ഗിരീഷ് എ.ഡി സംവിധാനം ചെയ്ത് നിവിൻ പോളി നായകനായി എത്തിയ ബെത്ലഹേം കുടുംബ യൂണിറ്റ് മുന്നൂറു കോടി ക്ലബ്ബും കടന്ന് പ്രേക്ഷകസ്വീകാര്യതയോടെയാണ് മുന്നേറുകയാണ്. നിവിൻ പോളിയുടെ കരിയറിലെ ഏറ്റവും മികച്ച വിജയമായി മാറിയ ചിത്രം മലയാളത്തിലെ ഏറ്റവും വേഗമേറിയ 300 കോടി ചിത്രമെന്ന അപൂർവ്വ നേട്ടവും സ്വന്തമാക്കിക്കഴിഞ്ഞു. സര്‍വ്വം മായയ്ക്ക് ശേഷം തിയേറ്ററുകളില്‍ നിവിന്‍ പോളി തരംഗം സൃഷ്ടിക്കുകയാണ് ഈ സിനിമ. നിവിന്‍ പോളി ഈസ് ബാക്ക് എന്ന സന്തോഷത്തിലാണ് ആരാധകര്‍.
ഇപ്പോഴിതാ ‘ബെത്ലഹേം കുടുംബ യൂണിറ്റ്’ സിനിമ ഒരുപാട് ഇഷ്ടമായെന്ന് പറയുകയാണ് തമിഴ് സംഗീത സംവിധായകൻ ജി.വി. പ്രകാശ് കുമാർ. നിവിൻ പോളി ഫ്രെയിമിൽ നിൽക്കുമ്പോൾ മറ്റൊന്നിലേക്കും നോക്കാനാകില്ലെന്നും വളരെ ചാമിംഗായ നടനാണ് നിവിനെന്നും ജി.വി. പ്രകാശ് പറഞ്ഞു. മമിത ബൈജു ഇനിയും ഉയരങ്ങളിലേക്ക് പോകാൻ കഴിവുള്ള നടിയാണെന്നും താരം പറഞ്ഞു.
‘‘അടുത്തിടെ ‘ബെത്ലഹേം കുടുംബ യൂണിറ്റ്’ സിനിമ കണ്ടു. എനിക്ക് ഒരുപാട് ഇഷ്ടമായി. നിവിൻ അടിപൊളിയായി ചെയ്തു. ഞാൻ അദ്ദേഹത്തെ ഫോൺ വിളിച്ചുപറഞ്ഞു. നിങ്ങൾ ബെസ്റ്റ് ഫോമിലിരിക്കുമ്പോൾ ഫ്രെയിമിന് ചുറ്റുമുള്ളതൊന്നും കാണാൻ കഴിയില്ല, നിങ്ങളെ മാത്രം നോക്കി നിൽക്കും’ എന്ന്. നിവിൻ പോളി ഭയങ്കര ചാം ഉള്ള നടനാണ്.
മമിതയാണെങ്കിലും കഠിനാധ്വാനം ചെയ്യുന്ന നടിയാണ്. അതുപോലെതന്നെ നല്ല എളിമയുമാണ്. അവരുടെ കഴിവുകൊണ്ടാണ് ഈ നിലയിലെത്തിയിരിക്കുന്നത്. അവർ ഇനിയും ഉയരങ്ങളിലെത്തും എന്ന് എനിക്ക് ഉറപ്പാണ്. ഇതിഹാസ താരമാകാനുള്ള എല്ലാ കഴിവും മമിതയ്ക്കുണ്ട്...’’ ജി.വി.പ്രകാശ് പറഞ്ഞു. സിനിമ വികടന് നല്‍കിയ അഭിമുഖത്തിലാണ് താരമിത് പറഞ്ഞത്.
നിവിൻ പോളിക്കൊപ്പം ഈ സിനിമയില്‍ നായികയായി എത്തുന്നത് മമിത ബൈജുവാണ്. സംഗീത് പ്രതാപ്, സുരേഷ് കൃഷ്ണ, ബിന്ദു പണിക്കർ, വിനയ് ഫോർട്ട്, റോഷൻ ഷാനവാസ്, ശ്യാം മോഹൻ, ഷമീർ ഖാൻ, ശ്രിന്ദ, പാർവതി അയ്യപ്പദാസ്, മീനാക്ഷി രവീന്ദ്രൻ തുടങ്ങി വലിയൊരു താരനിരയും ചിത്രത്തിലുണ്ട്. കേരളത്തിന് പുറമെ തമിഴ്‌നാട്, ആന്ധ്ര-തെലങ്കാന മേഖലകളിലും ജിസിസി രാജ്യങ്ങളിലും ചിത്രത്തിന് മികച്ച പ്രതികരണമാണ് ലഭിച്ചു കൊണ്ടിരിക്കുന്നത്. ഭാവന സ്റ്റുഡിയോസിന്റെ ബാനറിൽ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവര്‍ ചേര്‍ന്നാണ് സിനിമ നിര്‍മ്മിച്ചിരിക്കുന്നത്.
Comments