ആലപ്പുഴ: കരുവാറ്റയില്‍ വയോധികനെ കൊലപ്പെടുത്തിയ സംഭവത്തില്‍ പ്രായപൂര്‍ത്തിയാകാത്ത കുട്ടികളെ പോലീസ് കസ്റ്റഡിയില്‍ വിട്ടു. ജുവനൈല്‍ നിയമത്തിലെ അസാധാരണമായ നീക്കം ആലപ്പുഴ ജുവനൈല്‍ ജസ്റ്റീസ് ബോര്‍ഡിന്റേതാണ്. തെളിവെടുപ്പ് അതീവരഹസ്യം ആയിരിക്കണം എന്നതടക്കം കര്‍ശന വ്യവസ്ഥയോടെ കസ്റ്റഡിയില്‍ വിട്ടത്.
കുട്ടികളുടെ ഒരു വിവരവും പുറത്തുപോകരുതെന്ന കര്‍ശനമായ വ്യവസ്ഥകളും നല്‍കിയിട്ടുണ്ട്. അതേസമയം പെണ്‍കുട്ടിയെ ചോദ്യം ചെയ്യാന്‍ അനുമതി സിഡബ്‌ളൂസി വഴി അപേക്ഷിച്ചെങ്കിലും അത് കോടതി അത് നീക്കിവെച്ചു. കൊലപാതകക്കേസില്‍ അസാധാരണമായ ഒന്നായതിനാലും അപൂര്‍വ്വത്തില്‍ അപൂര്‍വ്വമായ കേസായതിനാലുമാണ് നടപടി. ഇതാദ്യമായിട്ടാണ് കേരളത്തില്‍ പ്രായപൂര്‍ത്തിയാകാത്തവരെ പോലീസ് കസ്റ്റഡിയില്‍ വിടുന്നത്.
കേസില്‍ സാക്ഷികള്‍ ഇല്ലാത്തതിനാലും മോഷണം പോയെന്ന് പറയുന്ന സ്വര്‍ണ്ണം പൂര്‍ണ്ണതോതില്‍ കണ്ടെത്താനാകാത്തതിനാലുമാണ് കസ്റ്റഡി പോലീസ് ആവശ്യപ്പെട്ടത്. സമൂഹത്തില്‍ പരസ്യമായി തെളിവെടുപ്പിന് കൊണ്ടുപോകുന്നത് കുട്ടികളുടെ ഭാവി സംബന്ധിക്കുന്ന ആശങ്ക കോടതി പങ്കുവെച്ചു. അതുകൊണ്ടാണ് അതീവ രഹസ്യമായി കുട്ടികളെ തെളിവെടുപ്പിന് കൊണ്ടുപോകണമെന്നും കുട്ടികള്‍ക്ക് മേല്‍ പോലീസ്മുറ പാടില്ലെന്നും കോടതി പറഞ്ഞത്. സാധാരണഗതിയില്‍ കുട്ടികളെ പോലീസിന്റെ ലോക്കപ്പിലും ജയിലിലും പാര്‍പ്പിക്കരുതെന്നാണ് ബാലനീതി പറയുന്നത്. കുട്ടികളെ പ്രതികള്‍ എന്ന് പോലും വിശേഷിപ്പിക്കാറില്ല.
Comments