ഇന്ത്യന്‍ സിനിമയിലെ ഏറ്റവും മികച്ച അഭിനേതാക്കളില്‍ ഒരാളായ ഉര്‍വശി തെന്നിന്ത്യയുടെ ലേഡി സൂപ്പര്‍സ്റ്റാര്‍ പദവിക്ക് ഏറെ അര്‍ഹയായ താരം കൂടിയാണ്. നാല് പതിറ്റാണ്ടിലേറെയായി സിനിമാലോകത്ത് നിറഞ്ഞുനില്‍ക്കുന്ന ഉര്‍വശി പകര്‍ന്നാടാത്ത വേഷങ്ങളും സ്വന്തമാക്കാത്ത പുരസ്‌കാരങ്ങളുമില്ല. ഉര്‍വശിയുടെ ഏറ്റവും പുതിയ സിനിമയായ ‘ആശ’യും പ്രേക്ഷകപ്രശംസ നേടി മുന്നേറകയാണ്. സിനിമയില്‍ അസാധാരണ അഭിനയ മുഹൂര്‍ത്തങ്ങള്‍ നല്‍കി ഉര്‍വശി ഞെട്ടിക്കുകയാണെന്നാണ് പ്രേക്ഷകര്‍ ഐക്യകണ്ഠേന പറയുന്നത്. സിനിമയുടെ വിജയത്തിനിടെ പ്രൊമോഷന്റെ ഭാഗമായുള്ള അഭിമുഖങ്ങളുടെ തിരക്കിലാണ് ഉര്‍വശി.
ഇപ്പോഴിതാ തനിക്കൊപ്പം അഭിനയിച്ച സിനിമകളിലൂടെ കരിയറില്‍ മാറ്റം വന്ന താരങ്ങളെക്കുറിച്ച് പറയുകയാണ് ഉര്‍വശി. ആശ കണ്ട പ്രേക്ഷകര്‍ തന്നോട് പറഞ്ഞ കാര്യങ്ങള്‍ പങ്കുവെയ്ക്കുന്നതിനിടെയാണ് കുഞ്ചാക്കോ ബോബന്‍, മീര ജാസ്മിന്, ജോജു ജോര്‍ജ് എന്നിവരുടെ കരിയറിനെക്കുറിച്ചും ഉര്‍വശി സംസാരിച്ചത്. തനിക്കൊപ്പം അഭിനയിച്ച സിനിമകള്‍ ഇവരുടെ കരിയറില്‍ കൊണ്ടു വന്ന മാറ്റത്തെക്കുറിച്ചാണ് ഉര്‍വശി പറഞ്ഞത്. ചിത്രത്തിൽ ഉർവശിയുടെ സാന്നിധ്യമില്ലായിരുന്നെങ്കിൽ മുത്തശ്ശിയും അമ്മയും മകളും കൊച്ചുമകളുമടങ്ങുന്ന കുടുംബപ്രേക്ഷകർ ജോജുവിന്റെ ഒരു ചിത്രം കാണാൻ തിയറ്ററിലേക്ക് എത്തില്ലായിരുന്നു എന്നാണ് കാണികൾ തന്നോട് പറഞ്ഞതെന്ന് ഉര്‍വശി പറയുന്നു.
‘‘ഞാനായിട്ട് അത് പറയുന്നില്ല, ഈ അടുത്ത സമയത്ത് ഒരു സംവിധായകൻ എന്നെ കണ്ടപ്പോൾ പറഞ്ഞു, ‘ഉര്‍വശി, കുഞ്ചാക്കോ ബോബൻ സിനിമ വിട്ട് റിയൽ എസ്റ്റേറ്റിൽ പോയപ്പോൾ ചാക്കോച്ചനെ വച്ച് ഈ പടം ചെയ്യണം എന്നു പറഞ്ഞു.’ കുഞ്ചാക്കോ ബോബനെക്കാൾ മൂന്നോ നാലോ വയസ്സ് വ്യത്യാസമേ ഒള്ളൂ എനിക്ക്. ‘നരേന്ദ്രൻ മകൻ ജയകാന്തൻ വക’ എന്ന സത്യന്റെ പടം ചെയ്തിട്ട് ഗ്യാപ്പ് എടുക്കാനായിരുന്നു ആഗ്രഹിച്ചത്. പ്രസവത്തിനു മുമ്പ് തമിഴുള്ള സിനിമകൾ തീർക്കണം എന്നിട്ട് സ്വസ്ഥമായി ഇരിക്കാനുളള തീരുമാനമായിരുന്നു. പക്ഷേ ജീവിതസാഹചര്യങ്ങൾകൊണ്ട് പറ്റിയില്ല.
ചാക്കോച്ചന്റെ റീഎൻട്രിക്ക് ‘സകുടുംബം ശ്യാമള’ എന്ന ഒരു സിനിമ കാരണമായി, ‘മമ്മി ആൻഡ് മി’ കാരണമായി. പിന്നെ ചാക്കോച്ചന് ഇതുവരെ തിരിഞ്ഞു നോക്കേണ്ടി വന്നിട്ടില്ല. അതിന് ശേഷം രണ്ട് മൂന്ന് തലമുറ നടന്മാര്‍ വന്നു. വളരെ ലാഘവത്തോടു കൂടി ചാക്കോച്ചന് വര്‍ക്ക് ചെയ്യുന്നു. എനിക്ക് വളരെ സന്തോഷമാണ്.
