പ്രവാസികൾക്ക് ആശ്വാസമായി സർക്കാരിന്റെ ഓണസമ്മാനം: പ്രവാസി ക്ഷേമനിധി പെൻഷൻ 32 കോടി രൂപ അനുവദിച്ച നടപടി സ്വാഗതാർഹം; ഇൻകാസ് ഖത്തർ

ദോഹ: പ്രവാസി ക്ഷേമനിധി ബോർഡ് വഴി പെൻഷൻ വിതരണത്തിനായി 32 കോടി രൂപ അനുവദിച്ച കേരള സർക്കാരിന്റെ നടപടിയെ ഇൻകാസ് ഖത്തർ സ്വാഗതം ചെയ്തു. ഓണത്തോടനുബന്ധിച്ച് പെൻഷൻ തുക ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ടെത്തിക്കാൻ നടപടി സ്വീകരിച്ചത് പ്രവാസി സമൂഹത്തോടുള്ള സർക്കാരിന്റെ പ്രതിബദ്ധത വ്യക്തമാക്കുന്നതാണെന്ന് സംഘടനയുടെ ഭാരവാഹികൾ വാർത്താക്കുറിപ്പിൽ വ്യക്തമാക്കി.
മുൻ സർക്കാരിന്റെ കാലത്ത് പെൻഷൻ തുക വകമാറ്റി ചിലവഴിച്ചതിനെ തുടർന്നുണ്ടായ കുടിശ്ശിക കാരണം പ്രതിസന്ധിയിലായ പ്രവാസികൾക്ക്, നിലവിലെ സർക്കാർ അനുവദിച്ച ഈ ആദ്യഘട്ട തുക വലിയ ആശ്വാസമാകുമെന്ന് ഇൻകാസ്ഖത്തർ പത്രകുറിപ്പിൽ ചൂണ്ടിക്കാട്ടി. പ്രവാസികളുടെ ക്ഷേമം മുൻനിർത്തി വിഷയത്തിൽ അടിയന്തരമായി ഇടപെടുകയും തുക അനുവദിക്കുകയും ചെയ്ത കേരള മുഖ്യമന്ത്രി വി.ഡി. സതീശനെയും യുഡിഎഫ് സർക്കാരിനെയും ഇൻകാസ് സെൻട്രൽ കമ്മിറ്റിയുടെ അഭിനന്ദനം അറിയിച്ചു.
പ്രവാസി സമൂഹത്തിന്റെ അവകാശങ്ങളും ക്ഷേമവും സംരക്ഷിക്കുന്നതിനും പ്രവാസികളുടെ പ്രശ്നങ്ങളിൽ സമയബന്ധിതമായി ഇടപെടുന്നതിനും യുഡിഎഫ് സർക്കാർ സ്വീകരിക്കുന്ന നടപടികൾക്ക് ഇൻകാസ് ഖത്തറിൻ്റെ പിന്തുണ ഭാരവാഹികൾ അറിയിച്ചു.


ഷഫീക്ക് അറയ്ക്കൽ