തിരുവനന്തപുരം: സിഎംആര്‍എല്‍ - എക്‌സാലോജിക് കേസില്‍ മുന്‍ മുഖ്യമന്ത്രി പിണറായി വിജയനും മകളുടെ ഭര്‍ത്താവ് മുഹമ്മദ് റിയാസിനും മകള്‍ വീണയ്ക്കും എതിരേ കേസെടുക്കണമെന്ന് ആവശ്യപ്പെട്ട് ഡിജിപിയ്ക്ക് ഇ.ഡി.യുടെ കത്ത്. ഇവര്‍ക്കെതിരേ തെളിവുകള്‍ ഉണ്ടെന്നും പിഎംഎല്‍എ വകുപ്പില്‍ 66 (2) വകുപ്പുകള്‍ പ്രകാരം കേസെടുക്കണമെന്നുമാണ് കത്തില്‍ ആവശ്യപ്പെട്ടിരിക്കുന്നത്.
കേസില്‍ ഇ.ഡി. നടത്തുന്ന സുപ്രധാന നീക്കങ്ങളില്‍ ഒന്നാണ്. ഇന്ന് രാവിലെയാണ് കത്ത് നല്‍കിയത്. ഇനി കേസില്‍ നടപടിയിലേക്ക് നീങ്ങേണ്ടത് ആഭ്യന്തരവകുപ്പും പോലീസുമാണ്. മൂന്ന് പേര്‍ക്കെതിരേയും തെളിവുകള്‍ ഉണ്ടെന്ന് ഇ.ഡി. റിപ്പോര്‍ട്ടില്‍ പറയുന്നു. മൂന്ന് പേരെയും പ്രതികളാക്കി കേസെടുക്കണമെന്നാണ് ഇ.ഡി. പറയുന്നത്. വീണയ്ക്ക് സിഎംആര്‍എല്‍ ചെയ്യാത്ത സേവനത്തിന് പണം നല്‍കിയെന്നാണ് ആരോപണം. ഈ പണം മുഹമ്മദ് റിയാസിന്റെ തെരഞ്ഞെടുപ്പ് ഫണ്ടിലേക്ക് പോയിട്ടുണ്ടോ എന്നും അന്വേഷണം നടത്തിയിരുന്നു.
സിഎംആര്‍എല്‍ എംഡി. ശശിധരന്‍ കര്‍ത്തയുടെ മൊഴിയാണ് പിണറായിയ്ക്ക് എതിരേ ഉപയോഗിക്കുന്നത്. വീണയുടെ കമ്പനിക്ക് കരാര്‍ നല്‍കിയത് പിണറായിയുമായുള്ള അടുപ്പത്തിന്റെ പേരിലാണെന്നും പ്രത്യേക വൈദഗ്ദ്ധ്യം കണക്കാക്കി അല്ലെന്നുമാണ് ശശിധരന്‍ കര്‍ത്ത നേരത്തേ ഇ.ഡി.യ്ക്ക് നല്‍കിയ മൊഴി. ഇത് പിണറായി വഴിവിട്ട സഹായം ചെയ്തതിന്റെ പ്രത്യുപകാരമാണോ എന്നതും ഇ.ഡി. യുടെ അന്വേഷണ പരിധിയില്‍ ഉണ്ട്.
അഴിമതി നിരോധന നിയമപ്രകാരം ഇനി കേസെടുക്കുമോ എന്നാണ് അറിയേണ്ടത്. പാര്‍ട്ടിക്കുള്ളില്‍ രൂക്ഷമായ വിമര്‍ശനം നേരിടുന്ന സാഹചര്യത്തില്‍ പിണറായിക്ക് കേസ് വലിയ തിരിച്ചടിയാണ്. കേസെടുക്കുന്ന കാര്യത്തില്‍ നിര്‍ണ്ണായക തീരുമാനം എടുേക്കണ്ടത് സര്‍ക്കാരാണ്.
Comments