ക്വീന്‍സ് ലാന്റ്: ഇന്ത്യയുമായുള്ള മത്സരത്തിന് കേവലം ഒരാഴ്ച മാത്രം ബാക്കി നില്‍ക്കേ ബ്രസീലിന് സമനില. ലോകകപ്പ് ടീമായ ഓസ്‌ട്രേലിയയുമായുള്ള സൗഹൃദ മത്സരത്തില്‍ കളിയുടെ അവസാന മിനിറ്റില്‍ കിട്ടിയ ഗോളുമായി രക്ഷപ്പെടുകയായിരുന്നു മുന്‍ ലോകചാംപ്യന്മാര്‍.
കളിയുടെ അറുപത്തെട്ടാം മിനിറ്റില്‍ നെസ്‌റ്റോറി ഇറാന്‍കുണ്ടയുടെ ഗോളിലൂടെ മുന്നിലെത്തിയ ഓസ്‌ട്രേലിയയെ അവസാന ഇഞ്ചുറിടൈമില്‍ റഫീഞ്ഞയുടെ അസിസ്റ്റില്‍ റയാന്‍ ഗോള്‍ നേടുകയായിരുന്നു. ഒക്‌ടോബര്‍ 3 നാണ് ബ്രസീല്‍ ഇന്ത്യയുമായി സൗഹൃദമത്സരത്തില്‍ ഏറ്റുമുട്ടുന്നത്. കൊല്‍ക്കത്തയിലെ സാള്‍ട്ട്‌ലേക്കിലാണ് മത്സരം.
ഇന്നലെ നടന്ന പാനമയുമായി നടന്ന മത്സരത്തില്‍ ഇന്ത്യ ലോകകപ്പ് ടീമിനെ ഒരുഗോള്‍ സമനിലയില്‍ തളച്ചിരുന്നു. ബംഗലുരുവിലെ ശ്രീകണ്ഠീരവ സ്‌റ്റേഡിയത്തില്‍ നടന്ന മത്സരത്തില്‍ ഓസ്‌ട്രേലിയന്‍ വംശജന്‍ വില്യംസ് വഴി ആദ്യം ഗോളിട്ടത് ഇന്ത്യയായിരുന്നു. എന്നാല്‍ രണ്ടാം പകുതിയില്‍ ഒമര്‍ വലന്‍സിയയുടെ ഒരു ലോംഗ്‌റേഞ്ചര്‍ പാനമയ്ക്ക് സമനില നല്‍കുകയായിരുന്നു.
ഫിഫ ലോകകപ്പില്‍ കളിച്ച 14 താരങ്ങളുമായിട്ടാണ് 44-ാം റാങ്കിലുള്ള പനാമ ഈ മത്സരത്തിനിറങ്ങിയത്. എങ്കിലും ഇന്ത്യന്‍ പ്രതിരോധം മികച്ച രീതിയില്‍ പിടിച്ചുനിന്നു. ഓസ്‌ട്രേലിയന്‍ പൗരത്വം ഉപേക്ഷിച്ച് ഇന്ത്യക്കായി കളിക്കുന്ന റയാന്‍ ഡെയ്ല്‍ വില്യംസിന്റെ ഗോളില്‍ ഇന്ത്യ ആദ്യ പകുതിയില്‍ ലീഡ് നേടി. മത്സരത്തിന്റെ ആദ്യ പകുതി അവസാനിക്കാന്‍ അഞ്ച് മിനിറ്റ് ബാക്കിനില്‍ക്കെയാണ് ആകാശ് മിശ്ര കൊടുത്ത ഒരു ലോംഗ്‌ബോള്‍ സ്വീകരിച്ചാണ് റയാന്‍ വില്യംസ് ലക്ഷ്യം കണ്ടത്. അമ്മ വഴി ഇന്ത്യന്‍ വേരുകളുള്ള താരമാണ് അദ്ദേഹം.
പെര്‍ത്തില്‍ ജനിച്ച റയാന്‍ വില്യംസ്, ഇന്ത്യക്ക് കളിക്കാന്‍ ഓസ്‌ട്രേലിയന്‍ പാസ്പോര്‍ട്ട് ഉപേക്ഷിക്കുകയായിരുന്നു. ഇന്ത്യന്‍ നിയമപ്രകാരം ഇരട്ട പൗരത്വം അനുവദനീയമല്ലാത്തതിനാല്‍, ദേശീയ ടീമില്‍ കളിക്കാന്‍ വിദേശ പാസ്പോര്‍ട്ട് ഔദ്യോഗികമായി ഉപേക്ഷിക്കേണ്ടതുണ്ട്. ഈ കടമ്പ കടന്ന് ഇന്ത്യക്കായി കളിക്കുന്ന രണ്ടാമത്തെ വിദേശ വംശജനായ ഫുട്‌ബോള്‍ താരമാണ് വില്യംസ്.
Comments