മലയാള സിനിമയിലെ വ്യത്യസ്തതയാർന്ന അഭിനയ ശൈലി കൊണ്ട് പാൻ-ഇന്ത്യൻ തലത്തില്‍ ശ്രദ്ധേയനായ താരമാണ് ഫഹദ് ഫാസില്‍.
നായകന്‍ മാത്രമല്ല വില്ലന്‍ വേഷങ്ങളടക്കം ചെയ്ത് വേറിട്ട അഭിനയമുഹൂർത്തങ്ങള്‍ സമ്മാനിക്കാറുളള ഫഹദിന്റെ ചിത്രങ്ങള്‍ മലയാള സിനിമാപ്രേക്ഷകരും തമിഴകവും ഒരുപോലെ കാത്തിരിക്കാറുണ്ട്.
സിനിമകളില്‍ തിളങ്ങി നില്‍ക്കുമ്പോഴും വ്യക്തിജീവിതത്തിലെ ചില തുറന്നു പറച്ചിലുകള്‍ കാരണം ചര്‍ച്ചകളില്‍ നിറഞ്ഞിരുന്നു. ജീവിതത്തില്‍ നേരിട്ട ഒരു അറ്റൻഷൻ ഡെഫിസിറ്റ് ഹൈപ്പർആക്ടിവിറ്റി ഡിസോർഡർ എന്ന പ്രത്യേക മാനസിക അവസ്ഥയെക്കുറിച്ചാണ് താരം തുറന്നുപറഞ്ഞത്. തന്റെ നാല്പതുകളിലാണ് എഡിഎച്ച്ഡി തനിക്ക് ബാധിച്ചിട്ടുണ്ടെന്ന് തിരിച്ചറിഞ്ഞതെന്ന് ഫഹദ് വെളിപ്പെടുത്തിയത്. പൂർണ്ണ വളർച്ചയെത്തിയ ഒരാളില്‍ എ.ഡി.എച്ച്.ഡി കണ്ടെത്തുന്നത് സാധാരണ രീതിയില്‍ ചികിത്സിച്ചു മാറ്റാൻ പ്രയാസമുള്ള കാര്യമാണെങ്കിലും, ഈ തിരിച്ചറിവ് തന്റെ ജീവിതത്തില്‍ വലിയൊരു വഴിത്തിരിവായിരുന്നുവെന്നും താരം പറഞ്ഞിരുന്നു.
ഇപ്പോഴിതാ എ.ഡി.എച്ച്.ഡിയുണ്ടെന്ന് തുറന്നു പറഞ്ഞതിന് ശേഷം തന്നെ സമീപിച്ചവര്‍ സംസാരിച്ച രീതിയെക്കുറിച്ച് തുറന്നു പറയുകയാണ് ഫഹദ് ഫാസില്‍.
‘‘ഞങ്ങൾ കുടുംബസംഗമങ്ങളിലൊക്കെ ആയിരിക്കുമ്പോൾ, എന്റെ അകന്ന ബന്ധുക്കളും വലിയ അടുപ്പമില്ലാത്ത പരിചയക്കാരും എന്റെ ഭാര്യയായ നസ്റിയയോട് ചോദിക്കും, ‘അദ്ദേഹം അക്രമാസക്തനാകാറുണ്ടോ ? അദ്ദേഹം എന്തെങ്കിലും മരുന്ന് കഴിക്കുന്നുണ്ടോ?’ എന്ന്. അതൊരു മാനസിക രോഗമാണെന്നാണ് അവർ വിചാരിക്കുന്നത്.
എന്നാല്‍ അത് തുറന്നു പറഞ്ഞതിന് ശേഷം എന്റെ വ്യക്തിജീവിതത്തിൽ വലിയ മാറ്റങ്ങളൊന്നും ഉണ്ടായിട്ടുണ്ടെന്ന് എനിക്ക് തോന്നുന്നില്ല, കാരണം അത് പറയുമ്പോൾ ഞാൻ അതിന് മാനസികമായി തയ്യാറെടുത്തിരുന്നു. ഒരുപാട് ആളുകൾ അടുത്ത് വന്ന് പറയാറുണ്ട്, ‘നിങ്ങൾ ഇതിനെക്കുറിച്ച് സംസാരിച്ചത് വളരെ നന്നായി, എന്റെ മകനും ഇതുണ്ട്...’ എന്നൊക്കെ. അതുകൊണ്ട് ഒരു തരത്തിൽ അതിനെക്കുറിച്ച് സംസാരിച്ചതിൽ എനിക്ക് സന്തോഷമേയുള്ളൂ. ഞാൻ അതിനെ ശരിയായ രീതിയിലാണോ നേരിടുന്നത് എന്ന് എനിക്കറിയില്ല, പക്ഷേ അത് എന്റെ ജീവിതത്തിൽ മോശമായി ഒരു മാറ്റവും ഉണ്ടാക്കിയിട്ടില്ല...
