വർഷങ്ങളായി മനസിൽ കൊണ്ടുനടന്ന സ്വന്തം വീടെന്ന സ്വപ്നം യാഥാർഥ്യമായപ്പോൾ അമ്മയുടെ കണ്ണുകൾ നിറഞ്ഞ നിമിഷമാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. പഞ്ചാബിലെ ലുധിയാനയിൽ അമർ, ദേവ് ദേവ്ഗൻ സഹോദരങ്ങളാണ് കുടുംബത്തിനായി നിർമ്മിച്ച വീട് അമ്മയെയും സഹോദരി മൻപ്രീത് കൗർ ബിർഡിയെയും അപ്രതീക്ഷിതമായി കാണിച്ചത്. വീട്ടിലെ നെയിംപ്ലേറ്റിലെ പേര് വെളിപ്പെടുത്തിയതോടെ മൻപ്രീതിന് സന്തോഷം അടക്കാനായില്ല.
കുടുംബം നേരിട്ട ബുദ്ധിമുട്ടുകൾക്കിടയിൽ മൻപ്രീത് വർഷങ്ങളോളം അമ്മയെയും സഹോദരങ്ങളെയും പിന്തുണച്ചിരുന്നു. 2007-ൽ പിതാവ് മരണപ്പെട്ടതോടെ കുടുംബത്തിന്റെ ഉത്തരവാദിത്വങ്ങൾ പെട്ടെന്ന് വർധിച്ചു. സഹോദരങ്ങൾ കുടുംബ ബിസിനസിന്റെ ചുമതല ഏറ്റെടുത്തപ്പോൾ മൻപ്രീത് അമ്മയെ പരിചരിക്കുകയും കുടുംബത്തിനായി നിരവധി കാര്യങ്ങൾ ഏറ്റെടുക്കുകയും ചെയ്തു. രാത്രികളിൽ ഫാക്ടറി ജീവനക്കാർക്കായി ഭക്ഷണം തയ്യാറാക്കുന്നതുൾപ്പെടെ കുടുംബത്തെ മുന്നോട്ട് കൊണ്ടുപോകുന്നതിൽ അവർ വലിയ പിന്തുണ നൽകിയെന്നാണ് റിപ്പോർട്ടുകൾ.
കാലം കടന്നുപോയപ്പോൾ കുടുംബത്തിന്റെ സാമ്പത്തിക സ്ഥിതി മെച്ചപ്പെട്ടു. ഇതിനിടെയാണ് സഹോദരങ്ങൾ മൻപ്രീതിനായി സ്വന്തം പേരിലുള്ള ഒരു വീട് ഒരുക്കാൻ തീരുമാനിച്ചത്. ഏകദേശം അഞ്ച് വർഷത്തോളം പദ്ധതിയിട്ട ശേഷമാണ് സ്വപ്നവീട് യാഥാർഥ്യമാക്കിയത്. കുടുംബാംഗങ്ങളും ബന്ധുക്കളും ഒത്തുകൂടിയ ചടങ്ങിനിടെ നെയിംപ്ലേറ്റിലെ പേപ്പർ നീക്കിയപ്പോഴാണ് മൻപ്രീത് തനിക്കായി ഒരുക്കിയ വീടാണെന്ന് തിരിച്ചറിഞ്ഞത്.
വീടിന്റെ പേര് വെളിപ്പെടുത്തിയതോടെ കണ്ണുനിറഞ്ഞ മൻപ്രീത് സഹോദരങ്ങളെ കെട്ടിപ്പിടിച്ചു. സന്തോഷവും വൈകാരികതയും നിറഞ്ഞ ഈ ദൃശ്യങ്ങളാണ് സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. വർഷങ്ങളോളം കുടുംബത്തിനായി നൽകിയ പിന്തുണയ്ക്കും ത്യാഗങ്ങൾക്കും സഹോദരങ്ങൾ നൽകിയ മറുപടിയായാണ് ഈ വീട് ഒരുക്കിയതെന്നാണ് റിപ്പോർട്ട്. സ്വന്തമായി വിളിക്കാനൊരു വീട് എന്ന സ്വപ്നം യാഥാർഥ്യമായ നിമിഷം കണ്ടവരെയും വീഡിയോ സ്പർശിച്ചു.
Comments