റോഡിലെ അശ്രദ്ധ പലപ്പോഴും വലിയ ദുരന്തങ്ങൾക്ക് വഴിവെക്കാറുണ്ട്. അത്തരത്തിലുള്ള ഒരു ഞെട്ടിക്കുന്ന യാത്രാനുഭവമാണ് ഇപ്പോൾ സമൂഹമാധ്യമങ്ങളിൽ ചർച്ചയാകുന്നത്. ഹൈദരാബാദ് ഔട്ടർ റിങ് റോഡിൽ റോഡ് നിയമങ്ങൾ ലംഘിച്ച് എതിർദിശയിൽ പാഞ്ഞെത്തിയ ലോറിക്കുമുന്നിൽപ്പെട്ട് പ്രൊഫസർ അത്ഭുതകരമായി രക്ഷപ്പെട്ടതിന്റെ ദൃശ്യങ്ങളാണിത്. ശംഷാബാദ് എൻട്രി വഴി റിങ് റോഡിലേക്ക് പ്രവേശിച്ച പ്രൊഫസർ സരിത് ചന്ദയുടെ കാറാണ് വൻ ദുരന്തത്തിന്റെ വക്കിൽ നിന്നും തലനാരിഴയ്ക്ക് രക്ഷപ്പെട്ടത്. ഈ ഞെട്ടിക്കുന്ന സംഭവത്തിന്റെ ഡാഷ്‌ക്യാമറ ദൃശ്യങ്ങൾ വലിയ ചർച്ചകൾക്കാണ് വഴിതുറന്നിരിക്കുന്നത്.
മുന്നിൽ സഞ്ചരിച്ചിരുന്ന മറ്റൊരു വാഹനത്തെ മറികടക്കാൻ ശ്രമിക്കുന്നതിനിടയിലാണ് ഒട്ടും പ്രതീക്ഷിക്കാത്ത രീതിയിൽ ആർ.എം.സി ലോറി എതിർദിശയിൽ നിന്നും കുതിച്ചെത്തിയത്. മുൻപിൽ അപ്രതീക്ഷിതമായി ഭീമാകാരമായ ലോറി കണ്ട ഉടൻ തന്നെ സരിത് ചന്ദ സമയോചിതമായി കാർ വെട്ടിത്തിരിക്കുകയായിരുന്നു. ഏതാനും സെക്കൻഡുകൾ മാത്രം നീണ്ടുനിന്ന ഈ സംഭവത്തിൽ, കാറും ലോറിയും തമ്മിൽ കൂട്ടിയിടിക്കേണ്ടിയിരുന്നതെങ്കിലും പെട്ടെന്നുള്ള വെട്ടിക്കലിലൂടെ വലിയൊരു ദുരന്തം ഒഴിവാകുകയായിരുന്നു.
തനിക്ക് ലഭിച്ചത് പുതിയൊരു ജീവിതമാണെന്നും പൂർണ്ണമായും ഭാഗ്യം കൊണ്ടാണ് രക്ഷപെട്ടതെന്നും സരിത് ചന്ദ പിന്നീട് എക്സ് പ്ലാറ്റ്‌ഫോമിലൂടെ വ്യക്തമാക്കി. ഹൈവേകളിൽ തെറ്റായ ദിശയിൽ വാഹനമോടിക്കുന്നവർക്കെതിരെ കർശന നടപടി സ്വീകരിക്കണമെന്നും അദ്ദേഹം അധികാരികളോട് ആവശ്യപ്പെട്ടു. വീഡിയോയിലെ ദൃശ്യങ്ങളുടെ വേഗത കണ്ട് പലരും ആശങ്കപ്പെട്ടെങ്കിലും, താൻ വളരെ സാവധാനത്തിലാണ് വാഹനം ഓടിച്ചിരുന്നതെന്ന് പിന്നീട് അദ്ദേഹം വ്യക്തമാക്കുകയുണ്ടായി.
സംഭവം സമൂഹമാധ്യമങ്ങളിൽ വൈറലായതോടെ ഹൈദരാബാദ് ട്രാഫിക് പോലീസ് വിഷയത്തിൽ അടിയന്തരമായി ഇടപെട്ടു. പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണത്തിനൊടുവിൽ നിയമം ലംഘിച്ച് ലോറിയോടിച്ച ഡ്രൈവറെ കണ്ടെത്തുകയും ചെയ്തിട്ടുണ്ട്. ഹൈവേകളിൽ ദിശതെറ്റി വാഹനമോടിക്കുന്ന പ്രവണതയ്ക്കെതിരെ ശക്തമായ നിയമനടപടികൾ വേണമെന്ന ആവശ്യം വീണ്ടും ശക്തമാക്കുകയാണ് കൗതുകകരവും എന്നാൽ ഭീതിജനകവുമായ ഈ വാർത്ത.
Comments