തിരുവനന്തപുരം: മന്ത്രി ഒ ജെ ജനീഷിനെതിരായ ആക്രമണത്തിൽ സിപിഎമ്മിനെ മുഖ്യമന്ത്രി വി ഡി സതീശൻ അതിരൂക്ഷമായി വിമർശിച്ചു. സിപിഎം നേതൃത്വത്തിന്റെ അറിവോടെയാണ് ആക്രമണം. ക്രിമിനലുകളെയും ക്വട്ടേഷൻ സംഘങ്ങളെയും ഇറക്കിയുള്ള സമരത്തിന് സിപിഎം ശ്രമിക്കുകയാണെങ്കിൽ അത് അവസാനിപ്പിക്കും എന്ന മുന്നറിയിപ്പും മുഖ്യമന്ത്രി നൽകി.
ജനീഷിനെതിരെയുള്ള ആക്രമണം മുഖ്യമന്ത്രിയായിരിക്കെ ഉമ്മന്‍ ചാണ്ടിക്കെതിരെ നടത്തിയ ആക്രമണത്തിന്റെ തുടര്‍ച്ചയാണ്. പലതവണ മന്ത്രിക്ക് നേരെ ആക്രമണമുണ്ടായി. തെരഞ്ഞെടുപ്പ് തോൽവിയിൽ നിന്നുണ്ടായ പ്രതിസന്ധി മറയ്ക്കുന്നതിനാണ് കലാപശ്രമം നടത്തുന്നതെന്നും മുഖ്യമന്ത്രി പറഞ്ഞു. ക്രിമിനൽ മാഫിയ സംഘത്തെപ്പോലെയാണ് സിപിഎം പ്രവർത്തിക്കുന്നത്. ക്രിമിനലുകളെയും ക്വട്ടേഷൻ സംഘങ്ങളെയും ഇറക്കാനാണ് ശ്രമമെങ്കിൽ അത് അവസാനിപ്പിക്കേണ്ട ഉത്തരവാദിത്തം സർക്കാരിനാണെന്നും അദ്ദേഹം കൂട്ടിച്ചേർത്തു.
തിരഞ്ഞെടുപ്പ് കമ്മീഷനും ബിജെപി സർക്കാരിനും എതിരെയാണ് യൂത്ത് കോൺഗ്രസ് പ്രക്ഷോഭം നടത്തിയത്. ജനീഷ് പ്രക്ഷോഭത്തിനു നേതൃത്വം നൽകിയതാണോ സിപിഎമ്മിന്റെ പ്രശ്നം എന്ന് ചോദിച്ച മുഖ്യമന്ത്രി പത്ത് വർഷം നടത്തിയ ഗുണ്ടായിസം ഇനിയും തുടരാമെന്ന് സിപിഎമ്മും ക്രിമിനൽ സംഘവും കരുതേണ്ട എന്നും പറഞ്ഞു. ആക്രമണം നടത്തിയവരെയും ഗൂഢാലോചന നടത്തിയവരെയും നിയമത്തിനു മുന്നിൽ കൊണ്ടുവരുമെന്നും മുഖ്യമന്ത്രി വ്യക്തമാക്കി. ബിജെപിക്കെതിരെയുള്ള സമരത്തിൽ സിപിഎമ്മിന് അസ്വസ്ഥതയുണ്ടാകുന്നതെന്താണെന്ന് നേരത്തെ മുഖ്യമന്ത്രി ചോദിച്ചിരുന്നു.
Comments