‘ഞാൻ പാകിസ്ഥാനി, അതിർത്തി കടന്ന് ഇന്ത്യയിലെത്തി’; നാട്ടുകാരെ ഭയപ്പെടുത്തിയ യുവാവിന്റെ യഥാർഥ വ്യക്തിത്വം വെളിപ്പെടുത്തി പോലീസ്

മധ്യപ്രദേശിലെ ജബൽപൂരിൽ താൻ പാകിസ്ഥാൻ സ്വദേശിയാണെന്ന് അവകാശപ്പെട്ട് നാട്ടുകാരിൽ ആശങ്ക സൃഷ്ടിച്ച യുവാവിന്റെ യഥാർഥ വ്യക്തിത്വം പുറത്തുവന്നതോടെ സംഭവം സമൂഹമാധ്യമങ്ങളിൽ ചർച്ചയാകുന്നു. പാകിസ്ഥാനിലെ റാവൽപിണ്ടി സ്വദേശിയായ ഹാമിദ് അൻസാരിയാണെന്നും അട്ടാരി അതിർത്തിയിലൂടെ കാൽനടയായി ഇന്ത്യയിലെത്തിയതാണെന്നും യുവാവ് അവകാശപ്പെട്ടതായാണ് റിപ്പോർട്ട്. സംശയാസ്പദമായ സാഹചര്യത്തിൽ പ്രദേശത്ത് കണ്ട യുവാവിനെ നാട്ടുകാർ ചോദ്യം ചെയ്തതോടെയാണ് സംഭവം പുറത്തറിയുന്നത്. പിന്നാലെ നാട്ടുകാർ ചോദ്യം ചെയ്യുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായി.

ജബൽപൂരിലെ വൈദ്യനാഥൻ നഗറിലാണ് സംഭവം. പ്രദേശത്ത് സംശയകരമായ സാഹചര്യത്തിൽ ചുറ്റിക്കറങ്ങുകയായിരുന്ന യുവാവിനോട് നാട്ടുകാർ വിവരങ്ങൾ ചോദിച്ചപ്പോഴാണ് താൻ പാകിസ്ഥാനിയാണെന്ന് ഇയാൾ പറഞ്ഞതെന്നാണ് റിപ്പോർട്ട്. ഇയാളുടെ അവകാശവാദം പ്രദേശവാസികളിൽ ആശങ്കയുണ്ടാക്കി. തുടർന്ന് നാട്ടുകാർ ​പോലീസിനെ വിവരമറിയിച്ചു. സ്ഥലത്തെത്തിയ പോലീസ് യുവാവിനെ സ്റ്റേഷനിലേക്ക് കൊണ്ടുപോയി ചോദ്യം ചെയ്യുകയും തിരിച്ചറിയൽ രേഖകൾ ഉൾപ്പെടെയുള്ള വിവരങ്ങൾ പരിശോധിക്കുകയും ചെയ്തു.

പോലീസ് നടത്തിയ പരിശോധനയിൽ യുവാവ് പാകിസ്ഥാൻ സ്വദേശിയല്ലെന്ന് വ്യക്തമായി. ഉത്തർപ്രദേശിലെ ഹർദോയ് ജില്ലയിലെ ഗൗസഗഞ്ച് സ്വദേശിയായ ശിവം പാഠക് എന്നയാളാണ് ഇയാളെന്ന് പോലീസ് സ്ഥിരീകരിച്ചു. കുടുംബവുമായി ബന്ധപ്പെട്ടതോടെ കൂടുതൽ വിവരങ്ങളും പുറത്തുവന്നു. ശിവത്തിന്റെ മാനസികനില സ്ഥിരമല്ലെന്നും ആരോടും പറയാതെ വീട്ടിൽനിന്ന് ഇറങ്ങിപ്പോകുന്ന പതിവുണ്ടെന്നും കുടുംബാംഗങ്ങൾ പോലീസിനോട് പറഞ്ഞതായാണ് റിപ്പോർട്ട്. സമാനമായ സംഭവത്തെത്തുടർന്ന് കഴിഞ്ഞ മാസവും ഇയാളെ രാജസ്ഥാനിൽനിന്ന് വീട്ടിലെത്തിച്ചിരുന്നുവെന്നും കുടുംബം അറിയിച്ചു.

പാകിസ്ഥാൻ സ്വദേശിയാണെന്ന യുവാവിന്റെ അവകാശവാദത്തിന് തെളിവുകളൊന്നും കണ്ടെത്താനായിട്ടില്ലെന്ന് പോലീസ് വ്യക്തമാക്കി. യുവാവിന്റെ പിതാവ് ഭാരത് സഞ്ചാർ നിഗം ലിമിറ്റഡിൽ ജൂനിയർ എൻജിനീയറായി ജോലി ചെയ്ത് വിരമിച്ചയാളാണ്. യുവാവിനെ നാട്ടിലേക്ക് തിരികെ കൊണ്ടുപോകാൻ സഹോദരൻ ജബൽപൂരിലേക്ക് വരുന്നതായും റിപ്പോർട്ടിലുണ്ട്. നാട്ടുകാരെ ആശങ്കയിലാക്കിയ യുവാവിന്റെ അവകാശവാദം പോലീസ് പരിശോധനയിൽ വ്യാജമാണെന്ന് തെളിഞ്ഞതോടെ സംഭവത്തിന്റെ ദൃശ്യങ്ങൾ വീണ്ടും സമൂഹമാധ്യമങ്ങളിൽ ശ്രദ്ധ നേടുകയാണ്.