ബോളിവുഡിന്റെ പവര്‍ കപ്പിള്‍സാണ് സെയ്ഫ് അലി ഖാനും കരീന കപൂര്‍ ഖാനും. കരിയറും വ്യക്തിജീവിതവും ഒരേ നിലയില്‍ ബാലന്‍സ് ചെയ്തു കൊണ്ടുപോകുന്ന ദമ്പതിമാരെന്ന നിലയില്‍ സെയ്ഫിനും കരീനയ്ക്കും ഒരുപാട് പ്രശംസകള്‍ കിട്ടാറുണ്ട്. കരീനയുമായുള്ളത് സെയ്ഫിന്റെ രണ്ടാം വിവാഹമാണ്. ‘തഷാന്‍’ എന്ന ആക്ഷന്‍ സിനിമയുടെ ഷൂട്ടിനിടെയാണ് സെയ്ഫിന്റെയും കരീനയുടെയും പ്രണയം തുടങ്ങിയത്. ഈ സെറ്റില്‍ വച്ച് മൊട്ടിട്ട പ്രണയകഥ ആരാധകര്‍ക്ക് സുപരിചിതവുമാണ്.
ഇപ്പോഴിതാ ഇവരുടെ പ്രണയത്തിന്റെ തുടക്കക്കാലത്ത് നടന്ന രസകരമായ ഒരു അനുഭവം വര്‍ഷങ്ങള്‍ക്ക് ശേഷം തുറന്നു പറഞ്ഞ് സെയ്ഫിനെ കളിയാക്കുകയാണ് സഹതാരം അക്ഷയ് കുമാര്‍. തഷാന്‍ എന്ന സിനിമയില്‍ ഇവര്‍ക്ക് രണ്ടാള്‍ക്കുമൊപ്പം അക്ഷയ് കുമാറുമുണ്ടായിരുന്നു. പ്രിയദർശൻ സംവിധാനം ചെയ്യുന്ന ഏറ്റവും പുതിയ ക്രൈം ത്രില്ലർ ചിത്രം ഹൈവാന്റെ പ്രമോഷന്റെ ഭാഗമായി അമിതാഭ് ബച്ചൻ അവതരിപ്പിക്കുന്ന ‘കോന്‍ ബനേഗാ ക്രോർപതി 18’ ന്റെ വേദിയിലെത്തിയപ്പോഴാണ് അക്ഷയ് കുമാര്‍ ഇവരുടെ പ്രണയത്തെക്കുറിച്ച് പറഞ്ഞത്.
തഷാന്റെ ലൊക്കേഷനില്‍ വെച്ചാണോ പ്രണയം തുടങ്ങിയതെന്ന് അമിതാഭ് ബച്ചൻ ചോദിച്ചപ്പോള്‍, ‘അതെ സാർ...’ എന്ന് സെയ്ഫ് സമ്മതിച്ചു. തുടർന്ന്, അക്ഷയ് കുമാറിനോട് ആ പ്രണയത്തിന്റെ ആദ്യകാല നിമിഷങ്ങള്‍ക്ക് സാക്ഷിയായിട്ടുണ്ടോ എന്ന് ബിഗ് ബി ചോദിച്ചു. തല്‍ക്ഷണം അക്ഷയ് സെയ്ഫിനെ ട്രോളി.
‘‘സാർ, എനിക്ക് സാധാരണയായി അതിരാവിലെ 4:30-ന് ഉണരുന്ന ശീലമുണ്ട്. ഷൂട്ടിംഗ് സമയത്ത് കരീനയുടെ റൂം എന്റെ മുറിയുടെ തൊട്ടടുത്തായിരുന്നു. ഒരു ദിവസം പുലർച്ചെ ഞാൻ പുറത്തിറങ്ങിയപ്പോള്‍ തൊട്ടടുത്ത മുറിയുടെ വാതില്‍ തുറന്ന് ഈ മാന്യൻ (സെയ്ഫ്) പതുങ്ങി പുറത്തേക്ക് വരുന്നു... പെട്ടെന്ന് ഞാൻ ചോദിച്ചു, ‘നിങ്ങള്‍ ഇവിടെ എന്തെടുക്കുകയാണ്?’.
