യൂത്ത് കോൺഗ്രസ് പ്രവർത്തകരെ മർദിച്ച കേസ്: എം.ആർ. അജിത്കുമാറിന്റെ സസ്പെൻഷൻ പിൻവലിക്കണമെന്ന ആവശ്യം സർക്കാർ തള്ളി

തിരുവനന്തപുരം: നവകേരള യാത്രയ്ക്കിടെ യൂത്ത് കോൺഗ്രസ് പ്രവർത്തകരെ മുൻ മുഖ്യമന്ത്രി പിണറായി വിജയന്റെ ഗൺമാൻമാർ മർദിച്ച കേസിൽ ഇടപെട്ടെന്ന ആരോപണത്തെ തുടർന്ന് ലഭിച്ച സസ്പെൻഷൻ പിൻവലിക്കണമെന്ന എഡിജിപി എം.ആർ. അജിത്കുമാറിന്റെ ആവശ്യം സർക്കാർ തള്ളി. എസ്‌ഐടി റിപ്പോർട്ടിലെ ഗുരുതര കണ്ടെത്തലുകളുടെ അടിസ്ഥാനത്തിലാണ് സസ്പെൻഷൻ നടപടിയെടുത്തതെന്ന് സർക്കാർ വ്യക്തമാക്കി.

സസ്പെൻഷൻ നടപടി ചോദ്യം ചെയ്ത് അജിത്കുമാർ കേന്ദ്ര അഡ്മിനിസ്ട്രേറ്റീവ് ട്രൈബ്യൂണലിൽ നൽകിയ ഹർജിക്ക് മറുപടിയായി സമർപ്പിച്ച സത്യവാങ്മൂലത്തിലാണ് സർക്കാർ നിലപാട് വ്യക്തമാക്കിയത്.

സസ്പെൻഷൻ ഉത്തരവിൽ മുഖ്യമന്ത്രി ഒപ്പുവെച്ചിട്ടില്ലെന്ന അജിത്കുമാറിന്റെ വാദവും സർക്കാർ തള്ളി. സസ്പെൻഷൻ ഉത്തരവിൽ ഒപ്പുവയ്ക്കാൻ ചീഫ് സെക്രട്ടറിക്ക് അധികാരമുണ്ടെന്നും സർക്കാർ വ്യക്തമാക്കി. നടപടിക്ക് പിന്നിൽ ദുരുദ്ദേശ്യമുണ്ടെന്ന ആരോപണത്തിനും തെളിവില്ല. പ്രമോഷൻ തടയാനാണ് സസ്പെൻഷൻ എന്ന വാദവും അടിസ്ഥാനരഹിതമാണെന്ന് സർക്കാർ അറിയിച്ചു.

സസ്പെൻഷൻ ഉത്തരവ് പുറപ്പെടുവിക്കുന്നതിന് മുൻപ് അജിത്കുമാറിനോട് വിശദീകരണം തേടിയിരുന്നുവെന്നും അദ്ദേഹത്തിന്റെ വിശദീകരണം തൃപ്തികരമായിരുന്നില്ലെന്നും സർക്കാർ വ്യക്തമാക്കി. ചട്ടങ്ങൾ പാലിച്ചാണ് സസ്പെൻഷൻ നടപടിയെടുത്തതെന്നും സത്യവാങ്മൂലത്തിൽ പറയുന്നു.

യൂത്ത് കോൺഗ്രസ് പ്രവർത്തകർക്ക് മർദനമേറ്റ കേസിൽ അജിത്കുമാർ ഇടപെട്ട് ചിലരുടെ മൊഴികൾ മാറ്റിയതായി തെളിവുകൾ ലഭിച്ചിട്ടുണ്ടെന്നാണ് എസ്‌ഐടി റിപ്പോർട്ടിലെ കണ്ടെത്തൽ. അതിന്റെ അടിസ്ഥാനത്തിലാണ് നടപടിയെടുത്തതെന്നും സർക്കാർ വ്യക്തമാക്കി.

സസ്പെൻഷൻ രാഷ്ട്രീയപ്രേരിതമാണെന്ന അജിത്കുമാറിന്റെ ആരോപണവും സർക്കാർ തള്ളി. ഹർജി തള്ളണമെന്ന് ആവശ്യപ്പെട്ടാണ് സർക്കാർ സെൻട്രൽ അഡ്മിനിസ്ട്രേറ്റീവ് ട്രൈബ്യൂണലിൽ സത്യവാങ്മൂലം നൽകിയത്. ഹർജി സെപ്റ്റംബർ മൂന്നിന് വീണ്ടും പരിഗണിക്കും.