അടുക്കളയില്‍ ആവശ്യമായ സാധനങ്ങള്‍ കൃത്യമായി ക്രമീകരിക്കുന്നതും ആ ഇടം കാണാന്‍ ഭംഗിയുള്ളതാക്കുന്നതും വലിയൊരു മാറ്റമാണ് കൊണ്ടുവരുന്നത്. വിള്ളലുള്ള ചുമരുകളോ അഴുക്കും സാധനങ്ങളും നിറഞ്ഞ കൗണ്ടര്‍ടോപ്പോ ഉള്ള ഒരു അടുക്കളയിലേക്ക് നടന്നു കയറുന്നത് സങ്കല്‍പ്പിച്ച് നോക്കൂ; ശുചിത്വമില്ലായ്മ കൊണ്ടോ അല്ലെങ്കില്‍ അവിടെയുള്ള അലങ്കോലങ്ങള്‍ കാരണമായോ നിങ്ങള്‍ക്ക് അവിടെ പാചകം ചെയ്യാന്‍ തോന്നിയേക്കില്ല. അതിനാല്‍, നിങ്ങള്‍ അടുത്തിടെ പുതിയ വീട്ടിലേക്ക് മാറുകയോ അല്ലെങ്കില്‍ കുറച്ചുകാലമായി നിങ്ങളുടെ അടുക്കള ഒന്ന് പുതുക്കിയെടുക്കാന്‍ ആഗ്രഹിക്കുകയോ ചെയ്യുന്നുവെങ്കില്‍, കുറഞ്ഞ ചെലവില്‍ അത് ചെയ്യാനുള്ള ചില വഴികള്‍ ഇതാ. ഡ്രില്ലിംഗ് (തുളയ്ക്കല്‍) ആവശ്യമില്ലാത്ത ഷെല്‍ഫുകള്‍ മുതല്‍ ഒട്ടിക്കാവുന്ന വാള്‍പേപ്പറുകള്‍ (peel-and-stick wallpaper) വരെ നിരവധി ലളിതമായ മാറ്റങ്ങള്‍ നിങ്ങള്‍ക്ക് പരീക്ഷിക്കാവുന്നതാണ്.
* കൗണ്ടര്‍ടോപ്പില്‍ നിന്ന് തുടങ്ങാം - അടുക്കളയുടെ ഏറ്റവും ശ്രദ്ധാകേന്ദ്രമായ ഭാഗങ്ങളിലൊന്നാണിത്. അതിനാല്‍ കൗണ്ടര്‍ടോപ്പില്‍ വരുത്തുന്ന മാറ്റങ്ങള്‍ അടുക്കളയുടെ മൊത്തത്തിലുള്ള ലുക്കില്‍ വലിയ വ്യത്യാസം വരുത്തും. കൗണ്ടര്‍ടോപ്പില്‍ സാധനങ്ങള്‍ അലങ്കോലമായി കിടക്കുകയാണെങ്കില്‍, ചുമരു തുളയ്‌ക്കേണ്ടാത്ത ഫ്‌ലോട്ടിംഗ് ഷെല്‍ഫുകളോ ഒന്നിനു മുകളില്‍ ഒന്നായി വെക്കാവുന്ന സ്റ്റാക്കബിള്‍ സ്റ്റാന്‍ഡുകളോ ഉപയോഗിക്കാം. കൗണ്ടറില്‍ സ്ഥലം കുറവാണെങ്കിലും നിങ്ങള്‍ക്ക് ആഗ്രഹിച്ച രീതിയില്‍ മാറ്റങ്ങള്‍ വരുത്താന്‍ ഇത് സഹായിക്കും.
* ക്യാബിനറ്റ് ഹാന്‍ഡിലുകള്‍ മാറ്റാം - അടുക്കളയ്ക്ക് പെട്ടെന്ന് ഒരു പുതിയ ലുക്ക് നല്‍കാനുള്ള ബുദ്ധിപരമായ ഒരു വഴിയാണ് നിലവിലുള്ള ക്യാബിനറ്റ് ഹാന്‍ഡിലുകള്‍ മാറ്റുക എന്നത്. നിങ്ങളുടെ അടുക്കളയുടെ ശൈലിക്ക് ഇണങ്ങുന്ന പുതിയ ഡിസൈനുകളും ഫിനിഷിംഗും ഉള്ള ഹാന്‍ഡിലുകള്‍ തിരഞ്ഞെടുക്കാം. ഉദാഹരണത്തിന്, ബാര്‍ പുള്‍സ് (Bar pulls) അടുക്കളയ്ക്ക് മോഡേണ്‍ ലുക്ക് നല്‍കുമ്പോള്‍, ഡ്രോപ്പ് പുള്‍സ് (Drop pulls) ഒരു ആന്റിക് ലുക്ക് നല്‍കും.
