കുഞ്ഞിനെ പുറത്ത് തുണികൊണ്ട് കെട്ടിവെച്ച് പെട്രോൾ പമ്പിൽ വാഹനങ്ങളിൽ ഇന്ധനം നിറയ്ക്കുന്ന അമ്മയുടെ വീഡിയോ സമൂഹമാധ്യമങ്ങളിൽ വൈറലാകുന്നു. ലഡാക്കിലെ പെട്രോൾ പമ്പിൽ ജോലി ചെയ്യുന്ന യുവതിയുടെ ദൃശ്യങ്ങളാണ് നിരവധി പേരുടെ ശ്രദ്ധ പിടിച്ചുപറ്റിയത്. ജോലിക്കിടെ കുഞ്ഞിനെ ഒപ്പം ചേർത്തുനിർത്തി ഉപഭോക്താക്കൾക്ക് സേവനം നൽകുന്ന അമ്മയുടെ കാഴ്ചയാണ് സോഷ്യൽ മീഡിയയിൽ ചർച്ചയാകുന്നത്. യാത്രാവീഡിയോകൾ പങ്കുവയ്ക്കുന്ന ഇൻസ്റ്റഗ്രാം കണ്ടന്റ് ക്രിയേറ്ററായ പ്രിയങ്കയാണ് വീഡിയോ പങ്കുവെച്ചത്.
വൈറലായ ദൃശ്യങ്ങളിൽ വാഹനങ്ങൾക്ക് സമീപം നിന്ന് ഇന്ധനം നിറയ്ക്കുന്ന യുവതിയെ കാണാം. കുഞ്ഞിനെ പുറത്ത് തുണികൊണ്ട് കെട്ടിയ നിലയിലാണ് അമ്മ ജോലി ചെയ്യുന്നത്. വാഹനങ്ങൾ പെട്രോൾ പമ്പിലേക്ക് എത്തുകയും പോകുകയും ചെയ്യുന്നതിനിടെ, അമ്മ തന്റെ ജോലികൾ തുടർന്നുകൊണ്ടിരിക്കുന്നു. അതേസമയം, പുറത്ത് കെട്ടിയിരിക്കുന്ന കുഞ്ഞ് ചുറ്റുമുള്ള കാഴ്ചകൾ കൗതുകത്തോടെ നിരീക്ഷിക്കുന്നതും വീഡിയോയിലുണ്ട്. ജോലിയും കുഞ്ഞിനെ പരിചരിക്കലും ഒരേസമയം മുന്നോട്ടുകൊണ്ടുപോകുന്ന അമ്മയുടെ ദൃശ്യങ്ങൾ നിരവധി പേരെ ആകർഷിച്ചു.
'ശുദ്ധമായ ഹൃദയമുള്ള മനുഷ്യർ' എന്ന കുറിപ്പോടെയാണ് പ്രിയങ്ക വീഡിയോ പങ്കുവെച്ചത്. ദൃശ്യങ്ങൾ വൈറലായതോടെ യുവതിയുടെ അധ്വാനത്തെയും ഉത്തരവാദിത്വബോധത്തെയും അഭിനന്ദിച്ച് നിരവധി പേർ രംഗത്തെത്തി. കുഞ്ഞിനെ ഒപ്പം നിർത്തി ജോലി ചെയ്യാൻ അനുവദിച്ച പെട്രോൾ പമ്പ് ഉടമയെയും ചിലർ പ്രശംസിച്ചു. ജോലി ചെയ്യുന്ന അമ്മമാർ നേരിടുന്ന വെല്ലുവിളികളിലേക്കും ഈ ദൃശ്യങ്ങൾ ശ്രദ്ധ ക്ഷണിക്കുന്നതായി പലരും അഭിപ്രായപ്പെട്ടു.
എന്നാൽ, സമൂഹമാധ്യമങ്ങളിൽ അഭിനന്ദനങ്ങൾ അറിയിക്കുന്നതിൽ മാത്രം ഒതുങ്ങരുതെന്നും യുവതിക്ക് പ്രായോഗികമായ സഹായം നൽകാൻ ശ്രമിക്കണമെന്നും ചിലർ ചൂണ്ടിക്കാട്ടി. വീഡിയോ പകർത്തുന്നവർക്ക് കഴിയുമെങ്കിൽ സാമ്പത്തിക സഹായമോ മറ്റ് പിന്തുണയോ നൽകാമെന്നും അഭിപ്രായങ്ങളുയർന്നു. വീഡിയോയ്ക്ക് ലഭിച്ച വലിയ പ്രതികരണത്തിന് പിന്നാലെ പ്രിയങ്ക യുവതിയുമായി വീഡിയോ കോളിലൂടെ ബന്ധപ്പെടുകയും ആളുകൾ അറിയിച്ച സ്നേഹവും സഹായവാഗ്ദാനങ്ങളും പങ്കുവയ്ക്കുകയും ചെയ്തു. ഒരു സാധാരണ യാത്രയ്ക്കിടെ പകർത്തിയ ദൃശ്യം ലക്ഷക്കണക്കിന് ആളുകളിലേക്കെത്തിയതോടെ, ജോലി ചെയ്യുന്ന അമ്മമാരുടെ ജീവിതസാഹചര്യങ്ങളും സമൂഹമാധ്യമങ്ങളിൽ ചർച്ചയാവുകയാണ്.
Comments