ഗുരുഗ്രാമിലെ ഗോൾഫ് കോഴ്സ് റോഡിൽ ആഡംബര സ്പോർട്സ് കാറുമായി അപകടകരമായ രീതിയിൽ അഭ്യാസം നടത്തിയെന്ന ആരോപണത്തിൽ പോലീസ് അന്വേഷണം ആരംഭിച്ചു. തിരക്കേറിയ റോഡിലൂടെ അതിവേഗത്തിൽ കാർ വെട്ടിത്തിരിക്കുകയും വളച്ചോടിക്കുകയും ചെയ്യുന്ന ദൃശ്യങ്ങളാണ് സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. റോഡിലൂടെ മറ്റ് വാഹനങ്ങൾ സഞ്ചരിക്കുന്നതിനിടെയായിരുന്നു യുവാവിന്റെ അഭ്യാസമെന്നാണ് ദൃശ്യങ്ങളിൽനിന്ന് വ്യക്തമാകുന്നത്.
കാറിന്റെ നിയന്ത്രണം മനഃപൂർവം മാറ്റി വട്ടത്തിൽ തിരിക്കുന്ന തരത്തിലുള്ള അപകടകരമായ അഭ്യാസമാണ് യുവാവ് നടത്തിയതെന്നാണ് പോലീസ് പറയുന്നത്. ഇതുമൂലം സമീപത്തുണ്ടായിരുന്ന മറ്റ് വാഹനങ്ങളിലെ യാത്രക്കാർക്കും അപകടസാധ്യത ഉണ്ടായിരുന്നുവെന്നും അധികൃതർ ചൂണ്ടിക്കാട്ടി. സംഭവത്തിന്റെ ദൃശ്യങ്ങൾ ചില യുവാക്കൾ ചിത്രീകരിച്ച് സമൂഹമാധ്യമങ്ങളിൽ പങ്കുവച്ചതോടെയാണ് സംഭവം പോലീസിന്റെ ശ്രദ്ധയിൽപ്പെട്ടത്.
ദൃശ്യങ്ങൾ ശ്രദ്ധയിൽപ്പെട്ടതോടെ വാഹനത്തിന്റെ രജിസ്ട്രേഷൻ നമ്പർ ഉപയോഗിച്ചാണ് പോലീസ് അന്വേഷണം ആരംഭിച്ചത്. വാഹനത്തിന്റെ ഉടമയെ കണ്ടെത്തുകയും സംഭവസമയത്ത് കാർ ഓടിച്ചിരുന്നത് ആരാണെന്ന് സ്ഥിരീകരിക്കുകയും ചെയ്യാനുള്ള ശ്രമത്തിലാണ് അധികൃതർ. പൊതുനിരത്തിൽ ഇത്തരം അപകടകരമായ അഭ്യാസങ്ങൾ അനുവദിക്കില്ലെന്നും നിയമലംഘനം നടത്തിയവർക്കെതിരെ നടപടി സ്വീകരിക്കുമെന്നും മുതിർന്ന പോലീസ് ഉദ്യോഗസ്ഥൻ വ്യക്തമാക്കി.
സംഭവത്തിന്റെ ദൃശ്യങ്ങൾ പുറത്തുവന്നതിന് പിന്നാലെ സമൂഹമാധ്യമങ്ങളിലും നിരവധി പ്രതികരണങ്ങളാണ് ഉയരുന്നത്. പൊതുനിരത്തുകൾ അഭ്യാസപ്രകടനങ്ങൾക്ക് ഉപയോഗിക്കുന്നത് മറ്റ് യാത്രക്കാരുടെ സുരക്ഷയ്ക്ക് വലിയ ഭീഷണിയാണെന്നാണ് ഉയരുന്ന വിമർശനം. അതേസമയം, കാർ ഓടിച്ച യുവാവിനെ കണ്ടെത്താനുള്ള പോലീസ് അന്വേഷണം പുരോഗമിക്കുകയാണ്.
Comments