തമിഴകത്തിന്റെ സ്വന്തം ഇളയ ദളപതിയും ഇപ്പോള്‍ തമിഴ്നാടിന്റെ മുഖ്യമന്ത്രിയുമായ സി. ജോസഫ് വിജയ് യുടെ മകനെന്ന ലേബലിലാണ് ജേസണ്‍ സഞ്ജയ് എന്ന താരപുത്രനെ പ്രേക്ഷകര്‍ അറിഞ്ഞു തുടങ്ങിയത്. എന്നാല്‍ അച്ഛന്റെ അഭിനയപാത പിന്തുടരാതെ സ്വന്തമായ ഒരു ഐഡന്റിറ്റി നേടിയെടുക്കാനാണ് താരപുത്രന്‍ ശ്രമിച്ചത്. ജേസണ്‍ സംവിധാനം ചെയ്യുന്ന ആദ്യ സിനിമയാണ് സിഗ്മ. തമിഴ്നാട് മുഖ്യമന്ത്രി വിജയ് തന്റെ അരങ്ങ് ഒഴിഞ്ഞതിനു ശേഷമാണ് മകന്‍ ജേസണ്‍ സഞ്ജയ് സിനിമയിലേക്കുള്ള തന്റെ വരവിനു തുടക്കമിടുന്നത്. ബാലതാരമായി വിജയ്‌യ്‌ക്കൊപ്പം ‘വേട്ടൈക്കാരന്‍’ സിനിമയില്‍ ‘നാന്‍ അടിച്ചാ താങ്കമാട്ടെ ‘ എന്ന പാട്ട് സീനില്‍ ജേസണ്‍ സഞ്ജയ് അഭിനയിച്ചിട്ടുണ്ട്.
ഇപ്പോഴിതാ തന്റെ ആദ്യ ചിത്രമായ ‘സിഗ്മ’യുടെ കഥ ആദ്യം ചർച്ച ചെയ്തത് നടൻ ദുല്‍ഖർ സല്‍മാനോടാണെന്ന് പറയുകയാണ് ജേസണ്‍ സഞ്ജയ്. ചെന്നൈയിലെ ലീല പാലസ് ഹോട്ടലില്‍ വെച്ചാണ് ദുല്‍ഖറിനോട് കഥ പറഞ്ഞതെന്നും, രണ്ട് മണിക്കൂറോളം നീണ്ട ആ കൂടിക്കാഴ്ച തനിക്ക് വലിയൊരു ആത്മവിശ്വാസമാണ് നല്‍കിയതെന്നും താരപുത്രന്‍ പറഞ്ഞു. കഥ പറയുമ്പോള്‍ നോട്ട് ബുക്കുകള്‍ നോക്കി പറയുന്ന ശീലം തനിക്കില്ലെന്നും ജേസണ്‍ പറഞ്ഞു.
‘‘സംവിധായകൻ എന്ന നിലയില്‍ ആത്മവിശ്വാസം പ്രകടിപ്പിക്കാൻ സാധിച്ചാല്‍ മാത്രമേ മറ്റുള്ളവർക്ക് നമ്മളില്‍ വിശ്വാസം ഉണ്ടാകൂ. അതിനായി ആറ് മുതല്‍ എട്ട് മാസം വരെ ഒരു സ്ക്രിപ്റ്റിനായി ഞാൻ കഠിനാധ്വാനം ചെയ്യാറുണ്ട്. കഥ പൂർണ്ണമായും മനസ്സില്‍ ഉറപ്പിച്ച ശേഷമാണ് നരേഷന് പോകാറുള്ളത്. ആവേശം മൂലം ചിലപ്പോഴൊക്കെ കഥാപാത്രങ്ങളുടെ ഭാവങ്ങള്‍ അഭിനയിച്ചു കാണിക്കാറുണ്ട്.
