ബാഹുബലി, ആർ.ആർ.ആർ എന്നീ ചിത്രങ്ങള്‍ പ്രേക്ഷകര്‍ക്ക് നല്‍കിയ ബ്രഹ്മാണ്ഡ സംവിധായകനാണ് എസ്. എസ്. രാജമൗലി. ഫഹദ് ഫാസിൽ നായകനാകുന്ന തെലുങ്ക് ഫാന്റസി എന്റർടെയ്‌നർ ചിത്രമായ ‘ഡോണ്ട് ട്രബിൾ ദി ട്രബിൾ’ നിർമ്മിക്കുന്നത് രാജമൗലിയുടെ മകൻ എസ് എസ് കാർത്തികേയയാണ്. നവാഗതനായ ശശാങ്ക് യെലേട്ടിയാണ് ഈ തെലുങ്ക് ഫാന്റസി ചിത്രം സംവിധാനം ചെയ്യുന്നത്.
ഇക്കഴിഞ്ഞ ദിവസം ഈ സിനിമയുടെ പ്രീ റിലീസ് ചടങ്ങ് ചെന്നൈയില്‍ വച്ച് നടന്നിരുന്നു. ചടങ്ങില്‍ ഔദ്യോഗിക അവതാരകനായി എത്തിയത് എസ്.എസ്. രാജമൗലിയാണ്. ഫഹദിനോടും രാജമൗലിയോടുമുള്ള സ്നേഹത്തിന്റെ പേരില്‍ വിശിഷ്ടാതിഥിയായി സൂര്യയും ചടങ്ങിനെത്തിയിരുന്നു.
ഇപ്പോഴിതാ ഈ ചടങ്ങില്‍ വച്ച് ഫഹദ് ഫാസിലിനെക്കുറിച്ച് രാജമൗലി പറഞ്ഞ കാര്യങ്ങളാണ് സോഷ്യല്‍ മീഡിയ ഏറ്റെടുക്കുന്നത്. രാജമൗലിയുടെ വാക്കുകള്‍ കേട്ട് ചിരിക്കുന്ന ഫഹദിനെ വീഡിയോയില്‍ കാണാം. ഫഹദിനൊപ്പമിരിക്കുന്ന സൂര്യയും രാജമൗലിയുടെ വാക്കുകള്‍ കേട്ട് ചിരിക്കുകയും ഫഹദിനെ ചേര്‍ത്തു പിടിക്കുകയും ചെയ്യുന്നുണ്ട്.
‘‘ഫഹദ് ഫാസിൽ ഒരു മികച്ച നടനാണ്. അതൊരു വസ്തുതയാണ്; എല്ലാവർക്കും അറിയാവുന്ന കാര്യമാണത്, അതിനാൽ ആ കാര്യം ഞാൻ ആവർത്തിക്കേണ്ടതില്ല. എങ്കിലും ഫഹദിനോട് എനിക്ക് വലിയൊരു പരാതി ഉണ്ടായിരുന്നു; സിനിമ തുടങ്ങുന്നതിന് മുൻപ് അദ്ദേഹത്തെ കണ്ടപ്പോഴും ഞാനത് ചോദിച്ചിരുന്നു. ‘കുമ്പളങ്ങി നൈറ്റ്‌സ്,ട്രാൻസ്, ജോജി തുടങ്ങിയ ചിത്രങ്ങളിലെപ്പോലെ, ഇരുണ്ട സ്വഭാവസവിശേഷതകളുള്ള കഥാപാത്രങ്ങളോടുള്ള നിങ്ങളുടെ ഈ പ്രത്യേക താൽപ്പര്യത്തിന് പിന്നിലെന്താണ്? സ്നേഹിക്കാനും ഇഷ്ടപ്പെടാനും തോന്നുന്ന തരത്തിലുള്ള കഥാപാത്രങ്ങൾ ചെയ്തുകൂടേ?’ എന്ന്.
