ആളുകളാല്‍ ചുറ്റപ്പെട്ടിരിക്കുമ്പോഴും നിങ്ങള്‍ക്ക് എപ്പോഴെങ്കിലും ഒറ്റപ്പെടല്‍ തോന്നിയിട്ടുണ്ടോ? കൂട്ടുകാര്‍ക്കൊപ്പമിരിക്കുമ്പോഴോ, കുടുംബത്തോടൊപ്പം സമയം ചെലവഴിക്കുമ്പോഴോ, ഒരു പാര്‍ട്ടിയില്‍ പങ്കെടുക്കുമ്പോഴോ, അല്ലെങ്കില്‍ സഹപ്രവര്‍ത്തകര്‍ക്കൊപ്പം ജോലി ചെയ്യുമ്പോഴോ ഒക്കെ ഉള്ളില്‍ പൂര്‍ണ്ണമായും ഒറ്റപ്പെട്ടതായി നിങ്ങള്‍ക്ക് തോന്നിയേക്കാം. ഇത് നമ്മള്‍ വിചാരിക്കുന്നതിലും വളരെ സാധാരണമാണ്. ചുറ്റും ആരും ഇല്ലാത്തത് മാത്രമല്ല ഒറ്റപ്പെടല്‍. ആരും നിങ്ങളെ ശരിക്കും മനസ്സിലാക്കുന്നില്ല, കാണുന്നില്ല, അല്ലെങ്കില്‍ നിങ്ങള്‍ എന്താണ് അനുഭവിച്ചുകൊണ്ടിരിക്കുന്നത് എന്ന് അറിയുന്നില്ല എന്ന് തോന്നുന്നതിനെയാണ് പലപ്പോഴും ഒറ്റപ്പെടല്‍ എന്ന് പറയുന്നത്.
സാമൂഹികമായി അടുത്തിടപഴകുന്നത് എപ്പോഴും ഒറ്റപ്പെടല്‍ കുറയ്ക്കാത്തത് എന്തുകൊണ്ട്?
ഒറ്റപ്പെടല്‍ എന്നത് നമ്മുടെ ജീവിതത്തിലുള്ള ആളുകളുടെ എണ്ണത്തെക്കുറിച്ചല്ല, മറിച്ച് ആളുകളുമായുള്ള നമ്മുടെ ബന്ധങ്ങളുടെ ഗുണനിലവാരത്തെക്കുറിച്ചാണ് എന്ന് ഗവേഷണങ്ങള്‍ കാണിക്കുന്നു. ഫോണില്‍ നൂറുകണക്കിന് കോണ്‍ടാക്റ്റുകള്‍ ഉണ്ടെങ്കിലും നിങ്ങള്‍ക്ക് ഒറ്റപ്പെടല്‍ അനുഭവപ്പെടാം. മറുവശത്ത്, സ്വന്തം വ്യക്തിത്വം അതുപോലെ വെളിപ്പെടുത്താന്‍ കഴിയുന്ന ഒന്നോ രണ്ടോ ആളുകള്‍ കൂടെയുണ്ടെങ്കില്‍ പോലും അത് ശക്തമായ ബന്ധത്തിന്റെ അനുഭൂതി നല്‍കും. ചിലപ്പോള്‍ നമുക്ക് നഷ്ടപ്പെടുന്നത് കൂട്ടിരിക്കാന്‍ ആളുകളെ അല്ല, മറിച്ച് വൈകാരികമായ അടുപ്പമാണ് (emotional closeness).
മറ്റുള്ളവരുടെ ഇടയിലായിരിക്കുമ്പോഴും ഒരാള്‍ക്ക് ഒറ്റപ്പെടല്‍ തോന്നുന്നതിന് വിവിധ കാരണങ്ങളുണ്ട്. ചിലപ്പോള്‍ തള്ളിക്കളയപ്പെടുമോ, വിമര്‍ശിക്കപ്പെടുമോ, തെറ്റിദ്ധരിക്കപ്പെടുമോ എന്നൊക്കെ ഭയന്ന് നമ്മള്‍ സ്വയം ഉള്ളിലെ വികാരങ്ങളെ മറച്ചുവെക്കുന്നു. നമ്മള്‍ ചിരിക്കുകയും സംസാരിക്കുകയും ചര്‍ച്ചകളില്‍ പങ്കെടുക്കുകയും ചെയ്‌തേക്കാം, എന്നാല്‍ നമ്മുടെ യഥാര്‍ത്ഥ ചിന്തകളും വികാരങ്ങളും ഉള്ളില്‍ത്തന്നെ സൂക്ഷിക്കുന്നു. ലോകത്തിന് മുന്നില്‍ കാണിക്കുന്ന രൂപത്തെക്കുറിച്ച് മാത്രം ആളുകള്‍ അറിയുമ്പോള്‍, യഥാര്‍ത്ഥത്തില്‍ താന്‍ ആരാണെന്ന് ആര്‍ക്കും അറിയില്ലല്ലോ എന്ന ചിന്ത നമ്മളില്‍ ഒറ്റപ്പെടല്‍ ഉണ്ടാക്കുന്നു.
