സമാധാനം നിറയാന്‍ അച്ഛന്‍ കണ്ടെത്തിയ വഴി: ആറുമാസത്തിനുശേഷം വീട്ടിലെത്തിയ മകള്‍ കണ്ടത് പൂത്തുലഞ്ഞ പൂന്തോട്ടം

ഏറെ നാളുകൾക്ക് ശേഷം വീട്ടിലെത്തിയ മകൾ കണ്ട കാഴ്ചയാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. ഏകദേശം ആറുമാസത്തിന് ശേഷം വീട്ടിലെത്തിയ നിവേദിത തിവാരി കണ്ടത് നിറയെ പൂക്കളുമായി തഴച്ചുവളർന്ന പൂന്തോട്ടമാണ്. ഈ വർഷം മഴ കുറവായിരുന്നിട്ടും പൂന്തോട്ടം ഇത്ര മനോഹരമായി നിലനിർത്തിയത് അച്ഛന്റെ ചെടികളോടുള്ള സ്നേഹവും പരിചരണവുമാണെന്ന് നിവേദിത പറയുന്നു.

ചെടികളെ പരിപാലിക്കുന്നതിൽ അച്ഛന് പ്രത്യേക താൽപര്യമാണെന്നും നിവേദിത പങ്കുവെച്ചു. പുതിയ വീട്ടിന്റെ ഒരു കോണിൽ അച്ഛൻ നട്ടുവളർത്തിയ രാത്രിരാണി ചെടിയും പൂന്തോട്ടത്തിലെ പ്രത്യേക കാഴ്ചയാണ്. രാത്രി വീട് നിശ്ശബ്ദമാകുമ്പോൾ നേരിയ കാറ്റിനൊപ്പം രാത്രിരാണിയുടെ ചെറിയ പൂക്കളുടെ സുഗന്ധം വീട്ടിലാകെ നിറയാറുണ്ടെന്നും നിവേദിത പറയുന്നു.

ആ സുഗന്ധം ലഭിക്കുന്ന ആ ചെറിയ നിമിഷങ്ങൾ പോലും ജീവിതത്തിലെ തിരക്കുകളും വിഷമങ്ങളും മറക്കാൻ തന്നെ സഹായിക്കാറുണ്ടെന്നാണ് നിവേദിതയുടെ വാക്കുകൾ. അച്ഛന്റെ കൈകളിലൂടെ വളർന്ന പൂന്തോട്ടം തനിക്ക് ചെടികളുടെ കാഴ്ച മാത്രമല്ല, വീട്ടിലേക്കെത്തുമ്പോൾ ലഭിക്കുന്ന സമാധാനത്തിന്റെയും മനോഹരമായ ഓർമകളുടെയും ഭാഗമാണെന്നും അവർ പങ്കുവെച്ചു. കുറിപ്പ് സോഷ്യൽ മീഡിയയിൽ ശ്രദ്ധ നേടുകയാണ്.