എന്റെ ജീവിതം വളരെ ചെറുപ്പകാലം മുതൽ ഒരേ പാറ്റേണിലാണ് മുന്നോട്ട് പോയിരുന്നത്. ബോർഡിങ് സ്കൂളിലാണ് ഞാൻ ഏറിയ കാലവും പഠിച്ചത്. സ്വന്തം വീട്ടിൽ കിട്ടുന്ന ശ്രദ്ധയോ പരിഗണനയോ അവിടെ നമുക്ക് ലഭിക്കില്ല. കാര്യങ്ങൾ സ്വയം തന്നെ നോക്കണം. സ്കൂൾ കഴിഞ്ഞതും അമേരിക്കയിലേക്ക് പോയി. ആ കലത്ത് ഒറ്റയ്ക്കാണ് എല്ലാത്തിനെയും നേരിട്ടത്. എല്ലാവരുടെയും ജീവിതം അതുപോലെ തന്നെ ആയിരിക്കും എന്ന തോന്നലാണ് അന്ന് ഉണ്ടായിരുന്നത്. ആ കാലത്ത് ഒറ്റപ്പെടൽ എന്നത് എന്താണെന്ന് പോലും തിരിച്ചറിയാൻ നമുക്ക് സാധിക്കില്ല. അന്നത്തെ എന്റെ തിരുമാനങ്ങൾക്കും പ്രതികരണങ്ങൾക്കുമെല്ലാം കാരണം എ.ഡി.എച്ച്.ഡി ആയിരിക്കാം എന്ന തോന്നൽ ഇപ്പോഴാണ് ഉണ്ടാകുന്നത്. വലിയ സംഭവമെന്ന് പറയാനുള്ള കാര്യങ്ങൾ ഒന്നുമില്ല. ശരിയേത് തെറ്റേത് എന്നതിൽ ധാരണയുണ്ടാകുമ്പോൾ തന്നെ ചില തീരുമാനങ്ങൾ കൈക്കോള്ളുന്നതിൽ നമ്മൾ പരാജയപ്പെടും...’’ ഫഹദ് പറയുന്നു. തന്റെ 41-ാം വയസ്സിൽ കോതമംഗലം പീസ് വാലി ചിൽഡ്രൻസ് വില്ലേജിന്റെ ഉദ്ഘാടന ചടങ്ങിലാണ് തനിക്ക് ഈ അവസ്ഥയുണ്ടെന്ന് ഫഹദ് തുറന്നുപറഞ്ഞത്.
ഇന്ത്യന്‍ സിനിമയിലെ മികച്ച നടന്മാരുടെ ലിസ്റ്റിലേക്ക് കയറിക്കൂടിയ ഫഹദിന്റെ റിലീസ് കാത്തിരിക്കുന്ന ചിത്രമാണ് ‘ഡോണ്ട് ട്രബിള്‍ ദ ട്രബിള്‍’. ഈയാഴ്ച തിയേറ്ററുകളിലെത്തുന്ന ഈ ചിത്രം താരം നായകനാകുന്ന ആദ്യ തെലുങ്ക് ചിത്രം കൂടിയാണ്. തെലുങ്കില്‍ ഫഹദ് സോളോ ഹീറോയാകുന്ന ആദ്യചിത്രമാണിത്. രാജമൗലിയുടെ മകന്‍ എസ്.എസ് കാര്‍ത്തികേയ നിര്‍മിക്കുന്ന ചിത്രത്തിന്റെ പ്രൊമോഷനുകള്‍ സോഷ്യല്‍ മീഡിയയില്‍ വൈറലായിരിക്കുകയാണ്.
Comments