‘കൃത്രിമ വൈദ്യുതി ക്ഷാമമുണ്ടാക്കി കമ്മീഷൻ തട്ടാനാണോ?’; സർക്കാരിനെതിരെ എം.എം. മണി

ഇടുക്കി: സംസ്ഥാനത്തെ രൂക്ഷമായ വൈദ്യുതി പ്രതിസന്ധിയിൽ സർക്കാരിനെതിരെ വിമർശനവുമായി മുൻ വൈദ്യുതി മന്ത്രി എം.എം. മണി. സർക്കാരിന്റെ ദീർഘവീക്ഷണമില്ലായ്മയാണ് പ്രതിസന്ധിക്ക് കാരണമെന്ന് അദ്ദേഹം ആരോപിച്ചു.

സംസ്ഥാനത്ത് ഉത്പാദിപ്പിക്കുന്നത് 40 ശതമാനം വൈദ്യുതി മാത്രമാണ്. ബാക്കി 60 ശതമാനം വിവിധ കരാറുകളിലൂടെ വാങ്ങുകയാണ്. താൻ വൈദ്യുതി മന്ത്രിയായിരുന്ന കാലത്താണ് സമ്പൂർണ വൈദ്യുതീകരണം നടപ്പാക്കിയത്. വരാനിടയുള്ള പ്രതിസന്ധി നേരത്തെ തിരിച്ചറിഞ്ഞ് പരിഹാരം കാണേണ്ടത് സർക്കാരിന്റെ ഉത്തരവാദിത്തമാണെന്നും മണി പറഞ്ഞു.

വലിയ വെള്ളപ്പൊക്കമുണ്ടായപ്പോഴും മഴ കുറവായപ്പോഴും സംസ്ഥാനം വൈദ്യുതി പ്രതിസന്ധിയില്ലാതെ മുന്നോട്ടുപോയിട്ടുണ്ട്. എന്നാൽ ഇപ്പോഴത്തെ സാഹചര്യം കാണുമ്പോൾ കൃത്രിമ ക്ഷാമമുണ്ടാക്കി കമ്മീഷൻ തട്ടാനുള്ള നീക്കമാണോ സർക്കാർ നടത്തുന്നതെന്ന് സംശയമുണ്ടെന്നും മണി ആരോപിച്ചു.

ഉമ്മൻചാണ്ടി സർക്കാരിന്റെ കാലത്തെ വൈദ്യുതി കരാർ റദ്ദാക്കിയതാണ് പ്രതിസന്ധിക്ക് കാരണമെന്നാണ് കോൺഗ്രസ് പറയുന്നത്. എന്നാൽ കഴിഞ്ഞ പത്ത് വർഷം എങ്ങനെയാണ് പ്രതിസന്ധിയില്ലാതെ മുന്നോട്ടുപോയതെന്നും അദ്ദേഹം ചോദിച്ചു. കാര്യങ്ങൾ പഠിച്ച ശേഷമാണ് താൻ പറയുന്നതെന്നും മണി വ്യക്തമാക്കി.

വൈദ്യുതിക്കായി മഴയെയും ജലവൈദ്യുത പദ്ധതികളെയും മാത്രം ആശ്രയിക്കരുതെന്നും അദ്ദേഹം ഓർമിപ്പിച്ചു. മഴ കുറയാനുള്ള സാഹചര്യം മുൻകൂട്ടി കണ്ട് ദീർഘവീക്ഷണത്തോടെ സർക്കാർ പ്രവർത്തിക്കണം. ഇല്ലാത്ത പ്രതിസന്ധി സൃഷ്ടിച്ച് പുതിയ കരാറുകളിലൂടെ കമ്മീഷൻ തട്ടാനുള്ള നീക്കമാണോ നടക്കുന്നതെന്നും സംശയമുണ്ടെന്ന് മണി കൂട്ടിച്ചേർത്തു.