‘പമ്പയിൽ തുണി ഉപേക്ഷിക്കുന്നത് ആചാരമല്ല, ദുരാചാരം’; വാഹനത്തിന് മുന്നിൽ കർപ്പൂരം കത്തിക്കരുതെന്നും ദേവസ്വം ബോർഡ്

തിരുവനന്തപുരം: ശബരിമലയിൽ തുണി ഊരി പമ്പയിൽ ഉപേക്ഷിക്കുന്നത് ആചാരമല്ല, ദുരാചാരമാണെന്ന് ദേവസ്വം ബോർഡ് പ്രസിഡന്റ് കെ. ജയകുമാർ. വാഹനത്തിന് മുന്നിൽ കർപ്പൂരം കത്തിക്കുക, പ്ലാസ്റ്റിക് കവറുകളിൽ ഷാംപൂ കൊണ്ടുവരിക തുടങ്ങിയ പ്രവൃത്തികളും കർശനമായി ഒഴിവാക്കണമെന്ന് അദ്ദേഹം പറഞ്ഞു.

ശബരിമലയെ പുണ്യമലയായി സംരക്ഷിക്കാൻ എല്ലാ ഭക്തർക്കും ബാധ്യതയുണ്ട്. തീർഥാടകരുടെ പരാതികൾ തീർഥാടനകാലം അവസാനിക്കുന്നതുവരെ കാത്തിരിക്കാതെ അപ്പപ്പോൾ തന്നെ പരിഹരിക്കുന്ന സംവിധാനത്തിലേക്ക് ദേവസ്വം ബോർഡ് മാറണമെന്നും ജയകുമാർ പറഞ്ഞു. ഇതിനായി ‘ടു-വേ കമ്മ്യൂണിക്കേഷൻ’ സംവിധാനം ആവശ്യമാണ്.

ശബരിമലയിൽ നടക്കുന്ന കാര്യങ്ങളെക്കുറിച്ച് ഇതര സംസ്ഥാനങ്ങളിൽ നിന്നെത്തുന്ന ഭക്തർക്ക് കൃത്യമായ വിവരങ്ങൾ നൽകണം. ഇതിനായി ഇംഗ്ലീഷ്, കന്നഡ, തെലുങ്ക്, തമിഴ്, മലയാളം ഭാഷകളിൽ ‘ശബരിമല സന്ദേശ്’ മാസിക പ്രസിദ്ധീകരിക്കും. മണ്ഡലകാലം ആരംഭിക്കുന്നതിന് മുന്നോടിയായി നവംബർ 15ന് മുമ്പ് മാസിക പുറത്തിറക്കാനാണ് ലക്ഷ്യമിടുന്നതെന്നും അദ്ദേഹം പറഞ്ഞു.

കേരളത്തിന് പുറത്തുനിന്നുള്ളവരാണ് ശബരിമലയിലേക്ക് കൂടുതലായി എത്തുന്നത്. ഓരോ ക്ഷേത്രത്തിനും ഓരോ ആചാരങ്ങളുണ്ട്. ശബരിമലയിൽ യുവതീപ്രവേശനത്തിന് നിയന്ത്രണമുള്ളതടക്കമുള്ള ഇത്തരം ആചാരങ്ങളും വിവരങ്ങളും ഭക്തരെ അറിയിക്കുകയാണ് ‘സന്ദേശ്’ മാസികയുടെ ലക്ഷ്യമെന്നും ദേവസ്വം ബോർഡ് പ്രസിഡന്റ് വ്യക്തമാക്കി.