‘അതേ, ഇത് വിസ്മയ മോഹൻലാൽ ആണ്, മഹാനടൻ മോഹൻലാലിന്റെ പുത്രി’, വിസ്മയയെ ട്രോളിയവരുടെ മുഖത്തുനോക്കി ഇങ്ങനെ പറയാനാവും സിനിമാ ആരാധകർ ആഗ്രഹിക്കുന്നത്. വിസ്മയ താരപുത്രിയായിപ്പോയത് മഹാപാതകമാണെന്ന മട്ടിലാണ് ‘തുടക്ക’ത്തെ കുറിച്ചുള്ള വാർത്തകൾ പുറത്തുവന്നപ്പോൾ ട്രോളർ മനസ്സുകൾ ചിന്തിച്ചത്. അത് അവർ സോഷ്യൽ മീഡീയയിലൂടെ കത്തിക്കാൻ ശ്രമിക്കുകയും ചെയ്തു. എന്നാൽ, താരപുത്രി എന്ന ലേബൽ കാറ്റിപ്പറത്തി, വിസ്മയ എന്ന നടിയെ പുറത്തുകൊണ്ടുവരാൻ ജൂഡ് ആന്റണി ജോസഫിനു കഴിഞ്ഞു.
സോഷ്യൽ മീഡിയയിലെ ഫിറ്റ്നസ് വിശേഷങ്ങളുടെ പേരിലും പലപ്പോഴും വിസ്മയ അനാവശ്യമായ സൈബർ ആക്രമണങ്ങൾക്ക് ഇരയായിട്ടുണ്ട്. എന്നാൽ അവർ അതിനെല്ലാം അർഹിക്കുന്ന സ്ഥാനമേ നൽകിയിരുന്നുള്ളൂ. കരാട്ടെ പരിശീലനത്തിലും യോഗയിലും തന്റെതായ ഇടം കണ്ടെത്തിയ വിസ്മയ, തനിക്കെതിരായ ഓരോ പരിഹാസത്തിനും തന്റെ കഠിനാധ്വാനം കൊണ്ടും വിജയങ്ങൾ കൊണ്ടും മറുപടി നൽകിയിരിക്കുന്നു. ഇതങ്ങനെ ഒഴുക്കൻ മട്ടിൽ പറഞ്ഞാൽ മതിയോ എന്ന് ചോദിക്കുന്നവർ ഈ കണക്ക് ഒന്നു കേൾക്കൂ, ടിക്കറ്റ് ബുക്കിങ് ആപ്പായ ബുക്ക് മൈ ഷോയിൽ 24 മണിക്കൂറിനുള്ളിൽ വിറ്റുപോയത് 157000 ടിക്കറ്റുകളാണ് . ആഗോളതലത്തിൽ ആദ്യദിന കളക്ഷനായി 3 കോടിയോളം ബോക്സ് ഓഫീസിൽ നിന്ന് നേടുകയും ചെയ്തു. ഇത് തുടക്കക്കാരിയുടെ ‘തുടക്ക’ത്തിന്റെ വിജയം തന്നെയാണ്.
‘തുടക്ക’ത്തിലെ കഥാപാത്രമായുള്ള വേഷപ്പകർച്ചയ്ക്ക് വിസ്മയയ്ക്ക് നൂറ് മാർക്കും നൽകുന്നവരാണ് മലയാള സിനിമാലോകവും പ്രേക്ഷകരും. താരത്തിന്റെ പ്രായവും ശരീരപ്രകൃതവും വരെ ട്രോളുകളാക്കിയവരുടെ വായടപ്പിക്കുന്നതായിരുന്നു തികഞ്ഞ അച്ചടക്കത്തോടെ മുന്നേറുന്ന അവരുടെ രീതി . ലോകമറിയുന്ന സൂപ്പർതാരത്തിന്റെ മകളാണെന്ന അഹങ്കാരമോ ആഡംബരമോ വിസ്മയയിൽ ഒരിക്കലും കാണാനാകില്ല. പൊതുവേദികളിലും ജീവിതരീതികളിലും അവൾ പുലർത്തുന്ന ലാളിത്യം ഏവരെയും അത്ഭുതപ്പെടുത്തുന്ന ഒന്നാണ്.
തിളക്കമോ സെലിബ്രേറ്റി ജാഡകളോ ഇല്ലാതെ, സാധാരണക്കാരിൽ സാധാരണക്കാരിയായി ജീവിക്കാനാണ് അവൾക്ക് ഇഷ്ടം. തന്റെ സ്വപ്നങ്ങൾക്ക് പിന്നിൽ കഷ്ടപ്പെട്ട് ഓടുമ്പോഴും, ഒരു സാധാരണ കുട്ടിയുടെ ലാളിത്യം നിലനിർത്താൻ വിസ്മയ കാണിക്കുന്ന മനസ്സ് പ്രശംസനീയമാണ്. എഴുത്തിലും കരാട്ടെയിലും മാത്രം ഒതുങ്ങാതെ പ്രായം മുപ്പതുകളിലെത്തിയപ്പോൾ വിസ്മയ സിനിമാലോകത്തിനും ഒരു പുതിയ മാതൃകയാവുകയാണ്. ഒളിച്ചിരുന്ന് അധിക്ഷേപിച്ചവർക്ക് ‘ എല്ലാത്തിനെയും ഭയപ്പെടുന്ന’ ഈ പെൺകുട്ടി അഭിനയമികവിലൂടെ മറുപടി നൽകിയിരിക്കുന്നു.
Comments