ഒട്ടും പതറാതെ സെയ്ഫ് പറഞ്ഞു, ‘ഒന്നുമില്ല, ഞങ്ങള്‍ രണ്ടുപേരും ജോഗിങ്ങിന് പോകാൻ ഇറങ്ങിയതാണ്...’ എന്ന്. ‘അപ്പോള്‍ അതിരാവിലെ കരീനയെ ജോഗിംഗിന് വിളിച്ചുണർത്താനാണ് ഇദ്ദേഹം അവിടെ എത്തിയത്...’ അക്ഷയ് പറഞ്ഞത് കേട്ട് അമിതാഭ് ബച്ചനും സെയ്ഫും ചിരിയടക്കാന്‍ പാടുപെടുന്നത് ദൃശ്യങ്ങളില്‍ കാണാം. ‘അതെ, പുലർച്ചെയുള്ള ജോഗിങ് തന്നെയായിരുന്നു...’ എന്ന് ചമ്മിയ ചിരിയോടെ സെയ്ഫ് സമ്മതിക്കുന്നതും വീഡിയോയില്‍ കാണാം.
കരീനയുമായ തങ്ങളുടെ കുടുംബബന്ധത്തെക്കുറിച്ചും അമിതാഭ് ബച്ചൻ സംസാരിക്കുന്നുണ്ട്. രാജ് കപൂറിന്റെ മകള്‍ റിതു നന്ദയുടെ മകൻ നിഖില്‍ നന്ദയാണ് അമിതാഭ് ബച്ചന്റെ മകള്‍ ശ്വേത ബച്ചനെ വിവാഹം ചെയ്തിരിക്കുന്നത്. രാജ് കപൂറിന്റെ പേരക്കുട്ടിയായ കരീന അതുവഴി ബച്ചന്റെയും ബന്ധുവായി മാറുന്നുണ്ടെന്നും താരം പറയുന്നു. ‘അതുകൊണ്ട് കരീന എന്നെ എന്താണ് വിളിക്കേണ്ടത്?’ എന്നും അമിതാഭ് ബച്ചന്‍ തമാശയോടെ സെയ്ഫിനോട് ചോദിച്ചു. ‘ഭാഗ്യം, ഇതൊരു കെബിസി ചോദ്യമല്ലല്ലോ...’ എന്നായിരുന്നു സെയ്ഫ് ഇതിനു നല്‍കിയ കൗണ്ടർ. അതുകേട്ട് അക്ഷയ് കുമാര്‍ പൊട്ടിച്ചിരിക്കുന്നതും കാണാം.
ഒരുകാലത്ത് ബോളിവുഡിന്റെ സൂപ്പര്‍ കോമ്പോയായിരുന്നു അക്ഷയ് കുമാറും സെയ്ഫ് അലി ഖാനും. നീണ്ട 17 വര്‍ഷത്തെ ഇടവേളയ്ക്കു ശേഷമാണ് ഇവര്‍ രണ്ടാളും പ്രിയദര്‍ശന്റെ സിനിമയിലൂടെ പ്രേക്ഷകര്‍ക്ക് മുന്നിലെത്തുന്നത്. മോഹൻലാലിനെ നായകനാക്കി പ്രിയദർശൻ ഒരുക്കിയ മലയാളത്തിലെ സൂപ്പർഹിറ്റ് ചിത്രം ‘ഒപ്പ’ ത്തിന്റെ ഒഫീഷ്യല്‍ ഹിന്ദി റീമേക്കാണ് ‘ഹൈവാൻ’. അക്ഷയ്-സെയ്ഫ് കൂട്ടുക്കെട്ടിലൊരുങ്ങുന്ന ഈ ചിത്രത്തില്‍ ബൊമൻ ഇറാനി, ശ്രിയ പില്‍ഗാവ്കർ, സയാമി ഖേർ എന്നിവരടങ്ങുന്ന വൻ താരനിര അണിനിരക്കുന്നുണ്ട്. സിനിമ സെപ്റ്റംബര്‍ 11 ന് തിയേറ്ററുകളിലെത്തും.
Comments