പൂനെയിൽ ഊബർ വഴി ബുക്ക് ചെയ്ത ഓട്ടോറിക്ഷയുടെ നിരക്കിനെച്ചൊല്ലി ഡ്രൈവറും യാത്രക്കാരും തമ്മിൽ രൂക്ഷമായ വാക്കേറ്റം. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ ചർച്ചയായിരിക്കുകയാണ്. ആപ്പിൽ കാണിച്ച നിരക്കിന് പകരം മീറ്റർ നിരക്കിൽ പണം നൽകണമെന്ന് ഡ്രൈവർ ആവശ്യപ്പെട്ടതാണ് തർക്കത്തിന് കാരണമായത്.
ഹഡപ്സർ റെയിൽവേ സ്റ്റേഷനിലേക്ക് പോകാനായിരുന്നു യാത്രക്കാർ ഓട്ടോ ബുക്ക് ചെയ്തത്. ഡ്രൈവർക്കായി ഏകദേശം 15 മിനിറ്റ് കാത്തിരുന്നെന്നും ആശുപത്രിയിലേക്ക് അടിയന്തരമായി എത്തേണ്ട സാഹചര്യമുണ്ടായിരുന്നെന്നും യാത്രക്കാർ പറഞ്ഞു. എന്നാൽ എത്തിയ ഡ്രൈവർ ആപ്പിൽ കാണിച്ച തുകയ്ക്ക് പകരം മീറ്റർ പ്രകാരമുള്ള നിരക്ക് നൽകണമെന്ന് ആവശ്യപ്പെട്ടതോടെ തർക്കം ആരംഭിക്കുകയായിരുന്നു.
യാത്രയ്ക്ക് തയ്യാറല്ലെങ്കിൽ പിന്നെ എന്തിനാണ് ബുക്കിങ് സ്വീകരിച്ചതെന്ന് യാത്രക്കാർ ഡ്രൈവറോട് ചോദിക്കുന്നതും ദൃശ്യങ്ങളിൽ കേൾക്കാം. ആപ്പിൽ കാണിച്ച തുക കുറവാണെന്നായിരുന്നു ഡ്രൈവറുടെ വിശദീകരണമെന്നാണ് റിപ്പോർട്ട്. ബുക്കിങ് സ്വീകരിച്ചശേഷം മറ്റൊരു നിരക്ക് ആവശ്യപ്പെട്ട് തങ്ങളുടെ സമയം പാഴാക്കിയെന്ന് യാത്രക്കാർ ആരോപിച്ചു. ആപ്പിലെ നിരക്കിൽ യാത്ര ചെയ്യാൻ തയ്യാറല്ലെങ്കിൽ ഇത്തരം ബുക്കിങ്ങുകൾ സ്വീകരിക്കരുതെന്നും അവർ പറഞ്ഞു.
പൂനെയിൽ ആപ്പിലൂടെ ഓട്ടോ ബുക്ക് ചെയ്തിട്ടും മീറ്റർ നിരക്ക് ആവശ്യപ്പെടുന്നതും യാത്രക്കാരോട് ബുക്കിങ് റദ്ദാക്കാൻ പറയുന്നതും സംബന്ധിച്ച് നേരത്തെയും പരാതികൾ ഉയർന്നിട്ടുണ്ട്. ഊബർ, ഒല, റാപിഡോ തുടങ്ങിയ സേവനങ്ങൾ ഉപയോഗിക്കുന്ന യാത്രക്കാരും ഡ്രൈവർമാരും തമ്മിലുള്ള നിരക്കുതർക്കങ്ങൾ വീണ്ടും ചർച്ചയാകുന്നതിനിടെയാണ് പുതിയ ദൃശ്യങ്ങൾ പുറത്തുവന്നത്. എന്നാൽ സംഭവത്തിന്റെ കൃത്യമായ തീയതിയും തർക്കത്തിൽ ഉൾപ്പെട്ടവരുടെ വിവരങ്ങളും സ്വതന്ത്രമായി സ്ഥിരീകരിക്കാനായിട്ടില്ല.
Comments