ന്യൂഡല്‍ഹി : ഇന്ത്യയും പാനമയും തമ്മില്‍ നടക്കാനിരുന്ന അന്താരാഷ്ട്ര പുരുഷ സൗഹൃദ ഫുട്‌ബോള്‍ മത്സരത്തിന്റെ തീയതി മാറ്റിയതായും, നേരത്തെ പ്രഖ്യാപിച്ചിരുന്ന സെപ്റ്റംബര്‍ 26-ന് പകരം സെപ്റ്റംബര്‍ 25-ന് മത്സരം നടക്കുമെന്നും ഓള്‍ ഇന്ത്യ ഫുട്‌ബോള്‍ ഫെഡറേഷന്‍ അറിയിച്ചു. ബെംഗളൂരുവിലെ ശ്രീ കണ്ഠീരവ സ്റ്റേഡിയത്തിലാണ് മത്സരം നടക്കുക.
ഫിഫ റാങ്കിംഗില്‍ 44-ാം സ്ഥാനത്തുള്ളതും 2026-ലെ ഫിഫ ലോകകപ്പില്‍ മത്സരിച്ചതുമായ പാനമയെയാണ് ഇന്ത്യന്‍ ടീം നേരിടുന്നത്. ഉയര്‍ന്ന റാങ്കിലുള്ള ഒരു അന്താരാഷ്ട്ര ടീമിനെതിരെ കളിച്ച് കഴിവ് തെളിയിക്കാന്‍ ഈ മത്സരം ഇന്ത്യക്ക് അവസരമൊരുക്കും. അന്താരാഷ്ട്ര വിന്‍ഡോയില്‍ ശക്തരായ ഫുട്‌ബോള്‍ രാജ്യങ്ങള്‍ക്കെതിരെ മത്സരിക്കാനുള്ള ഇന്ത്യയുടെ തയ്യാറെടുപ്പുകളുടെ ഭാഗമാണ് ഈ മത്സരം.
ലോകോത്തര ടീമുകള്‍ക്കെതിരെയുള്ള മത്സരങ്ങള്‍ ഉള്‍പ്പെടെ നിരവധി അന്താരാഷ്ട്ര സൗഹൃദ മത്സരങ്ങള്‍ നടത്തുന്ന കാര്യം എഐഎഫ്എഫ് നേരത്തെ സ്ഥിരീകരിച്ചിരുന്നു. പാനമക്കെതിരായ സൗഹൃദ മത്സരത്തിന് ശേഷം ലോക ചാമ്പ്യന്മാരായ ബ്രസീലിനെ ഒക്ടോബര്‍ 3-നും രണ്ട് തവണ ലോക ചാമ്പ്യന്മാരായ യുറഗ്വായിയെ ഒക്ടോബര്‍ 6-നും ഇന്ത്യ നേരിടും. ഈ രണ്ട് മത്സരങ്ങളും കൊല്‍ക്കത്തയിലാണ് തീരുമാനിച്ചിരിക്കുന്നത്. ഫിഫ ലോകകപ്പില്‍ കളിച്ച മൂന്ന് മികച്ച ടീമുകള്‍ക്കെതിരെ കളിക്കാനും സ്വയം വിലയിരുത്താനും ഈ മൂന്ന് മത്സരങ്ങള്‍ ഇന്ത്യക്ക് മികച്ച അവസരം നല്‍കും.
Comments