സിനിമയിൽ 25 വർഷങ്ങൾ പൂർത്തിയാക്കിയ ഇന്ത്യൻ സിനിമയുടെ അഭിമാനമായി മാറിയ ബ്രഹ്‌മാണ്ഡ സംവിധായകനാണ് എസ്. എസ്. രാജമൗലി. ആരാധകർക്ക് മാത്രമല്ല സിനിമയിൽ പ്രവർത്തിക്കുന്നവര്‍ പോലും ആരാധിക്കുന്ന ഒരു അതുല്യ പ്രതിഭ കൂടിയാണ് രാജമൗലി.
ഇപ്പോഴിതാ മലയാളത്തിന്റെ പ്രിയ സംവിധായകൻ ഗിരീഷ് എ. ഡി രാജമൗലിയെ നേരിട്ടു കണ്ടപ്പോഴുള്ള പ്രതികരണമാണ് സോഷ്യൽ മീഡിയയിൽ നിറയുന്നത്. ബെത്ലഹേം കുടുംബ യൂണിറ്റ് സിനിമയിലൂടെ തെന്നിന്ത്യന്‍ സിനിമയിലെ തന്നെ മുന്‍നിര സംവിധായകരിലൊരാളായി മാറിയ ഗിരീഷിന് വേദിയിലെത്തി രാജമൗലിയെ കണ്ടതോടെ ഒന്നും മിണ്ടാനും പ്രതികരിക്കാനും പറ്റാത്ത അവസ്ഥയായി. ഡോണ്ട് ട്രബിള്‍ ദി ട്രബിള്‍ ചിത്രത്തിന്റെ കേരളത്തിന്റെ പ്രീ റിലീസ് ഈവന്റിന്റെ ഭാഗമായി എസ് എസ് രാജമൗലിയും എത്തിയിട്ടുണ്ടായിരുന്നു.
ബെത്ലഹേം കുടുംബ യൂണിറ്റിന്റെ മുന്നൂറു കോടി തിളക്കത്തില്‍ സംവിധായകന്‍ ഗിരീഷ് എ ഡി യെ വേദിയിലേക്ക് വിളിച്ചപ്പോള്‍ അവതാരകയായ മീര അനില്‍ രാജമൗലിയെപ്പറ്റി ഗിരീഷിനോട് ചോദിച്ചു. രാജമൗലി സാര്‍ ഇങ്ങനെ മുന്നിലിരിക്കുമ്പോള്‍ എന്താണ് ഗിരീഷേട്ടന്റെ മനസ്സിലേക്ക് എത്തുന്നത് എന്നായിരുന്നു മീരയുടെ ചോദ്യം.
അതിനു മറുപടിയായി, ‘‘പേടിയാണ്. എനിക്കു രാജമൗലി സാറിന്റെയടുത്ത് സംസാരിക്കാന്‍ പേടിയാണ്. അദ്ദേഹം സെറ്റില്‍ കൂളാണ്, പക്ഷെ ഒരു സംവിധായകന്‍ എന്ന നിലയില്‍ എനിക്ക് അദ്ദേഹത്തിനോട് സംസാരിക്കാന്‍ ചെറിയ പേടി ഉണ്ട്...’’ എന്നായിരുന്നു ഗിരീഷ് പറഞ്ഞത്. ഇതു കേട്ട് കണ്ണുപൊത്തി ചിരിക്കുന്ന രാജമൗലിയെയും പൊട്ടിച്ചിരിക്കുന്ന ഫഹദിനെയും സദസ്സിനെയും വീഡിയോയില്‍ കാണാം. ഡോണ്ട് ട്രബിള്‍ ദി ട്രബിള്‍ കുട്ടികള്‍ക്കും ഫാമിലിക്കും തിയേറ്ററില്‍ സന്തോഷിക്കാന്‍ പറ്റുന്ന നല്ല ഒരു ചിത്രമായിരിക്കും എന്നും ഗിരീഷ് പറഞ്ഞു. ഗിരീഷിന്റെ വാക്കുകളെ നിറഞ്ഞ കൈയടിയോടെയാണ് സദസ്സ് ഏറ്റെടുത്തത്. പ്രേമലു, ബെത്ലഹേം കുടുംബ യൂണിറ്റ് എന്നീ ബ്ലോക്ക്ബസ്റ്റര്‍ ഹിറ്റുകളുടെ അമരക്കാരന്‍ യഥാര്‍ത്ഥ ജീവിതത്തില്‍ ഇത്രയും നിഷ്കളങ്കനാണോ എന്നാണ് പലരും കമന്റുകളിലൂടെ ചോദിക്കുന്നത്. ശരിക്കും ഡൗണ്‍ ടു എര്‍ത്ത്, ഇതിന്റെ അപ്പുറത്ത് ഒരു ഇന്‍ട്രോവേര്‍ട്ട് ഉണ്ടോ, പേടിച്ചു ചിരിച്ചു പോയി...’ എന്നതടക്കമാണ് കമന്റുകള്‍.
ഫാന്റസി ഫാമിലി എന്റെര്‍റ്റൈനെര്‍ ചിത്രമായ ഡോണ്ട് ട്രബിള്‍ ദി ട്രബിളില്‍ തന്റെ പതിവ് ശൈലിയില്‍ നിന്നും വ്യത്യസ്തമായ കഥാപാത്രത്തെയാണ് ഫഹദ് ഫാസില്‍ അവതരിപ്പിക്കുന്നത്. നവാഗതനായ ശശാങ്ക് യെലേട്ടിയാണ് ഈ സിനിമ സംവിധാനം ചെയ്യുന്നത്. ബാഹുബലി ഉള്‍പ്പെടെയുള്ള ബ്രഹ്‌മാണ്ഡ ചിത്രങ്ങളുടെ നിര്‍മ്മാതാക്കളായ ആര്‍ക്കാ മീഡിയ വര്‍ക്ക്‌സും ചിത്രത്തിന്റെ നിര്‍മ്മാണത്തില്‍ പങ്കാളികളാണ്. ആര്‍ക്ക മീഡിയ വര്‍ക്ക്‌സ്, ഷോയിംഗ് ബിസിനസ് എന്നീ ബാനറുകളുടെ കീഴില്‍ ഷോബു യാര്‍ലഗഡ്ഡ, പ്രസാദ് ദേവിനേനി, എസ്. എസ്. കാര്‍ത്തികേയ എന്നിവരാണ് ചിത്രത്തിന്റെ നിര്‍മ്മാതാക്കള്‍.
കലാമൂല്യമുള്ളതും പ്രേക്ഷക-നിരൂപക പ്രശംസകള്‍ നേടിയ ചിത്രങ്ങള്‍ മലയാളികള്‍ക്ക് സമ്മാനിച്ച ഭാവനാ സ്റ്റുഡിയോസിന്റെ ഭാവനാ റിലീസ് ഡോണ്ട് ട്രബിള്‍ ദി ട്രബിള്‍ കേരളത്തിലെ തിയേറ്ററുകളിലേക്കെത്തിക്കുന്നു. നേരത്തെ റിലീസായ ഡോണ്ട് ട്രബിള്‍ ദി ട്രബിളിന്റെ ടീസറും ഗാനവും സോഷ്യല്‍ മീഡിയയില്‍ തരംഗമായിരുന്നു.
Comments