തെന്നിന്ത്യൻ ലേഡി സൂപ്പർസ്റ്റാർ പദവി സ്വപ്രയത്നം കൊണ്ട് നേടിയെടുത്ത താരമാണ് നയൻതാര. ബിഗ് സ്‌ക്രീനിൽ പിന്‍ഗാമികളോ കൈ പിടിച്ചുയർത്താൻ പ്രശസ്തരോ ഇല്ലാതിരുന്നിട്ടും നയൻതാര രണ്ടു പതിറ്റാണ്ടിലധികമായി തെന്നിന്ത്യയിൽ തന്റേതായ ഇരിപ്പിടത്തില്‍ തിളങ്ങി നിൽക്കുകയാണ്. വിവാഹിതയായതോടെ സിനിമാതിരക്കുകളില്‍ നിന്ന് കൂടുതല്‍ സമയം ഭര്‍ത്താവ് വിഘ്നേഷിനും ഇരട്ടക്കുട്ടികളായ ഉയിരിനും ഉലകത്തിനും വേണ്ടിയും നയന്‍സ് മാറ്റിവയ്ക്കാറുണ്ട്. എങ്കിലും നയന്‍സ് എത്തുന്ന സിനിമകളെ ആവേശത്തോടെയാണ് ആരാധകര്‍ കാത്തിരിക്കുന്നത്. ആരാധകര്‍ക്കിടയില്‍ മാത്രമല്ല സഹതാരങ്ങള്‍ക്കിടയിലും നയന്‍സിനെ ആരാധിക്കുകയും സ്നേഹിക്കുകയും ചെയ്യുന്നവര്‍ ഒരുപാടാണ്.
ഇപ്പോഴിതാ നയൻതാരയെ പ്രശംസിച്ച് സംസാരിക്കുകയാണ് മുതിര്‍ന്ന അഭിനേത്രി രാധിക ശരത്കുമാർ. നയന്‍താരയുടെ വിജയത്തില്‍ വലിയ സന്തോഷമുണ്ടെന്നും വളരെ ടഫായ വ്യക്തിയാണെന്നും നയന്‍താര ഇത്രയും വലിയ വിജയത്തിലെത്തിയത് തനിക്ക് മനസ്സിലായെന്നും രാധിക പറഞ്ഞു. വിഘ്നേശും നയൻതാരയും പവർ കപ്പിളാണെന്നും രാധിക കൂട്ടിച്ചേര്‍ത്തു.
‘‘നയന്‍താര വളരെ ടഫ് ആയിട്ടുള്ള വ്യക്തിയാണ്. വളരെ മൃദുവായി ഇരിക്കുന്നത് പോലെ നമുക്ക് തോന്നും, പക്ഷേ അല്ല. ശാരീരികമായും മാനസികമായും നയന്‍ വളരെ അധികം ടഫ് ആണ്. നയന്‍താര എന്തുകൊണ്ടാണ് ഇത്രയും വലിയ സക്സസ് ആയത് എന്ന് എനിക്കറിയാം, അത് ഞാന്‍ അവരോട് പറഞ്ഞിട്ടുണ്ട്. നയന്‍താരയ്ക്ക് ഭയങ്കര ക്ഷമയാണ്. നയൻ ഒരുപാട് കാര്യങ്ങള്‍ സംസാരിക്കില്ല. നിശബ്ദതയില്‍ ഒരു തെറ്റുമില്ല. ആര് വേണമെങ്കിലും എന്തും പറഞ്ഞോട്ടെ. നയൻതാരയെ ഞാൻ അഭിനന്ദിക്കുന്നു. 24 മണിക്കൂര്‍ നേരവും ഒരാള്‍ നയന്‍താരയുടെ തലമുടി പിടിച്ചുകൊണ്ടേ ഇരിക്കുന്നുണ്ടാവും. എന്റെ സ്റ്റൈലിസ്റ്റ് എങ്ങനമായിരുന്നെങ്കില്‍, കുറച്ച് നേരം പോലും ഞാന്‍ ക്ഷമയോടെ ഇരിക്കില്ല, പിടിച്ച് അടിച്ചിട്ടുണ്ടാവും. പക്ഷേ നയന്‍താര ഓരോ ചെറിയ ഡീറ്റേയിലിങിലും അത്രയധികം കോണ്‍ഷ്യസ് ആണ്. അതാണ് അവരുടെ സക്സസ്.