മീരാ ജാസ്മിന് കലക്‌ഷൻ ഇല്ലാത്ത പടങ്ങളും പേഴ്സണൽ ലൈഫിലെ ദുഃഖങ്ങളും ഒക്കെ ആയിരുന്ന സമയത്താണ് ‘അച്ചുവിന്റെ അമ്മ’യിൽ അഭിനയിക്കുന്നത്. പിന്നെ അവളുടെ ഒരു യാത്രയായിരുന്നു. അത് പലരും പറയും. കൂടെയുളളവരെ പ്രോത്സാഹിപ്പിക്കുന്നത് നമ്മുടെ ഹൃദയത്തിൽ നിന്നാണ്. അങ്ങനെയൊരു വലിയ നിരയെക്കുറിച്ച് പറഞ്ഞപ്പോൾ ശരിയാണല്ലോ എന്ന് തോന്നി.
ഇപ്പോൾ ‘ആശ’ കണ്ടപ്പോൾ പ്രേക്ഷകരൊക്കെ പറയുന്നത്, ജോജുവിനെ തങ്ങളുടെ കുടുംബ പ്രേക്ഷകർക്ക് തന്നത് ഉർവശിയാണെന്നാണ്. ഉർവശി ഇല്ലെങ്കിൽ ഞങ്ങൾ ജോജുവിന്റെ ഒരു പടത്തിന് അമ്മൂമ്മയും അമ്മയും മകളും മകളുടെ കുട്ടിയുമായിട്ട് വരില്ല എന്നാണ്. അങ്ങനെയൊരു ഘട്ടത്തിൽ ഉര്‍വശി, ജോജുവിന്റെ രക്ഷകയായി എത്തിയെന്ന് പറയുമ്പോൾ നമുക്ക് ഭയങ്കര അഭിമാനമല്ലേ, നമ്മൾ അറിയാതെ മനസ്സാ വാചാ ചിന്തിക്കാതെ ഈശ്വരൻ നമ്മളിലൂടെ മറ്റൊരാൾക്ക് വഴികാട്ടിയാകുന്നു. നമ്മൾ സഹയാത്രികർ മാത്രമാണ്. അതൊക്കെ ഒരു മഹാഭാഗ്യം...ഇത്തരം സിനിമകൾ നൽകുന്ന ആശ്വാസവും പ്രതീക്ഷയുമാണ് മൂന്നും നാലും തലമുറകളെ ഒരുമിച്ച് തിയറ്ററിലേക്ക് ആകർഷിക്കുന്നത്...’’ ഉര്‍വശി പറയുന്നു. സൈന സൗത്ത് പ്ലസിന് നല്‍കിയ അഭിമുഖത്തിലാണ് ഉര്‍വശിയുടെ ഈ തുറന്നു പറച്ചില്‍.
നവാഗതനായ സഫര്‍ സനല്‍ സംവിധാനം ചെയ്ത ‘ആശ’യില്‍ ഐശ്വര്യ ലക്ഷ്മി, ജോജു ജോർജ്, വിജയരാഘവൻ എന്നിവരും പ്രധാനവേഷത്തിൽ എത്തുന്നുണ്ട്. ഓരോ സിനിമ കഴിയുന്തോറും പെര്‍ഫോമന്‍സ് കൊണ്ട് ഞെട്ടിക്കുന്ന ഉര്‍വശിയുടെ ഏറ്റവും പുതിയ ചിത്രമായ ‘ആശ’യില്‍ കൊറിയൻ ഡാർക്ക് ത്രില്ലറുകളോടും ഇന്റർനാഷണൽ ക്രൈം ത്രില്ലറുകളോടും കിടപിടിക്കുന്ന പ്ലോട്ടും മേക്കിങ് സ്റ്റൈലുമാണുള്ളത്. ജെൻ-സി പ്രേക്ഷകരെപ്പോലും കൈയിലെടുത്ത സിനിമയില്‍ പ്രകടനങ്ങള്‍ കൊണ്ട് ഉർവശിയും ജോജു ജോര്‍ജ്ജും ഞെട്ടിച്ചിരിക്കുകയാണ്. ചില സന്ദർഭങ്ങളിൽ മാനസികനില തെറ്റിയെന്നു തോന്നിപ്പിക്കുന്ന വ്യക്തിയായും മറ്റു ചിലപ്പോള്‍ മക്കളെ ചേർത്തുപിടിക്കുന്നൊരമ്മയായും വേറെ സമയങ്ങളിൽ പൊലീസിനോടും നിയമ വ്യവസ്ഥയോടും ചങ്കൂറ്റത്തോടെ നിൽക്കുന്നൊരു കഥാപാത്രമായും ഏറെ ആഴത്തിലാണ് ഉർവശി ആശയെ സ്ക്രീനിൽ എത്തിച്ചിരിക്കുന്നത് എന്നാണ് ആരാധകര്‍ പറയുന്നത്.
Comments