അങ്കണവാടി ജീവനക്കാരിയുടെ കാല്‍ മസാജ് ചെയ്ത് നൽകുന്ന കൊച്ചുകുട്ടിയുടെ വിഡിയോ സമൂഹമാധ്യമങ്ങളിൽ വൈറലാകുന്നു. മധ്യപ്രദേശിലെ ഛിന്ദ്‌വാര ജില്ലയിൽ നിന്നുള്ള ദൃശ്യങ്ങളാണ് വ്യാപകമായി പ്രചരിക്കുന്നത്. കുട്ടികളെക്കൊണ്ട് അനുചിതമായ ജോലികൾ ചെയ്യിക്കുന്നുവെന്ന ആശങ്കകൾക്കിടയിലാണ് അങ്കണവാടി സഹായിയുടെ പെരുമാറ്റം പുറത്തുവന്നിരിക്കുന്നത്. വിദ്യാഭ്യാസ സ്ഥാപനങ്ങളിലെ ജീവനക്കാരുടെ പെരുമാറ്റത്തെക്കുറിച്ചും കുട്ടികളുടെ സുരക്ഷയെക്കുറിച്ചും പുതിയ ചർച്ചകൾക്ക് വഴിവെച്ചിരിക്കുകയാണ് സംഭവം.
ഛിന്ദ്‌വാര ജില്ലയിലെ പരാസിയയിലെ ചന്ദാമേട്ട, വാർഡ് നമ്പർ 12-ലെ ചാച്ചാ മൊഹല്ലയിലുള്ള അങ്കണവാടി കേന്ദ്രത്തിലാണ് സംഭവം നടന്നതെന്നാണ് റിപ്പോർട്ട്. സമൂഹമാധ്യമങ്ങളിൽ പ്രചരിക്കുന്ന വിഡിയോയിൽ അങ്കണവാടി സഹായി നിലത്ത് കിടക്കുന്നതും ഒരു പെൺകുട്ടി അവരുടെ കാലുകൾക്ക് മുകളിൽ നിന്ന് ചവിട്ടി മസാജ് ചെയ്യുന്നതും കാണാം. എവിടെയാണ് കൂടുതൽ സമ്മർദം നൽകേണ്ടതെന്നും കാലുകൾ എങ്ങോട്ട് നീക്കണമെന്നും ജീവനക്കാരി കുട്ടിക്ക് നിർദേശം നൽകുന്നതും വിഡിയോയിലുണ്ട്. കുട്ടിയെക്കൊണ്ട് ഇത്തരം പ്രവൃത്തികൾ ചെയ്യിപ്പിച്ചത് അനുചിതമാണെന്ന വിമർശനങ്ങളും ഉയരുന്നുണ്ട്.
സംഭവം പുറത്തുവന്നതോടെ അങ്കണവാടിയിലെ കുട്ടികളുടെ പരിചരണവും ജീവനക്കാരുടെ മേൽനോട്ടവും സംബന്ധിച്ച് ആശങ്കകൾ ശക്തമായി. അതേസമയം, സംഭവത്തിൽ കൂടുതൽ വിവരങ്ങളോ അധികൃതർ സ്വീകരിച്ച നടപടികളെക്കുറിച്ചുള്ള വിശദാംശങ്ങളോ ഇതുവരെ പുറത്തുവന്നിട്ടില്ല. സംഭവത്തെക്കുറിച്ച് ഔദ്യോഗിക അന്വേഷണം നടന്നിട്ടുണ്ടോയെന്ന കാര്യത്തിലും വ്യക്തതയില്ല. കുട്ടികളുടെ സുരക്ഷ ഉറപ്പാക്കേണ്ട സ്ഥാപനങ്ങളിൽ ഇത്തരം സംഭവങ്ങൾ ഉണ്ടാകുന്നത് ഗൗരവമായി കാണണമെന്നാണ് സമൂഹമാധ്യമങ്ങളിലെ പ്രതികരണങ്ങൾ.
മധ്യപ്രദേശിൽ വിദ്യാഭ്യാസ സ്ഥാപനങ്ങളിലെ ജീവനക്കാരുടെ പെരുമാറ്റം ചർച്ചയാകുന്ന സമാന സംഭവങ്ങൾ നേരത്തെയും റിപ്പോർട്ട് ചെയ്തിട്ടുണ്ട്. ഭോപ്പാലിലെ ഗാന്ധിനഗറിലുള്ള സർക്കാർ മഹാത്മാഗാന്ധി ഹയർ സെക്കൻഡറി സ്കൂളിൽ വിദ്യാർഥിനിയെക്കൊണ്ട് കാലിൽ മസാജ് ചെയ്യിപ്പിക്കുന്ന അധ്യാപികയുടെ വിഡിയോയും നേരത്തെ വൈറലായിരുന്നു. കാലിന് പരിക്കേറ്റതിനെ തുടർന്നാണ് വിദ്യാർഥിനി മസാജ് ചെയ്തതെന്നായിരുന്നു അധ്യാപികയുടെ വിശദീകരണം. ഛത്തർപൂരിൽ വിദ്യാർഥികളെക്കൊണ്ട് മദ്യം വാങ്ങിപ്പിച്ചെന്ന അധ്യാപകനെതിരായ ആരോപണവും വാർത്തയായിരുന്നു. ഇത്തരം സംഭവങ്ങൾ വിദ്യാഭ്യാസ സ്ഥാപനങ്ങളിലെ കുട്ടികളുടെ സുരക്ഷയും ജീവനക്കാരുടെ ഉത്തരവാദിത്തവും സംബന്ധിച്ച ചർച്ചകൾക്ക് വീണ്ടും വഴിയൊരുക്കുകയാണ്.
Comments