ഞങ്ങൾ അത് സംസാരിച്ചതിനുശേഷമാണ് ‘ഡോണ്ട് ട്രബിൾ ദി ട്രബിൾ’ എന്ന കഥ വന്നത്. അദ്ദേഹമതിന് ഗംഭീരമായിരിക്കുമെന്ന് ഞങ്ങൾക്ക് തോന്നി. പക്ഷേ ഈ സിനിമയിലും അദ്ദേഹം ഒരു തട്ടിപ്പുകാരനാണ്, എങ്കിലും എല്ലാവർക്കും ഒരുപോലെ ഇഷ്ടം തോന്നുന്ന, സ്നേഹിക്കാൻ തോന്നുന്നൊരു തട്ടിപ്പുകാരൻ...’’ എന്നാണ് രാജമൗലി പറഞ്ഞത്. തെലുങ്ക്, മലയാളം, തമിഴ് ചലച്ചിത്ര മേഖലകളിലെ മൂന്ന് പ്രമുഖ താരങ്ങൾ ഒരേ വേദിയിൽ ഒത്തുചേർന്നപ്പോൾ, ഭാവിയിൽ ഒരുമിച്ച് സിനിമ ചെയ്യുന്നതിനെക്കുറിച്ച് മാധ്യമങ്ങളും ആരാധകരും അവരോട് ആവേശത്തോടെ ചോദിച്ചറിഞ്ഞു. സൂര്യയെ എപ്പോഴാണ് സംവിധാനം ചെയ്യുക എന്ന് കൃത്യമായി ചോദിച്ചപ്പോൾ, ഫഹദിന്റെ സിനിമയിൽ നിന്നുള്ള ശ്രദ്ധ തിരിച്ചുപോകാതിരിക്കാൻ തന്റെ പദ്ധതികളെക്കുറിച്ച് എസ്.എസ്. രാജമൗലി ഒന്നും വെളിപ്പെടുത്താതെ മൗനം പാലിക്കുകയും ചെയ്തു.
അർക്ക മീഡിയ വർക്ക്സ്, ഷോയിംഗ് ബിസിനസ് എന്നീ ബാനറുകളിൽ എസ്.എസ്. കാർത്തികേയ, ഷോബു യാർലഗഡ്ഡ, പ്രസാദ് ദേവിനേനി എന്നിവർ ചേർന്നാണ് ‘ഡോണ്ട് ട്രബിൾ ദി ട്രബിൾ’ നിർമ്മിക്കുന്നത്. ‘ബാഹുബലി’ ചിത്രങ്ങളുടെ നിർമ്മാണത്തിലും അർക്ക മീഡിയ വർക്ക്സ് പങ്കാളികളായിരുന്നു എന്നത് രാജമൗലിയും ഈ പുതിയ ചിത്രവും തമ്മിലുള്ള മറ്റൊരു ബന്ധം കൂടിയാണ്. അമാനുഷിക കഴിവുകളുള്ള ദിവ്യ എന്ന പെൺകുട്ടിയെ കണ്ടുമുട്ടിയ ശേഷം ജീവിതം മാറിമറിയുന്ന സൂരി എന്ന തെരുവ് മാന്ത്രികന്റെയും തട്ടിപ്പുകാരന്റെയും വേഷമാണ് ഫഹദ് ഈ ചിത്രത്തിൽ കൈകാര്യം ചെയ്യുന്നത്. ഒരു ഫാന്റസി ഫാമിലി എന്റർടെയ്‌നറായാണ് ഒരുക്കിയിരിക്കുന്ന ചിത്രത്തില്‍ ബാലതാരമായ സാറ പാലേക്കറാണ് ദിവ്യയായി വേഷമിടുന്നത്. നേരത്തെ സെപ്റ്റംബർ 11-ന് റിലീസ് ചെയ്യാൻ തീരുമാനിച്ചിരുന്ന ചിത്രം ഇപ്പോൾ 2026 ഒക്ടോബർ 2-ലേക്ക് മാറ്റിയിട്ടുണ്ട്. അന്ന് ലോകമെമ്പാടുമുള്ള തിയേറ്ററുകളിൽ തെലുങ്ക്, തമിഴ്, മലയാളം ഭാഷകളില്‍ സിനിമ റിലീസ് ചെയ്യും.
മറുവശത്ത്, എസ്.എസ്. രാജമൗലി തന്റെ അടുത്ത വലിയ പ്രോജക്റ്റായ ‘വാരണാസി’യുടെ പണിപ്പുരയിലാണ്. മഹേഷ് ബാബു, പ്രിയങ്ക ചോപ്ര, പൃഥ്വിരാജ് സുകുമാരൻ എന്നിവർ പ്രധാന വേഷങ്ങളിലെത്തുന്ന ഈ ചിത്രം, കാലഘട്ടങ്ങളിലൂടെയുള്ള യാത്ര പ്രമേയമാക്കിയുള്ള ഒരു ആക്ഷൻ-അഡ്വഞ്ചർ ഡ്രാമയാണ്. വിവിധ കാലഘട്ടങ്ങളെ ചിത്രത്തിൽ അവതരിപ്പിക്കാനും അണിയറപ്രവർത്തകർ പദ്ധതിയിടുന്നുണ്ട്. 2027 ഏപ്രിൽ 7-ന് ചിത്രം റിലീസ് ചെയ്യുമെന്നാണ് പ്രഖ്യാപിച്ചിരിക്കുന്നത്.
Comments