ലണ്ടൻ: ക്രിമിനൽ ഡിഫൻസ് അഭിഭാഷകയാകണമെന്ന ആഗ്രഹത്തോടെ കരിയർ ആരംഭിച്ച ബ്രിട്ടീഷ് യുവതി ഒടുവിൽ നിയമരംഗത്തെ ജോലി ഉപേക്ഷിച്ച് തിരഞ്ഞെടുത്തത് നായകളെ നടത്തിക്കൊണ്ടുപോകുന്ന ജോലി. 30-കാരിയായ ലിസ് ഈസ്റ്റാണ് വ്യത്യസ്തമായ കരിയർ മാറ്റത്തിലൂടെ ശ്രദ്ധ നേടുന്നത്. ഇപ്പോൾ സ്വന്തമായി ഡോഗ് വാക്കിങ് ബിസിനസ് നടത്തുന്ന ലിസ്, മുമ്പത്തേക്കാൾ കൂടുതൽ വരുമാനം ലഭിക്കുന്നതിനൊപ്പം കുറച്ച് സമയം മാത്രമാണ് ജോലി ചെയ്യുന്നതെന്നും പറയുന്നു.
ക്രിമിനൽ ഡിഫൻസ് രംഗത്ത് നാല് വർഷത്തോളം പാരാലീഗലായി ജോലി ചെയ്ത ലിസ് പിന്നീട് കൺസൾട്ടിങ് മേഖലയിലേക്കും മാറിയിരുന്നു. ദിവസവും 12 മണിക്കൂറിലധികം ജോലി ചെയ്യേണ്ടി വന്നിരുന്നെന്നും ലണ്ടനിലേക്കും തിരിച്ചുമുള്ള യാത്രയ്ക്ക് രണ്ട് മണിക്കൂറോളം വേണ്ടിവന്നിരുന്നെന്നും അവർ പറയുന്നു. ജോലി കഴിഞ്ഞുള്ള സാമൂഹിക പരിപാടികളും കോർപ്പറേറ്റ് മേഖലയിലെ മറ്റ് പ്രതീക്ഷകളും കാരണം പലപ്പോഴും രാത്രി ഒമ്പതോ പത്തോ മണിയോടെയാണ് വീട്ടിലെത്തിയിരുന്നതെന്നും ലിസ് വ്യക്തമാക്കി.
ഭർത്താവ് ഡോഗ് വാക്കിങ്, ഡോഗ് ബോർഡിങ് മേഖലയിൽ ജോലി ചെയ്യുന്നതും ആ ജോലി ആസ്വദിക്കുന്നതും കണ്ടതോടെയാണ് തന്റെ കരിയറിനെക്കുറിച്ച് ലിസ് വീണ്ടും ചിന്തിച്ചത്. തുടർന്ന് ജോലി ഉപേക്ഷിച്ച് ഒരു വാൻ വാങ്ങി ഡോഗ് വാക്കിങ് ബിസിനസ് ആരംഭിച്ചു. ഇപ്പോൾ ഒരു ദിവസം ഏകദേശം 20 മുതൽ 30 വരെ നായകളെ നാല് ട്രിപ്പുകളിലായി നടത്തിക്കൊണ്ടുപോകുന്നുണ്ട്. ഒരു നായയ്ക്ക് മണിക്കൂറിന് ഏകദേശം 19 ഡോളർ ഈടാക്കുന്ന ലിസിന് ദിവസത്തിൽ 400 മുതൽ 530 ഡോളർ വരെ, അതായത് ഏകദേശം 38,000 മുതൽ 50,000 രൂപ വരെ വരുമാനം ലഭിക്കുന്നതായി റിപ്പോർട്ട് പറയുന്നു.
നിയമരംഗത്തെ ജോലി ഉപേക്ഷിച്ചതിനെ ചിലർ വിമർശിച്ചെങ്കിലും തീരുമാനം തനിക്ക് ഒട്ടും ഖേദമുണ്ടാക്കിയിട്ടില്ലെന്നാണ് ലിസ് പറയുന്നത്. കോർപ്പറേറ്റ് ജോലിയിൽ ലഭിച്ചതിനേക്കാൾ മാസത്തിൽ ആയിരക്കണക്കിന് പൗണ്ട് അധികം ഇപ്പോൾ സമ്പാദിക്കുന്നുണ്ടെന്നും, മുമ്പ് ജോലി ചെയ്തിരുന്നതിന്റെ പകുതി സമയമേ ഇപ്പോൾ ജോലി ചെയ്യേണ്ടിവരുന്നുള്ളൂവെന്നും അവർ പറഞ്ഞു. എന്നാൽ കൂടുതൽ പണം ലഭിക്കുന്നതിനായി മാത്രം ഡോഗ് വാക്കിങ് തിരഞ്ഞെടുക്കരുതെന്നും നായകളോടൊപ്പം പുറത്തു സമയം ചെലവഴിക്കാൻ ഇഷ്ടമുള്ളവർക്ക് മാത്രമേ ഈ ജോലി തിരഞ്ഞെടുക്കാവൂവെന്നും ലിസ് കൂട്ടിച്ചേർത്തു.
Comments