അതിനൊപ്പം സെറ്റില്‍ എല്ലാവരെയും അത്രയും നന്നായി നയന്‍താര കെയര്‍ ചെയ്യും. ചിത്രത്തില്‍ പ്രഭു സാറുമുണ്ട്, അദ്ദേഹം വീട്ടില്‍ നിന്ന് എല്ലാവര്‍ക്കും ഭക്ഷണം കൊണ്ടു വരും. അത് അദ്ദേഹത്തിന്റെ അച്ഛന്‍ ശിവാജി ഗണേശന്‍ സര്‍ മുതലുള്ള ശീലമാണ്. പ്രഭു സര്‍ മാത്രമല്ല, നയന്‍താരയും എല്ലാവര്‍ക്കുമുള്ള ഭക്ഷണവും വീട്ടില്‍ നിന്ന് കൊണ്ടുവരും. ഹായ് സെറ്റ് ഓര്‍ക്കുമ്പോള്‍ തന്നെ ഇത്തരം മനോഹരമായ ഒരുപാട് ഓര്‍മകളാണ്
നയന്‍താരയുടെയും വിഘ്‌നേഷ് ശിവന്റെയും കാര്യത്തില്‍ ഞാന്‍ വളരെ അധികം സന്തോഷിക്കുന്നു, അവര്‍ ശരിക്കുമൊരു പവര്‍ കപ്പിളാണ്. സിനിമയില്‍ ആരെങ്കിലും എന്തെങ്കിലും ചെയ്താല്‍ എപ്പോഴും മറ്റുള്ളവര്‍ പറയുന്നത്, എന്തിന് ഇവര്‍ ഇതൊക്കെ ചെയ്യണം എന്നാണ്. പക്ഷേ നയന്‍താരയെയും വിഘ്‌നേശ് ശിവനെയും സംബന്ധിച്ച്, ക്യാമറയ്ക്ക് മുന്നിലുള്ള അവരുടെ കഴിവും, ക്യാമറയ്ക്ക് പിന്നിലുള്ള അവരുടെ കാഴ്ചപ്പാടും വളരെ മനോഹരവും വ്യക്തവുമാണ്. എത്ര മനോഹരമായ കോബിനേഷനാണ്. അത് തന്നെയാണ് അവരുടെ വിജയവും, അതില്‍ എനിക്ക് വളരെ അധികം സന്തോഷമുണ്ട്...’’ രാധിക ശരത്കുമാര്‍ പറഞ്ഞു. ഹായ് എന്ന ചിത്രത്തിന്റെ സക്സസ് മീറ്റില്‍ സംസാരിച്ചപ്പോഴാണ് രാധിക നയന്‍താരയെക്കുറിച്ച് പറഞ്ഞത്.
നയന്‍താരയും വിഘ്‌നേശ് ശിവനും നിര്‍മിച്ച്, നയന്‍താരയും കവിനും കേന്ദ്ര കഥാപാത്രങ്ങളായി എത്തിയ വിഷ്ണു എടവന സംവിധാനം ചെയ്ത ചിത്രമാണ് ഹായ്. ഒരു ഫീല്‍ ഗുഡ് സിനിമ എന്ന നിലയില്‍ മികച്ച പ്രേക്ഷക പ്രതികരണമാണ് സിനിമയ്ക്ക് ലഭിച്ചു കൊണ്ടിരിക്കുന്നത്. തിയേറ്ററില്‍ കൈയടിയോടെ മുന്നേറുന്ന ഈ ചിത്രത്തില്‍ രാധിക ശരത്കുമാറും ഒരു പ്രധാന വേഷം ചെയ്തിട്ടുണ്ട്.
