തിരുവനന്തപുരം: കോണ്‍ഗ്രസിലെ ഗ്രൂപ്പ് പോരിന് ആക്കം കൂട്ടി കെ.സി.വേണുഗോപാല്‍ പക്ഷത്തിനെതിരേ വിമര്‍ശനം. അമിത്ഷായ്ക്ക് എതിരേ കൊല്ലത്തെ യുത്ത്‌കോണ്‍ഗ്രസ് പ്രതിഷേധമാണ് പുതിയ വിഷയമായി മാറിയിരിക്കുന്നത്. ഉറങ്ങിക്കിടന്ന ബിജെപിയെ ഉണര്‍ത്താനും സംസ്ഥാനമന്ത്രിമാര്‍ക്കെതിരേ നടക്കുന്ന കരിങ്കൊടി പ്രതിഷേധത്തിനും കാരണമായെന്നാണ് വിമര്‍ശനം.
ബിനു ചുള്ളിയലിന്റെ നേതൃത്വത്തില്‍ കൊല്ലത്ത് ആഭ്യന്തരമന്ത്രി അമിത് ഷായ്ക്കുനേരെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി പ്രതിഷേധം നടത്തിയിരുന്നു. സംഭവത്തിന് പിന്നാലെ സംസ്ഥാനത്തെ മന്ത്രിമാര്‍ക്ക് നേരെ യുവമോര്‍ച്ചയുടെ വ്യാപക കരിങ്കൊടി പ്രതിഷേധം നടക്കുകയാണ്. പക്വതയില്ലാത്ത നടപടിയെന്നുമാണ് ഒരു വിഭാഗം ആക്ഷേപിച്ചത്. മതിയായ കൂടിയാലോചനയില്ലാതെ നടത്തിയ സമരമെന്ന് ഒരു വിഭാഗം നേതാക്കളുടെ വിമര്‍ശനം.
മുഖ്യമന്ത്രിക്കും ആഭ്യന്തരമന്ത്രിക്കും കടുത്ത അതൃപ്തിയുണ്ട്. ഈ സംഭവത്തിന് പിന്നാലെ യുവമോര്‍ച്ച മന്ത്രിമാരുടെ വാഹനങ്ങള്‍ തടയുകയു കരിങ്കൊടി കാട്ടുകയും ചെയ്യുന്ന സംഭവം പതിവായിരുന്നു. കോഴിക്കോട്ട് ആഭ്യന്തരമന്ത്രി രമേശ് ചെന്നിത്തലയുടെയും, വയനാട് എംപി പ്രിയങ്ക ഗാന്ധിയുടെയും വാഹനവ്യൂഹം യുവമോര്‍ച്ച പ്രവര്‍ത്തകര്‍ തടഞ്ഞിരുന്നു. കൊല്ലത്ത് മന്ത്രിമാരായ പി.സി. വിഷ്ണുനാഥിനും കെ. മുരളീധരനും കണ്ണൂരില്‍ മന്ത്രി സണ്ണി ജോസഫിനും നേരെ പ്രതിഷേധമുണ്ടായി. കരുനാഗപ്പള്ളിയില്‍ കെ. മുരളീധരന് നേരെയും യുവമോര്‍ച്ചയുടെ കരിങ്കൊടി പ്രതിഷേധം ഉണ്ടായിരുന്നു.
Comments