പേരാമ്പ്രയിലെ അദ്ധ്യാപികമാരുടെ മയക്കുമരുന്ന് ബന്ധം ; കാവ്യയുടെ വിദേശയാത്രയും അന്വേഷണത്തിന്റെ പരിധിയില്‍

വടകര: പേരാമ്പ്രയിലെ അദ്ധ്യാപികമാരുടെ മയക്കുമരുന്ന് കച്ചവടവുമായി ബന്ധപ്പെട്ട കേസില്‍ കാവ്യയുടെ വിദേശയാത്രയും അന്വേഷണത്തിന്റെ പരിധിയില്‍. സംഭവത്തില്‍ വിദ്യാഭ്യാസവകുപ്പ് ഇടപെട്ടിരിക്കുകയാണ്. കേസ് നിസ്സാരവല്‍ക്കരിക്കില്ലെന്നും അന്വേഷണം നടത്തുമെന്നും സമഗ്രശിക്ഷാ അഭിയാനും വ്യക്തമാക്കിയിരിക്കുകയാണ്. അദ്ധ്യാപികമാരുടെ സ്വാധീനം കുട്ടികളിലേക്ക് എത്തിയിരുന്നോ എന്നും അന്വേഷിക്കും.

കാവ്യ ദുബായിലേക്ക് നടത്തിയ വിദേശയാത്രയാണ് അന്വേഷണത്തിന്റെ പരിധിയില്‍ എത്തിയിരിക്കുന്നത്. ബിആര്‍സിയില്‍ നിന്നുള്ള അനുമതി വാങ്ങാതെയാണ് ഇവര്‍ വിദേശയാത്ര നടത്തിയത്. കഴിഞ്ഞ വര്‍ഷം നടത്തിയ യാത്ര ലീവെടുക്കാതെയും കാര്യം വ്യക്തമാക്കാതെയും ബിആര്‍സിയുെട അനുമതിയില്ലാതെയുമായിരുന്നു നടത്തിയത്. കാര്യം വ്യക്തമാക്കാതെ ലീവെടുത്തതും അന്വേഷിക്കണമെന്നാണ് പറയുന്നത്.

കേസില്‍ കുടുങ്ങിയിരിക്കുന്ന നീഷ്മയും കീര്‍ത്തനയും കാവ്യയും വലിയ കൂട്ടുകാരായിരുന്നു. ബിആര്‍സിയിലെ മറ്റു ജീവനക്കാരുമായി ഉള്ളതിനേക്കാള്‍ വലിയ സൗഹൃദം ഇവര്‍ക്കുണ്ടായിരുന്നു. അതിന്റെ രഹസ്യം ഇപ്പോഴാണ് പുറത്തുവന്നതെന്ന് സഹപ്രവര്‍ത്തകര്‍ പറയുന്നു. ഇവര്‍ വലിയ ആര്‍ഭാടത്തോടെയാണ് ജീവിച്ചിരുന്നെന്നും ഇവരുെട കയ്യില്‍ വന്‍ തുകകള്‍ വന്നിരുന്നതായും പറഞ്ഞിരുന്നു.

സംഭവം പുറത്തുവന്നതോടെ ബിആര്‍സി അദ്ധ്യാപകരെ മുഴുവന്‍ നിരീക്ഷിക്കും. റാക്കറ്റില്‍ കൂടുതല്‍ അദ്ധ്യാപകരുണ്ടോയെന്നും ഇവര്‍ മയക്കുമരുന്നുമായി കുട്ടികളിലേക്ക് എത്തിയിട്ടുണ്ടോ എന്നും അന്വേഷണം നടത്തും. ആഭ്യന്തരമായ അന്വേഷണം സര്‍വശിക്ഷാ കേരളയും നടത്തും.