* ചെറിയ വസ്തുക്കളിലൂടെ നിറങ്ങള്‍ കൊണ്ടുവരാം - പെയിന്റടിക്കാനോ ക്യാബിനറ്റുകള്‍ മാറ്റാനോ താല്പര്യമില്ലെങ്കില്‍ പാത്രങ്ങള്‍ തുടയ്ക്കുന്ന ടവലുകള്‍, ഭംഗിയുള്ള ഭരണികള്‍, ക്രോക്കറി സെറ്റുകള്‍, റണ്ണറുകള്‍ അല്ലെങ്കില്‍ ചെറിയ അലങ്കാര വസ്തുക്കള്‍ എന്നിവയിലൂടെ അടുക്കളയിലേക്ക് നിറങ്ങള്‍ കൂട്ടിച്ചേര്‍ക്കാം. വലിയ മാറ്റങ്ങള്‍ വരുത്താതെ തന്നെ അടുക്കളയ്ക്ക് ഒരു പുതുമ നല്‍കാന്‍ ഇത് എളുപ്പമുള്ള വഴിയാണ്.
* സംഭരണ രീതികള്‍ (Storage) പുനഃക്രമീകരിക്കാം - ചിലപ്പോള്‍ അടുക്കള നന്നായി ക്രമീകരിച്ചു വെക്കുന്നത് കൊണ്ടുമാത്രം അത് പുതിയതായി തോന്നും. ഷെല്‍ഫുകളും ക്യാബിനറ്റുകളും ഭംഗിയായി സൂക്ഷിക്കാനും സാധനങ്ങള്‍ എളുപ്പത്തില്‍ എടുക്കാനും ബാസ്‌ക്കറ്റുകള്‍, ഡിവൈഡറുകള്‍, പേരെഴുതിയ കണ്ടെയ്നറുകള്‍ എന്നിവ ഉപയോഗിക്കാം.
ബാക്ക്സ്പ്ലാഷ് (Backsplash) കൂട്ടിച്ചേര്‍ക്കാം - അടുക്കള മുഴുവനായി പൊളിച്ചു പണിയാതെ തന്നെ അതിന്റെ ഭംഗി കൂട്ടാന്‍ ഒരു പുതിയ ബാക്ക്സ്പ്ലാഷ് (അടുക്കളയിലെ കൗണ്ടറിന് മുകളിലുള്ള ചുമര്‍ ഭാഗം) സഹായിക്കും. ക്യാബിനറ്റുകള്‍ക്കും കൗണ്ടര്‍ടോപ്പിനും അനുയോജ്യമായ ടൈലുകളോ പാറ്റേണുകളോ ഫിനിഷുകളോ തിരഞ്ഞെടുക്കുക.
പ്രചാരത്തിലുള്ള ചില ബാക്ക്സ്പ്ലാഷ് ഡിസൈനുകള്‍ ഇവയാണ്:
സിറാമിക് അല്ലെങ്കില്‍ പോര്‍സലെയ്ന്‍ ടൈലുകള്‍
നാച്ചുറല്‍ സ്റ്റോണ്‍
സോളിഡ് സ്ലാബ്
ഗ്ലാസ് ടൈലുകള്‍
പീല്‍ ആന്റ് സ്റ്റിക് ടൈലുകള്‍ (ഒട്ടിക്കാവുന്ന ടൈലുകള്‍)
മെറ്റല്‍, സ്റ്റെയിന്‍ലെസ്സ് സ്റ്റീല്‍ ടൈലുകള്‍
സബ്വേ ടൈലുകള്‍, മൊസൈക്, ജ്യാമിതീയ ശൈലിയിലുള്ളവ (geometric), പാറ്റേണുകളുള്ളവ എന്നിവയാണ് ഇതില്‍ പ്രധാനപ്പെട്ട ചില ഡിസൈന്‍ മാതൃകകള്‍.
* നല്ലൊരു സുഗന്ധം കൊണ്ടുവരാം - പുതിയ ഫര്‍ണിച്ചറുകള്‍ കൂട്ടിച്ചേര്‍ക്കുന്നത് മാത്രമല്ല, അടുക്കളയില്‍ നല്ലൊരു സുഗന്ധം നല്‍കുന്നതും അതിന് പുതുമ നല്‍കും. ഇത് അടുക്കളയുടെ അന്തരീക്ഷം തന്നെ മാറ്റുകയും കൂടുതല്‍ ആകര്‍ഷകമാക്കുകയും ചെയ്യും. ചുറ്റും നല്ല സുഗന്ധമുള്ളപ്പോള്‍ പാചകം ചെയ്യാനും സന്തോഷം തോന്നും. പലരും ശ്രദ്ധിക്കാതെ പോകുന്ന ഏറ്റവും പ്രധാനപ്പെട്ട കാര്യങ്ങളിലൊന്നാണിത്.
* ക്യാബിനറ്റുകള്‍ക്ക് താഴെ ലൈറ്റിംഗ് നല്‍കാം - ചുമരിലെ ക്യാബിനറ്റുകള്‍ക്ക് താഴെ നല്‍കുന്ന ലളിതമായ ലൈറ്റുകള്‍ അടുക്കളയ്ക്ക് കൂടുതല്‍ വെളിച്ചം നല്‍കുകയും കൗണ്ടര്‍ടോപ്പും ബാക്ക്സ്പ്ലാഷും എടുത്തു കാണിക്കുകയും ചെയ്യും. അടുക്കളയിലെ ഇരുണ്ട മൂപ്പുകള്‍ക്ക് ഇത് വളരെ ഉപകാരപ്രദമായ ഒരു മാറ്റമാണ്.
Comments