പരസ്പരം സഹായിക്കുന്നതും സ്നേഹം പങ്കിടുന്നതുമായ ഇത്തരം ലളിതമായ നിമിഷങ്ങൾ തന്നെയാണ് ഇന്റർനെറ്റിൽ ഇപ്പോൾ ഏറെ ചർച്ചയാകുന്നത്.