എനിക്ക് കഥ പറയാൻ ഇഷ്ടമാണ്. ഞാൻ കഥ പറയാൻ പോകുമ്പോൾ ബുക്കിൽ നോട്ട് ചെയ്ത് എഴുതി കൊണ്ടു പോകുന്ന പരിപാടിയൊന്നുമില്ല. ഒരു സംവിധായകൻ എന്ന നിലയിൽ ഞാനിപ്പോൾ ഒരു കഥ പറയാൻ പോകുമ്പോൾ, അവർക്ക് തോന്നണം ഞാൻ സംവിധായകനാണ് എനിക്ക് കഥ നന്നായി അറിയാമെന്ന്. ഇല്ലെങ്കിൽ അവർക്ക് എന്നെ വിശ്വാസമുണ്ടാകില്ല. അതുകൊണ്ട് തന്നെ ഒരു സ്ക്രിപ്റ്റിനായി ഏകദേശം 6 - 8 മാസത്തോളം ഞാൻ വർക്ക് ചെയ്യും. അതിന്റെ എല്ലാ കാര്യങ്ങളും എനിക്കറിയാം. അതെപ്പോഴും എന്റെ തലയിൽ വന്നു പോയിക്കൊണ്ടിരിക്കും.
എന്നിട്ട് ഞാൻ അത് അവരോട് പറയും. ചില സമയങ്ങളിൽ ആവേശം കൂടി കാമറ ആംഗിളിനെക്കുറിച്ചും അതുപോലെ അഭിനയിച്ചുമൊക്കെ ഞാൻ കാണിക്കും. മുഴുവൻ സീൻ അഭിനയിച്ചു കാണിക്കില്ല, കഥാപാത്രങ്ങൾ ഇതൊക്കെയാണെന്ന് ഞാൻ കാണിച്ചു കൊടുക്കും. ‘സിഗ്മ’ ആദ്യം പറഞ്ഞത് ദുൽഖറിനോട് ആയിരുന്നു. അതൊരു വലിയ അനുഭവമായിരുന്നു. ചെന്നൈയിലെ ലീല പാലസ് ഹോട്ടലിൽ വച്ചായിരുന്നു ഞാൻ അദ്ദേഹത്തോട് കഥ പറഞ്ഞത്. ദുൽഖർ സാർ ഒരു ചോദ്യം പോലും ചോദിച്ചില്ല, പക്ഷേ അദ്ദേഹത്തിന് എല്ലാം അറിയാം. അദ്ദേഹത്തിന്റെ ശ്രദ്ധ ഒരു നിമിഷം പോലും വ്യതിചലിച്ചില്ല. അദ്ദേഹം നല്ലൊരു കേൾവിക്കാരനാണ്, അതുപോലെ നല്ലൊരു നിരീക്ഷകനും...’’ ജേസണ്‍ സഞ്ജയ് പറഞ്ഞു. പേളി മാണി ഷോയ്ക്ക് നല്‍കിയ അഭിമുഖത്തിലാണ് ജേസണ്‍ ഇക്കാര്യം വ്യക്തമാക്കിയത്. ദുൽഖറിന്റെ ഡേറ്റ് പ്രശ്നങ്ങൾ കാരണമാണ്എന്നാല്‍ ഡേറ്റ് സംബന്ധമായ ചില പ്രശ്നങ്ങള്‍ കാരണമാണ് ആ പ്രോജക്‌ട് മുന്നോട്ടു കൊണ്ടുപോകാൻ സാധിക്കാതെ പോയത് എന്ന് ജേസണ്‍ മുന്‍പ് പറഞ്ഞിരുന്നു.
സന്ദീപ് കിഷനാണ് സിഗ്മയിലെ നായകൻ. ഫറ അബ്ദുള്ള, രാജു സുന്ദരം, സമ്പത്ത് രാജ്, ശിവ പണ്ഡിറ്റ് എന്നിവരാണ് മറ്റു താരങ്ങൾ. ലൈക പ്രൊഡക്‌ഷൻസിന്റെ ബാനറിൽ എ. സുബാസ്കരന്‍ ആണ് സിഗ്മയുടെ നിര്‍മ്മാണം. സിനിമയുടെ കഥ അതീവ രഹസ്യമായി സൂക്ഷിച്ചിരിക്കുകയാണ്. കവര്‍ച്ചയും നിധിവേട്ടയും സാഹസികതയും നിറഞ്ഞ ആക്ഷന്‍ ത്രില്ലറായിരിക്കും സിനിമയെന്നാണ് ട്രെയിലര്‍ നല്‍കുന്ന സൂചന. വിജയ് യുടെ മകന്റെ ആദ്യ സംവിധാന സംരംഭം എങ്ങനെയാകുമെന്ന ആകാംക്ഷയിലാണ് പ്രേക്ഷകരും.
Comments