സക്സസ് മീറ്റില്‍, നിര്‍മാതാക്കളായ നയന്‍താരയും വിഘ്‌നേശ് ശിവനും പങ്കെടുത്തിട്ടില്ല, അവര്‍ എന്തുകൊണ്ടാണ് വരാത്തത് എന്ന് സംസാരിക്കുന്നതിനിടയില്‍ രാധിക ചോദിക്കുന്നുണ്ട്. ‘അവര്‍ പ്രത്യേകം നന്ദി അറിയിക്കും എന്നാണത്രെ പറഞ്ഞിരിക്കുന്നത്. എന്നിരുന്നാലും അവര്‍ക്ക് വേണ്ടി ഈ അവസരത്തില്‍ ഹായ് എന്ന ചിത്രത്തെ സ്വീകരിച്ചവര്‍ക്ക് ഞാന്‍ നന്ദി പറയുന്നു...’ എന്ന് രാധിക ശരത്കുമാര്‍ പറഞ്ഞു.
നയന്‍താര പ്രധാന വേഷത്തിലെത്തുന്ന രണ്ട് സിനിമകളാണ് ഒരേ സമയം പ്രേക്ഷകര്‍ക്ക് മുന്നിലെത്തിയിരിക്കുന്നത്. ഗീതു മോഹന്‍ദാസ് സംവിധാനം ചെയ്ത് തെലുങ്ക് സൂപ്പര്‍താരം യഷ് പ്രധാന വേഷത്തിലെത്തിയ ‘ടോക്സിക്: എ ഫെയറി ടെയിൽ ഫോർ ഗ്രോൺ-അപ്സി’ല്‍ നയൻതാര ഗംഗ എന്ന ഗ്യാങ്സ്റ്റർ കഥാപാത്രത്തെയാണ് അവതരിപ്പിക്കുന്നത്. യാഷിന്റെ രായ എന്ന കഥാപാത്രവുമായി ബന്ധപ്പെട്ടതാണ് നയന്‍സിന്റെ കഥാപാത്രം.
റൊമാന്റിക് ഫീല്‍ ഗുഡ് ചിത്രമായ ‘ഹായ്’ യില്‍ ദേവയാനി എന്ന കഥാപാത്രമായിട്ടാണ് നയന്‍സ് എത്തുന്നത്. തീര്‍ത്തും വ്യത്യസ്തമായ രണ്ടു കഥാപാത്രങ്ങളെയാണ് ഈ രണ്ടു ചിത്രങ്ങളിലും നയന്‍താര അവതരിപ്പിച്ചിരിക്കുന്നത്.
നയൻതാര നായികയായി വേഷമിടുന്ന പുതിയ ചിത്രം മണ്ണാങ്കട്ടി സിൻസ് 1960 ചിത്രീകരണം പൂര്‍ത്തിയായ സന്തോഷവും അടുത്തിടെ താരം പങ്കിട്ടിരുന്നു. ക്യാമറാ ലെൻസിലൂടെ നോക്കുന്ന നയൻതാരയെ ഫോട്ടോയില്‍ കണ്ടത് ആരാധകരില്‍ ആകാംക്ഷ സൃഷ്‍ടിച്ചിരുന്നു. വ്യത്യസ്തമായ കഥാപാത്രങ്ങളിലൂടെ കരിയറിലും വിഘ്നേഷിന്റെയും മക്കളുടെയും കാര്യങ്ങള്‍ നോക്കി വ്യക്തിജീവിതത്തിലും തിളങ്ങി നില്‍ക്കുകയാണ് നയന്‍താര.
Comments