പട്യാല: പഞ്ചാബിലെ പട്യാലയിൽ വാടകവീട് കാണാനെത്തിയ ദമ്പതികളെ സ്വീകരിച്ചത് അപകടകാരിയായ പിറ്റ് ബുൾ നായ! ഗേറ്റ് തുറന്നപ്പോഴേക്കും കുരച്ചു ചാടിയ നായ ദമ്പതികളെ കടിച്ചുകുടഞ്ഞു. ഇരുവരും ഗുരുതര പരിക്കുകളോടെ ആശുപത്രിയിലായി.
നായയുടെ ആക്രമണത്തിൽ ദമ്പതികൾക്ക് ഗുരുതരമായി പരിക്കേറ്റു. സംഭവത്തിന്റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വൈറലായിട്ടുണ്ട്.
പട്യാലയിലെ ഗുമാൻ നഗറിൽ ചൊവ്വാഴ്ച വൈകിട്ടാണ് സംഭവം. അങ്കിത് സഭർവാളും ഭാര്യ ശിഫാലിയും ഒരു പ്രോപ്പർട്ടി ഡീലർക്കൊപ്പം വാടകയ്ക്ക് വീട് കാണാൻ എത്തിയതായിരുന്നു. വീടിന്റെ ഗേറ്റ് തുറന്നപ്പോൾ പെട്ടെന്ന് ചാടിയിറങ്ങിയ പിറ്റ്ബുൾ നായ ഭാര്യയെ ആക്രമിക്കുകയായിരുന്നു.
നായയുടെ ആക്രമണത്തിൽ ശിഫാലിയുടെ കൈയ്ക്കും ശരീരത്തിന്റെ മറ്റ് ഭാഗങ്ങൾക്കും ഗുരുതരമായി പരിക്കേൽക്കുകയും ശസ്ത്രക്രിയയ്ക്ക് വിധേയമാക്കുകയും ചെയ്തു. അവൾ ഒരു സ്വകാര്യ ആശുപത്രിയിൽ ചികിത്സയിലാണ്. ഭാര്യയെ രക്ഷിക്കാൻ ശ്രമിക്കുന്നതിനിടയിൽ അങ്കിതിനും കാലുകളിലും പുറത്തും കടിയേറ്റിട്ടുണ്ട്. ദമ്പതികളെ നായ ആക്രമിക്കുന്നത് കണ്ട് സമീപവാസികൾ വടികളുമായി ഓടിയെത്തിയാണ് നായയെ തുരത്തി ദമ്പതികളെ രക്ഷിച്ചത്.
സംഭവം സമൂഹമാധ്യമങ്ങളിൽ ചർച്ചയായതൊടെ നഗരത്തിൽ ആക്രമണ സ്വഭാവമുള്ള നായകളെ വളർത്തുന്നത് നിരോധിക്കുമെന്ന് പട്യാല മേയർ കുന്ദൻ ഗോഗിയ അറിയിച്ചു. മുനിസിപ്പൽ കോർപ്പറേഷന്റെ അടുത്ത യോഗത്തിൽ വിഷയം ചർച്ച ചെയ്ത് പ്രത്യേക പ്രമേയം പരിഗണിക്കുമെന്നും അദ്ദേഹം പറഞ്ഞു. നഗരത്തിൽ തെരുവ് നായ ആക്രമണങ്ങളും വളർത്തുനായ്ക്കളുടെ ആക്രമണങ്ങളും വർദ്ധിക്കുന്നത് ജനങ്ങളിൽ ആശങ്ക പരത്തിയിട്ടുണ്ട്.
പിറ്റ്ബുൾ നായകൾക്ക് അവിശ്വസനീയമായ താടിയെല്ല് ശക്തിയുണ്ട്. ഇവ ആക്രമിക്കുമ്പോൾ ഇരയുടെ മാംസവും അസ്ഥികൾക്കും ഗുരുതരമായി പരിക്കേൽക്കും. പലപ്പോഴും ശസ്ത്രക്രിയ ആവശ്യമുള്ള വലിയ പരിക്കുകളിലേക്കോ മരണത്തിലേക്കോ ഇത് നയിക്കാറുണ്ട്. ലക്ഷ്യത്തിൽ നിന്ന് പിന്മാറാതിരിക്കുക എന്നത് ഇവയുടെ സഹജമായ ഒരു പ്രത്യേകതയാണ്. ആക്രമണം ആരംഭിച്ചാൽ, ചുറ്റും എന്തുനടന്നാലും, പിടിവിടാൻ ഉടമ ആവശ്യപ്പെട്ടാലും പെട്ടെന്ന് പിന്തിരിയാൻ ഇവ തയ്യാറാകാറില്ല.
Comments