തിരുവനന്തപുരം: സി.എം.ആര്‍.എല്‍.-എക്‌സാലോജിക് ഇടപാടില്‍ അന്വേഷണം പ്രഖ്യാപിച്ചെങ്കിലും നടപ്പാക്കാന്‍ വൈകിയാല്‍ ഇ.ഡി. ഹൈക്കോടതിയെ സമീപിച്ചേക്കും. കേസില്‍ ആദ്യഘട്ട കുറ്റപത്രം സമര്‍പ്പിക്കാന്‍ ഒരുങ്ങുന്ന ഇ.ഡി. അന്വേഷണവും എഫ്.ഐ.ആറും വൈകിയാല്‍ കോടതിയില്‍ എത്താന്‍ ഇ.ഡി.യ്ക്ക് അധികാരമുണ്ടെന്ന സുപ്രീം കോടതി മുന്‍വിധിയെ അടിസ്ഥാനപ്പെടുത്തിയാണ് തയ്യാറെടുക്കല്‍.
ഇ.ഡി.യുടെ റിപ്പോര്‍ട്ടില്‍ അന്വേഷണം പ്രഖ്യാപിച്ചെങ്കിലും അതിന്റെ റിപ്പോര്‍ട്ടില്‍ നിയമോപദേശം അനുസരിച്ചായിരിക്കും കേസെടുക്കുന്ന കാര്യത്തില്‍ പോലീസ് തീരുമാനം എടുക്കുക. സംസ്ഥാന പോലീസ് എഫ്.ഐ.ആര്‍. ഇടുകയാണെങ്കില്‍ അഴിമതി നിരോധന നിയമപ്രകാരം ഇ.ഡി.ക്ക് കേസ് റീ-രജിസ്റ്റര്‍ ചെയ്ത് അന്വേഷണവുമായി മുന്നോട്ടു പോകാനാകും. പിണറായി വിജയനും മുഹമ്മദ് റിയാസിനും എതിരേയുള്ള ഇ.ഡി. റിപ്പോര്‍ട്ടില്‍ അന്വേഷണമാകാം എന്ന് ആഭ്യന്തര വകുപ്പ് തീരുമാനിച്ചെങ്കിലും, ഇതുസംബന്ധിച്ച ഫയലുകള്‍ കൈമാറിയിട്ടില്ല.
നേരിട്ട് എഫ്.ഐ.ആര്‍. രജിസ്റ്റര്‍ ചെയ്യണമോ ക്രൈംബ്രാഞ്ചിന്റെ നേതൃത്വത്തിലുള്ള അന്വേഷണം വേണോ അതോ അന്വേഷണം നടത്തേണ്ടത് സാമ്പത്തിക കുറ്റകൃത്യ വിഭാഗമാണോ എന്നത് ഉള്‍പ്പെടെ കാര്യത്തില്‍ വ്യക്തത ഇല്ലാത്ത സാഹചര്യത്തില്‍ അന്വേഷണം സംബന്ധിച്ച തീരുമാനം നീളുകയാണ്. സംസ്ഥാന പോലീസ് എഫ്.ഐ.ആര്‍. രജിസ്റ്റര്‍ ചെയ്യാന്‍ കാലതാമസം വരുത്തിയാല്‍ നിയമനടപടികളുമായി ഹൈക്കോടതിയെ സമീപിക്കാന്‍ ഇ.ഡി. ആലോചിക്കുന്നുണ്ട്.
ഇ.ഡി. കേസുകളെ ഇടതുപക്ഷവും കോണ്‍ഗ്രസും ഒരുപോലെ എതിര്‍ക്കുന്ന സാഹചര്യത്തില്‍ കേസിലെ മെല്ലെപ്പോക്ക് ഇ.ഡി. പ്രതീക്ഷിക്കുന്നത് തന്നെയാണ്. കോണ്‍ഗ്രസ് കേന്ദ്രനേതൃത്വം രൂക്ഷ വിമര്‍ശനത്തിന് വിധേയമാക്കുന്ന ഏജന്‍സിയാണ് ഇ.ഡി. രാഷ്ട്രീയ എതിരാളികളെ ഒതുക്കാനും ഭയപ്പെടുത്താനും കേന്ദ്രസര്‍ക്കാര്‍ ഉപയോഗിക്കുന്ന ഏജന്‍സിയാണ് ഇ.ഡി. എന്നാണ് കോണ്‍ഗ്രസ് ദേശീയനേതൃത്വത്തിന്റെ അഭിപ്രായം. ഇ.ഡി. കൊണ്ടുവരുന്ന കേസുകളെ രാഷ്ട്രീയപ്രേരിതം എന്നാണ് ഇടതുപക്ഷം എല്ലാക്കാലത്തും വിമര്‍ശിക്കുന്നത്.
സിഎംആര്‍എല്‍ - എക്‌സാലോജിക് കേസില്‍ ഇ.ഡി. കത്തു നല്‍കിയപ്പോള്‍ തന്നെ എടുത്തുചാടി തീരുമാനം എടുക്കാന്‍ സംസ്ഥാന സര്‍ക്കാര്‍ തയ്യാറായില്ല. പകരം അന്വേഷണം ഉയര്‍ത്താവുന്ന രാഷ്ട്രീയ പ്രതിരോധമൊക്കെ കണക്കിലെടുത്തായിരുന്നു നീക്കം. ഇ.ഡി. നല്‍കുന്ന റിപ്പോര്‍ട്ടിനെ കണ്ണുമടച്ച് വിശ്വസിക്കാനില്ലെന്നാണ് കോണ്‍ഗ്രസ് നേതാക്കള്‍ ഇപ്പോഴും പറയുന്നത്. ഇക്കാര്യത്തില്‍ നിയമോപദേശം തേടിയതും ഇ.ഡി.യ്ക്ക് എതിരേയുള്ള ദേശീയനേതൃത്വത്തിന്റെ നിലപാടിനെ കണക്കിലെടുത്തായിരുന്നു.
Comments