വളർത്തുനായയെ പിന്തുടർന്ന് വീട്ടിനുള്ളിൽ കയറിയ പുലിയെ മുറിയിൽ പൂട്ടി അതിസാഹസികമായി നേരിട്ട ഉത്തരാഖണ്ഡിലെ വീട്ടമ്മയുടെ ധൈര്യമാണ് ഇപ്പോൾ സമൂഹമാധ്യമങ്ങളിൽ ചർച്ചയാകുന്നത്. ശാരീരിക പരിമിതികളുള്ള ജയന്തി ദേവിയാണ് പ്രതിസന്ധി ഘട്ടത്തിൽ മനസ്സാന്നിധ്യം കൈവിടാതെ പുലിയെ മുറിക്കുള്ളിൽ പൂട്ടിയത്. നൈനിറ്റാൾ ജില്ലയിലെ ബേതാൽഘട്ട് മേഖലയിലെ തല്ലി സേഥി ഗ്രാമത്തിലാണ് സംഭവം. വീട്ടിൽ തനിച്ചായിരുന്നപ്പോഴാണ് അപ്രതീക്ഷിതമായി പുലി അകത്തുകയറിയത്. അപകടകരമായ സാഹചര്യം ബുദ്ധിപൂർവം കൈകാര്യം ചെയ്ത ജയന്തി ദേവിയെ അഭിനന്ദിച്ച് നിരവധി പേരാണ് രംഗത്തെത്തിയത്.
കഴിഞ്ഞ ഞായറാഴ്ച രാത്രി രണ്ടിനും മൂന്നിനും ഇടയിലായിരുന്നു സംഭവം. വളർത്തുനായയെ പിന്തുടർന്നെത്തിയ പുലി നായയുടെ പിന്നാലെ വീടിനുള്ളിലേക്ക് കടക്കുകയായിരുന്നു. പുലിയിൽനിന്ന് രക്ഷപ്പെടാനുള്ള ശ്രമത്തിനിടെയാണ് നായ വീട്ടിലേക്ക് ഓടിക്കയറിയത്. പിന്നാലെ എത്തിയ പുലി വീടിനോട് ചേർന്നുള്ള മുറിയിൽ കയറി. ഈ സമയത്താണ് വീട്ടിലുണ്ടായിരുന്ന ജയന്തി ദേവി മുറിക്കുള്ളിൽ പുലിയെ കണ്ടത്. അപ്രതീക്ഷിതമായി വന്യമൃഗത്തെ കണ്ടിട്ടും പരിഭ്രാന്തയായി അതിന്റെ അടുത്തേക്ക് പോകാനോ നേരിടാനോ അവർ ശ്രമിച്ചില്ല.
പകരം, പുലി കയറിയ മുറിയുടെ വാതിൽ അടച്ച് അതിനെ അകത്തുതന്നെ പൂട്ടുകയായിരുന്നു ജയന്തി ദേവി ചെയ്തത്. ഇതോടെ പുലിക്ക് വീടിന്റെ മറ്റു ഭാഗങ്ങളിലേക്ക് കടക്കാനായില്ല. തുടർന്ന് അവർ ബഹളംവെച്ച് അയൽവാസികളെ വിവരമറിയിച്ചു. ഓടിയെത്തിയ നാട്ടുകാർ വനംവകുപ്പിനെ വിവരം അറിയിച്ചു. ജയന്തി ദേവിയുടെ സമയോചിതമായ ഇടപെടൽ പുലിയെ ഒരു മുറിക്കുള്ളിൽത്തന്നെ ഒതുക്കിനിർത്താനും വനംവകുപ്പ് ഉദ്യോഗസ്ഥർ എത്തുന്നതുവരെ അപകടസാധ്യത കുറയ്ക്കാനും സഹായിച്ചു.
വിവരമറിഞ്ഞ് ഫോറസ്റ്റ് റേഞ്ചർ മനോജ് ഭഗത്തിന്റെ നേതൃത്വത്തിലുള്ള വനംവകുപ്പ് സംഘം സ്ഥലത്തെത്തി. പുലിയെ മയക്കുവെടിവെച്ച് സുരക്ഷിതമായി പിടികൂടിയ ശേഷം രക്ഷാകേന്ദ്രത്തിലേക്ക് മാറ്റി. സംഭവത്തോടെ പ്രദേശവാസികൾക്ക് ആശ്വാസമായെങ്കിലും ജനവാസമേഖലകൾക്ക് സമീപം പുലികളുടെ സാന്നിധ്യം വർധിക്കുന്നതിൽ നാട്ടുകാർ ആശങ്ക പ്രകടിപ്പിച്ചു. ബാസ്ഗാവ്, സൗംഗാവ്, സിമൽഖ തുടങ്ങിയ സമീപഗ്രാമങ്ങളിലും വളർത്തുമൃഗങ്ങൾക്കു നേരെ പുലിയുടെ ആക്രമണങ്ങൾ ഉണ്ടായിട്ടുണ്ടെന്നാണ് റിപ്പോർട്ടുകൾ. അതേസമയം, അപകടകരമായ സാഹചര്യത്തിൽ ജയന്തി ദേവി കാട്ടിയ ധൈര്യവും മനസ്സാന്നിധ്യവുമാണ് സമൂഹമാധ്യമങ്ങളിൽ വലിയ അഭിനന്ദനങ്ങൾക്ക് ഇടയാക്കുന്നത്.
Comments