ഗിരീഷ് എ.ഡി സംവിധാനം ചെയ്ത് നിവിന്‍ പോളിയും മമിതാ ബൈജുവും കേന്ദ്ര കഥാപാത്രങ്ങളായി എത്തിയ ബെത്ലേഹേം കുടുംബ യൂണിറ്റ് മുന്നൂറു കോടിയും കടന്ന് വിജയത്തേരിലാണ് കുതിച്ചത്. തിയേറ്ററില്‍ ഗംഭീര വിജയം നേടിയ ശേഷം ഒടിടിയില്‍ എത്തിയപ്പോള്‍ ബി.കെ.യു വിന് നിറഞ്ഞ കൈയടിയും പ്രശംസയുമാണ് കിട്ടിക്കൊണ്ടിരിക്കുന്നത്. ഒരു സീനില്‍ മാത്രം വന്നു പോകുന്ന കഥാപാത്രങ്ങള്‍ പോലും തിളങ്ങി നിന്ന സിനിമയാണിത്. അപ്പോള്‍പ്പിന്നെ സിനിമയിലുടനീളം നിവിനൊപ്പമുണ്ടായിരുന്ന സുരേഷ് കൃഷ്ണയുടെ കഥാപാത്രത്തെപ്പറ്റി പ്രത്യേകിച്ച് പറയേണ്ട കാര്യമുണ്ടോ.
വില്ലൻ വേഷങ്ങളിൽ നിന്ന് മാറി തികച്ചും വ്യത്യസ്തമായി നര്‍മ്മരസമുള്ള ബൈജു സേവ്യര്‍ എന്ന കഥാപാത്രമായിട്ടാണ് സുരേഷ് കൃഷ്ണ സിനിമയില്‍ നിറഞ്ഞു നിന്നത്. താരത്തിന്റെ കൗണ്ടറടികളുടെ ഒരു ഘോഷയാത്ര തന്നെ സിനിമയിലുടനീളണ്ട്. സുരേഷ് കൃഷ്ണയുടെ ഡയലോഗുകളിൽ പലതുമിന്ന് സോഷ്യൽ മീഡിയയിൽ ട്രെൻഡിങ് ആണ്.
ഇപ്പോഴിതാ സുരേഷ് കൃഷ്ണയെപ്പറ്റി നിവിന്‍ പോളി പറഞ്ഞ വാക്കുകളാണ് സോഷ്യല്‍ മീഡിയ ആരാധകര്‍ ഏറ്റെടുക്കുന്നത്.
‘‘സുരേഷ് കൃഷ്ണ അടിപൊളി നമ്പറാണ്. ഞാൻ കഴിഞ്ഞ ഇത്രയും നാളിനിടയില്‍ കണ്ടുപിടിച്ച ‘ജെം’ എന്ന് പറയുന്ന മച്ചാനാണ്. നമ്മൾ സിനിമയിലെ കുടിലൻ വില്ലനായിട്ടാണ് കൂടുതല്‍ സിനിമകളില്‍ കണ്ടിട്ടുള്ളത്. ഞാന്‍ ഇതിനു മുമ്പ് പുള്ളിക്കൊപ്പം സിനിമകള്‍ ചെയ്തിട്ടില്ല, ആദ്യമായിട്ടാണ് ഒപ്പം വര്‍ക്ക് ചെയ്യുന്നത്. ഇതുവരെല്ലാം വില്ലനായിട്ട് കണ്ടിട്ട്, അല്ലെങ്കില്‍ ഒരു നെഗറ്റീവ് ഷെയ്ഡ് അതാണല്ലോ പുള്ളിയെപ്പറ്റി നമ്മുടെ മനസ്സിലുള്ളത്.
എത്രയോ വര്‍ഷങ്ങളായി സിനിമകളിൽ ഉള്ള ആളാണ്. പക്ഷേ ഇതില് വന്നപ്പോൾ പുള്ളി വേറൊരാള്‍ ആയി. ഈ സിനിമയില്‍ വന്നപ്പോള്‍ പുള്ളി കോമഡിയുടെ ഉസ്താദാണെന്ന് മനസിലായി. പുള്ളിയുടെ കൗണ്ടർ കേട്ടിട്ട്, ഗിരീഷൊക്കെ ചിരിച്ച് മറിഞ്ഞിട്ട്, ‘ചേട്ടാ, ഇനി കൗണ്ടര്‍ അടിക്കരുത്, ഇനി ചിരിക്കാന്‍ പറ്റില്ല’ എന്നൊക്കെ പറയുന്ന അവസ്ഥയായിരുന്നു.
സീരിയസ് ഫേസ് ആണ് പക്ഷേ കൗണ്ടറുകൾ, കോമഡികൾ ഇങ്ങനെ വന്നുകൊണ്ടിരിക്കും. പിന്നെ എന്താ പറയാ ഭയങ്കര ഓർഗാനിക് ആയിട്ടുള്ള നല്ലൊരു ഹ്യൂമൻ ബീയിങ് ആണ് സുരേഷ് കൃഷ്ണ. വളരെ പെട്ടെന്ന് പുള്ളിയുമായി അങ്ങ് കണക്ടായി. നല്ല മച്ചനാണല്ലോ എന്ന് തോന്നി. നമ്മുടെ മനസ്സിൽ വില്ലനും പരിപാടിയും ആയിട്ട് നിൽക്കുന്ന ഒരാള് നല്ലൊരു ഹ്യൂമൻ ബീയിങ് ആണ് എന്ന് തോന്നിയതിലാണ് ആ കണക്ട് വന്നത്. ഇനിയും പുള്ളിയോട് കൂടെ വർക്ക് ചെയ്യണം എന്നുള്ളത് ഭയങ്കര ഒരു ആഗ്രഹമായിട്ടുണ്ട്. അടുത്തുള്ളപ്പോൾ ഒരു ഗുഡ് എനർജിയാണ്. നമ്മള്‍ ഒരാളിന്റെ കൂടെ വര്‍ക്ക് ചെയ്യുമ്പോള്‍ ഒരു ഗീവ് ആന്‍ഡ് ടേക്ക് എനര്‍ജിയില്‍ കിട്ടുന്ന ഒരു വൈബ് ഉണ്ട്. അതു കറക്ടായിട്ട് വരുമ്പോള്‍ ആ കോമ്പിനേഷന്‍ അടിപൊളിയാകും. റെസിസ്റ്റന്‍സ് വന്നാല്‍ അത് വര്‍ക്കാകില്ല. റൈറ്റ് സിങ്ക് കിട്ടുന്നവരുടെ കൂടെ പിന്നെയും വര്‍ക്ക് ചെയ്യാന്‍ തോന്നും...’’ എന്നാണ് നിവിന്‍ പോളി പറയുന്നത്.
Comments