കഴിഞ്ഞകാല അനുഭവങ്ങള്‍ പ്രധാനമാണ്
കഴിഞ്ഞ കാല അനുഭവങ്ങള്‍ക്കും വലിയ പങ്കുണ്ടെന്ന് നൂപ്പൂര്‍ ചൂണ്ടിക്കാണിച്ചു. നിന്ദിക്കപ്പെടല്‍, വിമര്‍ശനം, വൈകാരികമായ അവഗണന, മാനസികാഘാതം അല്ലെങ്കില്‍ സുരക്ഷിതത്വം തോന്നാത്ത ബന്ധങ്ങള്‍ എന്നിവ അനുഭവിച്ചിട്ടുണ്ടെങ്കില്‍, മറ്റുള്ളവരെ വിശ്വസിക്കുന്നത് ബുദ്ധിമുട്ടായി മാറിയേക്കാം. നിങ്ങള്‍ക്ക് ആളുകളുമായി അടുക്കാന്‍ ആഗ്രഹമുണ്ടെങ്കിലും, അതേസമയം ഭയവും തോന്നാം. തഫലമായി, നിങ്ങള്‍ ആളുകളുമായി ശാരീരികമായി അടുപ്പത്തിലായിരിക്കുമെങ്കിലും വൈകാരികമായി അകന്നുനില്‍ക്കും.
ഒറ്റപ്പെടല്‍ തുടരുമ്പോള്‍ എന്ത് സംഭവിക്കും ?
ഒറ്റപ്പെടല്‍ സങ്കീര്‍ണ്ണമായ ഒരു ചക്രവും സൃഷ്ടിക്കും. ഒറ്റപ്പെടല്‍ അനുഭവപ്പെടുമ്പോള്‍, ആളുകള്‍ക്ക് നമ്മളെ ഇഷ്ടമല്ല അല്ലെങ്കില്‍ നമ്മളെ ആവശ്യമില്ല എന്നതിന്റെ ലക്ഷണങ്ങളോട് നമ്മള്‍ കൂടുതല്‍ സംവേദനക്ഷമതയുള്ളവരായി (sensitive) മാറിയേക്കാം. ഒരു കൂട്ടുകാരന്റെ ചെറിയൊരു മറുപടിയെക്കുറിച്ച് നമ്മള്‍ അമിതമായി ചിന്തിച്ചേക്കാം, വിളിച്ചില്ലെങ്കില്‍ വിഷമിച്ചേക്കാം, അല്ലെങ്കില്‍ നമ്മളെ മാറ്റിനിര്‍ത്തുകയാണെന്ന് കരുതിയേക്കാം. ചിലപ്പോള്‍ ഈ വികാരങ്ങള്‍ നമ്മളെ കൂടുതല്‍ പിന്‍വലിയാന്‍ പ്രേരിപ്പിക്കുന്നു, ഇത് നമുക്ക് ആവശ്യമുള്ള ബന്ധങ്ങള്‍ സ്ഥാപിക്കുന്നത് കൂടുതല്‍ പ്രയാസകരമാക്കുന്നു.
സോഷ്യല്‍ മീഡിയ ഈ വികാരത്തെ വര്‍ദ്ധിപ്പിക്കും. ആളുകള്‍ സുഹൃത്തുക്കളോടൊപ്പം ചിരിക്കുന്നതും യാത്ര ചെയ്യുന്നതും ആഘോഷിക്കുന്നതും സന്തോഷത്തോടെയിരിക്കുന്നതുമായ ചിത്രങ്ങള്‍ നമ്മള്‍ നിരന്തരം കണ്ടേക്കാം. ഇത് നമ്മളൊഴികെ മറ്റെല്ലാവര്‍ക്കും അര്‍ത്ഥവത്തായ ബന്ധങ്ങളുണ്ടെന്ന് തോന്നിപ്പിച്ചേക്കാം. എന്നാല്‍ ചിത്രങ്ങളും സോഷ്യല്‍ മീഡിയ പോസ്റ്റുകളും ആളുകളുടെ ജീവിതത്തിന്റെ പൂര്‍ണ്ണമായ യാഥാര്‍ത്ഥ്യം അപൂര്‍വ്വമായേ കാണിക്കാറുള്ളൂ.
ഒറ്റപ്പെടല്‍ തോന്നുന്നു എന്നതിനര്‍ത്ഥം നിങ്ങളില്‍ എന്തോ കുഴപ്പമുണ്ടെന്നല്ല. നിങ്ങള്‍ ദുര്‍ബലനോ, വിരസനോ, ആര്‍ക്കും ഇഷ്ടപ്പെടാത്തയാളോ ആണെന്നതിന്റെ ലക്ഷണവുമല്ല അത്. എന്തോ പ്രധാനപ്പെട്ടത് - അതായത് ബന്ധം, വ്യക്തിപരമായ ഐക്യം (belonging), അല്ലെങ്കില്‍ വൈകാരിക സുരക്ഷിതത്വം - നഷ്ടപ്പെട്ടിരിക്കുന്നു എന്നതിന്റെ ഒരു സൂചന മാത്രമാണ് ഒറ്റപ്പെടല്‍.
ഒറ്റപ്പെടലിനെ എങ്ങനെ നേരിടാം?
ഒറ്റപ്പെടലിന്റെ എതിര്‍പദം കൂടുതല്‍ ആളുകളാല്‍ ചുറ്റപ്പെട്ടിരിക്കുക എന്നതല്ല. മറിച്ച് വൈകാരികമായി ബന്ധപ്പെട്ടിരിക്കുക (connected) എന്നതാണ്. ചിലപ്പോള്‍ നമുക്ക് ആവശ്യമുള്ളത് മാസ്‌കുകള്‍ മാറ്റി, തുറന്നു സംസാരിക്കാനും, നമ്മള്‍ ആരാണോ അങ്ങനെതന്നെ സ്വീകരിക്കപ്പെടാനും കഴിയുന്ന ഒരൊറ്റ വ്യക്തിയെ മാത്രമാണ്. കാരണം, ചിലപ്പോള്‍ ലോകത്തിലെ ഏറ്റവും വലിയ ഒറ്റപ്പെടല്‍ എന്നത്, നിങ്ങളെ ശരിക്കും അറിയാത്ത ആളുകള്‍ നിറഞ്ഞ ഒരു മുറിയില്‍ ആയിരിക്കുക എന്നതാണ്.
Comments