അമ്പലപ്പുഴ: വി.എസ്. അച്യുതാനന്ദനില്ലാത്ത ആദ്യ നിയമസഭ തെരഞ്ഞെടുപ്പില് പതിവ് തെറ്റിക്കാതെ അദ്ദേഹത്തിന്റെ കുടുംബം സമ്മതിദാന അവകാശം രേഖപ്പെടുത്തി മടങ്ങി. വി.എസിന്റെ ഭാര്യ വസുമതി, മകന് അരുണ്കുമാര്, മരുമകള് രജനി, കൊച്ചുമക്കളായ അര്ജുന്, അരവിന്ദന് എന്നിവരാണ് വോട്ട് ചെയ്യാനെത്തിയത്. വി.എസ.് പഠിച്ച പറവൂര് ഗവ.ഹയര് സെക്കന്ഡറി സ്കൂളിലെ പോളിങ് സ്റ്റേഷനില് 90-ാം നമ്പര് ബൂത്തില് രാവിലെ 9.30 നാണ് വി.എസിന്റെ കുടുംബം വോട്ട് ചെയ്തത്. ഈ സ്കൂളിന് വി.എസ്. അച്യുതാനന്ദന് സ്മാരക ഗവ. ഹയര്സെക്കന്ഡറി സ്കൂള് എന്ന് പേര് മാറ്റിയിരുന്നു. മുന്മന്ത്രിയും ഇത്തവണ യു.ഡി.എഫ്. പിന്തുണയോടെ സ്വതന്ത്ര സ്ഥാനാര്ഥിയായി മത്സരിക്കുകയും ചെയ്ത ജി.സുധാകരന്റെ കത്തിന്മോലാണ് വിദ്യാഭ്യാസ വകുപ്പ് സ്കൂളിന് വി.എസിന്റെ പേര് നല്കിയതെന്ന കൗതുകവുമുണ്ട്. വി.എസിന്റെ കൊച്ചുമകന് അരവിന്ദനിത് കന്നി വോട്ടായിരുന്നു.
വീട്ടില്നിന്നു കാറില് പോളിങ് സ്റ്റേഷനില് കുടുംബം എത്തിയപ്പോള് വോട്ടര്മാരുടെ നീണ്ടനിരയായിരുന്നു. നിരയില് വി.എസിന്റെ കുടുംബവും ഒപ്പം ചേര്ന്നെങ്കിലും മറ്റുള്ളവര് നിര്ബന്ധിച്ചതോടെ വേഗത്തില് വോട്ട് ചെയ്ത് മടങ്ങുകയായിരുന്നു. വി.എസിന്റെ കുടുംബം എത്തുന്നതും കാത്ത് പോളിങ് സ്റ്റേഷനുമുമ്പില് എല്.ഡി.എഫ്. സ്ഥാനാര്ഥി എച്ച്. സലാം, സി.പി.ഐ. അമ്പലപ്പുഴ നിയോജക മണ്ഡലം സെക്രട്ടറി ഇ.കെ. ജയന് എന്നിവരും ഉണ്ടായിരുന്നു. വൈകിട്ടോടെ കുടുംബം തിരുവനന്തപുരത്തെ വസതിയിലേക്കു മടങ്ങി.
