ലണ്ടന്‍ : ഇന്ത്യയുടേയും പാകിസ്താന്റെയും ക്രിക്കറ്റ് നായകന്മാര്‍ തമ്മില്‍ ഷേക്ക്ഹാന്‍ഡ് പോലും കൊടുക്കാത്ത സാഹചര്യത്തില്‍ പതിവ് തെറ്റിച്ച് ഇന്ത്യന്‍ വനിതാതാരം ജമൈമ റോഡ്രിഗ്രസ്. ഇംഗ്‌ളണ്ടിലെ വനിതകളുടെ ഹണ്‍ഡ്രഡ് 2026 ടൂര്‍ണമെന്റില്‍ പാകിസ്താന്‍ താരം ഫാത്തിമ സനയുമായി കെട്ടിപ്പിടിച്ചു. സംഭവം അന്താരാഷ്ട്ര മാധ്യമങ്ങളില്‍ വരെ വലിയ വാര്‍ത്തയായി മാറിയിട്ടുണ്ട്. ജമൈമയുടെ സതേണ്‍േ ബ്രേവും ഫാത്തിമയുടെ ബിര്‍മിംഗാം ഫീനിക്‌സും തമ്മിലുള്ള മത്സരത്തിനിടയില്‍ ഇരുവരും ആശ്‌ളേഷിക്കുന്നതിന്റെ വീഡിയോ വൈറലായി മാറിയിട്ടുണ്ട്.
ജെമൈമയുടെ സതേണ്‍ബ്രേവ് 12 റണ്‍സിന് വിജയിച്ച മത്സരത്തില്‍ താരം പതിവ്‌പോലെ 18 പന്തില്‍ 28 റണ്‍സടിച്ച് ടീമിന് വിജയം നേടിക്കൊടുക്കുകയും ചെയ്തു. മത്സരത്തിന് ശേഷമായിരുന്നു ഇന്ത്യയുടേയും പാകിസ്താന്റെയും താരങ്ങള്‍ ചെറിയ രീതിയില്‍ കെട്ടിപ്പിടിച്ചത്. സംഭവത്തിന്റെ വീഡിയോ സാമൂഹ്യമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.
ഇന്ത്യാ-പാകിസ്ഥാന്‍ ക്രിക്കറ്റ് താരങ്ങള്‍ക്കിടയിലെ സമീപകാല മൈതാനത്തുള്ള സംഘര്‍ഷങ്ങളുടെ പശ്ചാത്തലത്തിലാണ് ഈ സൗഹൃദം വിവാദമാകുന്നത്. മായ ബൗച്ചറും (45) ലിസെല്‍ ലീയും (43) ചേര്‍ന്ന് സതേണ്‍ ബ്രേവിന്റെ സ്‌കോറിന് അടിത്തറയിട്ടതിന് ശേഷം, പുറത്താകാതെ 18 പന്തില്‍ 28 റണ്‍സ് നേടിയ റോഡ്രിഗസ് ബാറ്റിംഗില്‍ വീണ്ടും മികച്ച സംഭാവന നല്‍കി. ബ്രേവ് തങ്ങളുടെ സീസണിലെ രണ്ടാം വിജയം സ്വന്തമാക്കിയ മത്സരത്തില്‍, ടീമിന് മികച്ച സ്‌കോര്‍ സമ്മാനിക്കാനും പിന്നീട് ഒരു ക്യാച്ച് എടുക്കാനും ഇന്ത്യന്‍ ബാറ്റര്‍ക്ക് സാധിച്ചു.
എന്നാല്‍ വുമണ്‍സ് ഹണ്ട്രഡിലെ അരങ്ങേറ്റത്തില്‍ ഫാത്തിമയ്ക്ക് കാര്യങ്ങള്‍ എളുപ്പമായിരുന്നില്ല. 15 പന്തുകള്‍ എറിഞ്ഞ പാകിസ്ഥാന്‍ ക്യാപ്റ്റന്‍ 33 റണ്‍സ് വഴങ്ങി വിക്കറ്റുകളൊന്നും വീഴ്ത്താതെയാണ് കളം വിട്ടത്. ഇന്നിംഗ്‌സിന്റെ അവസാന ഘട്ടങ്ങളില്‍ സതേണ്‍ ബ്രേവ് ബാറ്റര്‍മാര്‍ അവരുടെ ഓവറുകള്‍ മുതലെടുക്കുകയായിരുന്നു. തുടര്‍ന്ന് ബര്‍മിംഗ്ഹാം ഫീനിക്‌സിന്റെ റണ്‍വേട്ടയില്‍ അവര്‍ പുറത്താകാതെ 5 റണ്‍സ് നേടിയെങ്കിലും, ലക്ഷ്യത്തിലെത്താന്‍ ടീമിന് സാധിച്ചില്ല.
Comments