മനുഷ്യരെക്കാൾ കൂടുതൽ കാര്യങ്ങൾ ചെയ്യാൻ കഴിയുന്ന, മനുഷ്യന്റെ ബുദ്ധിയെയും ചിന്താശേഷിയെയും കമ്പ്യൂട്ടറുകളിലൂടെയും മെഷീനുകളിലൂടെയും പുനഃസൃഷ്ടിക്കുന്ന സാങ്കേതികവിദ്യയായ നി‍ർമ്മിത ബുദ്ധി (എഐ) സംവിധാനങ്ങളാണ് കഴിഞ്ഞ കുറച്ചു നാളുകളായി സോഷ്യല്‍ മീഡിയയില്‍ തരംഗമായി മാറുന്നത്. സെലിബ്രിറ്റികളുടെയും മറ്റും ചിത്രങ്ങളും വീഡിയോകളുമൊക്കെ വളരെ മോശമായി പുനഃസൃഷ്ടിക്കുന്നത് ആര്‍ട്ടിഫിഷ്യല്‍ ഇന്റലിജന്‍സിന്റെ നെഗറ്റീവ് പ്രശ്നങ്ങളാണെങ്കില്‍ ചില സൃഷ്ടികള്‍ രസകരവും കൗതുകരവുമാണ്.
ഇപ്പോഴിതാ അനിയത്തിപ്രാവിലെ സുധിയെയും മണിച്ചിത്രത്താഴിലെ നാഗവല്ലിയെയും എഐ ഒരുമിപ്പിക്കുകയാണ്. ഇവര്‍ രണ്ടാളും തമ്മിലുള്ള സംഭാഷണങ്ങളാണ് ഈ എഐ വീഡിയോയെ ആകര്‍ഷകമാക്കുന്നത്. ‘അനിയത്തിപ്രാവ്’ സിനിമയിലെ സുധിയും മിനിയും തമ്മിലുള്ള സംഭാഷണം തന്നെയാണ് ദൃശ്യങ്ങളിലുള്ളത്. എന്നാല്‍ മിനിക്ക് പകരമെത്തിയിരിക്കുന്നത് നാഗവല്ലിയാണെന്നു മാത്രം. രണ്ടുപേരും സിനിമയിലെ അതേ കോസ്റ്റ്യൂമിലാണ് പ്രത്യക്ഷപ്പെടുന്നത് എന്നുള്ളതും വീഡിയോയെ വ്യത്യസ്തമാക്കുന്നു.
‘ഞാനിറങ്ങി വരണോ’ എന്ന് നാഗവല്ലി ചോദിക്കുന്നതും ‘ഇറങ്ങി വരാന്‍ ഞാന്‍ പറയില്ല, പക്ഷേ വന്നാല്‍ എനിക്കവരുടെ മുന്നില്‍ ഷൈന്‍ ചെയ്യാമായിരുന്നു...’ എന്ന് സുധി പറയുന്നതുമാണ് വീഡിയോയുടെ തുടക്കം. അടുത്ത ദിവസം എവിടെ വച്ച് കാണണമെന്നുള്ളത് സുധിയും നാഗവല്ലിയും പറയുന്നതും വീഡിയോയിലുണ്ട്. നിരവധി രസകരമായ കമന്റുകളും വീഡിയോയ്ക്ക് താഴെ നിറയുന്നുണ്ട്. ‘മണിച്ചിത്രപ്രാവ്, റേഷൻ കട മറന്ന് മണ്ണെണ്ണ വാങ്ങണോ സുധി, നാഗവള്ളിക്ക് എന്താ ദിഗംബരന്റെ ഒരു ഭാവം, ഇറങ്ങി വന്ന ഇതെന്റെ തലയിൽ ആവും എന്ന് മൈന്‍ഡ് വോയിസ്..., സുധിയുടെ ഇടപാട് തീരും എന്ന് ഉറപ്പായി, എന്താ നാഗവല്ലിയുടെ ഒരു നാണം...’ എന്നതടക്കമാണ് കമന്റുകള്‍.
Comments