കരയിൽ നിന്ന് ആയിരക്കണക്കിന് മൈലുകൾ അകലെ, വിശാലമായ കടലിൽ അപ്രതീക്ഷിതമായി അച്ഛനും മകനും കണ്ടുമുട്ടിയ അപൂർവ നിമിഷമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ഇരുവരും നാവികരാണ്. വ്യത്യസ്ത കപ്പലുകളിലായി എതിർദിശകളിൽ സഞ്ചരിക്കുന്നതിനിടെയാണ് അപ്രതീക്ഷിതമായി ഇരുവരുടെയും പാത കടലിൽ വെച്ച് ഒന്നിച്ചത്. മകൻ റുഷീൽ സരൺ തന്നെയാണ് ഹൃദയസ്പർശിയായ ഈ കൂടിക്കാഴ്ചയുടെ വീഡിയോ ഇൻസ്റ്റഗ്രാമിൽ പങ്കുവച്ചത്.
വടക്കോട്ട് സഞ്ചരിക്കുകയായിരുന്ന കപ്പലിലായിരുന്നു റുഷീൽ. ഇതിനിടെ എതിർദിശയിൽ മറ്റൊരു വലിയ കപ്പൽ അടുത്തുവരുന്നത് ശ്രദ്ധയിൽപ്പെട്ടു. കപ്പലിന്റെ വിവരങ്ങളും യാത്രാ റൂട്ടും പരിശോധിച്ചപ്പോഴാണ് അതിൽ തന്റെ അച്ഛനാണെന്ന് റുഷീൽ തിരിച്ചറിഞ്ഞത്. തെക്കോട്ട് സഞ്ചരിക്കുകയായിരുന്ന അച്ഛന്റെ കപ്പൽ തന്റേതിന് നേരെ വരികയായിരുന്നു. ഇതോടെയാണ് കടലിന്റെ നടുവിൽ അച്ഛനും മകനും തമ്മിലുള്ള അപൂർവ കൂടിക്കാഴ്ചയ്ക്ക് വഴിയൊരുങ്ങിയത്.
മുൻകൂട്ടി ആസൂത്രണം ചെയ്തതായിരുന്നില്ല ഈ കൂടിക്കാഴ്ച. ഓരോരുത്തരും സ്വന്തം യാത്രകളുമായി മുന്നോട്ട് പോകുന്നതിനിടെയാണ് ഒരേ കടൽപ്പാതയിൽ ഇരുവരും അപ്രതീക്ഷിതമായി കണ്ടുമുട്ടിയത്. തന്റെ ജീവിതത്തിലെ ഏറ്റവും അവിസ്മരണീയമായ നിമിഷങ്ങളിലൊന്നായാണ് റുഷീൽ ഈ കൂടിക്കാഴ്ചയെ വിശേഷിപ്പിച്ചത്. രണ്ട് തലമുറകളിലെ നാവികർ, രണ്ട് കപ്പലുകൾ, രണ്ട് യാത്രകൾ; എന്നാൽ കടലിന്റെ നടുവിൽ ഒരുമിച്ച നിമിഷം എന്നായിരുന്നു വീഡിയോയ്ക്കൊപ്പമുള്ള കുറിപ്പിന്റെ ആശയം.
വീഡിയോ പുറത്തുവന്നതിന് പിന്നാലെ നിരവധി പേരാണ് അച്ഛന്റെയും മകന്റെയും കൂടിക്കാഴ്ചയെ ഹൃദയസ്പർശിയായ നിമിഷമെന്ന് വിശേഷിപ്പിച്ചത്. അച്ഛന്റെ മുഖത്തെ സന്തോഷവും അഭിമാനവും വ്യക്തമാണെന്ന് ചിലർ അഭിപ്രായപ്പെട്ടു. ജീവിതത്തിൽ അപൂർവമായി മാത്രം സംഭവിക്കുന്ന ഇത്തരം കൂടിക്കാഴ്ചകളിലൊന്നാണിതെന്നും നിരവധി പേർ കുറിച്ചു. അച്ഛനും മകനും ഒരേ തൊഴിൽ തിരഞ്ഞെടുത്തതും വിശാലമായ സമുദ്രത്തിന്റെ നടുവിൽ അപ്രതീക്ഷിതമായി വീണ്ടും ഒന്നിച്ചതുമാണ് ഈ വീഡിയോയെ കൂടുതൽ ശ്രദ്ധേയമാക്കിയത്.
Comments