ന്യൂഡൽഹി: വനിതാ സംവരണ ബിൽ പാസാക്കാൻ കഴിയാത്തതിൽ രാജ്യത്തെ സ്ത്രീകളോട് മാപ്പ് ചോദിച്ചും പ്രതിപക്ഷ പാർട്ടികളെ രൂക്ഷമായി വിമർശിച്ചും പ്രധാനമന്ത്രി നരേന്ദ്ര മോദി രംഗത്തെത്തി. രാജ്യത്തെ അഭിസംബോധന ചെയ്ത് സംസാരിക്കവെയാണ് അദ്ദേഹം തന്റെ അതൃപ്തി പരസ്യമാക്കിയത്. സ്ത്രീകളുടെ മുന്നേറ്റത്തിനായുള്ള ശ്രമങ്ങൾ പലതവണ നടത്തിയിട്ടും അത് പൂർണ്ണതയിലെത്തിക്കാൻ കഴിയാത്തതിൽ തനിക്ക് അതിയായ വിഷമമുണ്ടെന്നും, എല്ലാ അമ്മമാരോടും സഹോദരിമാരോടും താൻ ക്ഷമ ചോദിക്കുന്നുവെന്നും പറഞ്ഞാണ് പ്രധാനമന്ത്രി പ്രസംഗം ആരംഭിച്ചത്. രാജ്യത്തിന്റെ താൽപ്പര്യത്തേക്കാൾ സ്വന്തം രാഷ്ട്രീയ ലാഭത്തിന് മുൻഗണന നൽകുന്നവരാണ് ഈ ബിൽ തടഞ്ഞതെന്നും അദ്ദേഹം കുറ്റപ്പെടുത്തി.
കോൺഗ്രസ്, ഡിഎംകെ, തൃണമൂൽ കോൺഗ്രസ്, സമാജ്വാദി പാർട്ടി തുടങ്ങിയ കക്ഷികളുടെ സ്വാർത്ഥ രാഷ്ട്രീയമാണ് സ്ത്രീകളുടെ അവകാശങ്ങൾ നിഷേധിക്കപ്പെടാൻ കാരണമായതെന്ന് മോദി പറഞ്ഞു. പാർലമെന്റിൽ ബിൽ പരാജയപ്പെട്ടപ്പോൾ പ്രതിപക്ഷ പാർട്ടികൾ അത് ആഘോഷിച്ചത് നിർഭാഗ്യകരമാണ്. ആരുടെയും അവകാശങ്ങൾ കവർന്നെടുക്കാനല്ല, മറിച്ച് സ്ത്രീശക്തിക്ക് കൂടുതൽ കരുത്ത് പകരാനാണ് സർക്കാർ ലക്ഷ്യമിട്ടത്. എന്നാൽ ഭരണഘടനാ വിരുദ്ധമായ നിലപാടുകളിലൂടെ പ്രതിപക്ഷം ഈ നീക്കത്തെ മുളയിലേ നുള്ളിക്കളയുകയാണ് ചെയ്തതെന്ന് അദ്ദേഹം ആരോപിച്ചു. 21-ാം നൂറ്റാണ്ടിലെ സ്ത്രീകൾ കാര്യങ്ങൾ കൃത്യമായി നിരീക്ഷിക്കുന്നുണ്ടെന്നും, സ്ത്രീ വിരുദ്ധ നിലപാട് സ്വീകരിച്ചവർക്ക് കാലം മാപ്പുനൽകില്ലെന്നും അദ്ദേഹം ഓർമ്മിപ്പിച്ചു.
പതിറ്റാണ്ടുകളായി തുടരുന്ന തെറ്റുകൾ തിരുത്താൻ ലഭിച്ച വലിയൊരു അവസരമാണ് കോൺഗ്രസ് പാഴാക്കിയതെന്ന് പ്രധാനമന്ത്രി വിമർശിച്ചു. സ്വന്തമായി അസ്തിത്വം നഷ്ടപ്പെട്ട കോൺഗ്രസ് ഇപ്പോൾ പ്രാദേശിക പാർട്ടികളെ ആശ്രയിച്ചാണ് നിലനിൽക്കുന്നത്. പ്രാദേശിക പാർട്ടികളെ പോലും തെറ്റായ വഴിയിലേക്ക് നയിക്കുന്ന രാഷ്ട്രീയ ഗൂഢാലോചനയാണ് കോൺഗ്രസ് നടത്തുന്നതെന്നും അദ്ദേഹം പറഞ്ഞു. സാങ്കേതികമായ കാരണങ്ങൾ നിരത്തി സ്ത്രീകളുടെ അവകാശങ്ങൾ തടഞ്ഞുവെക്കുന്ന രീതിയാണ് വർഷങ്ങളായി പ്രതിപക്ഷം തുടരുന്നത്. അധികാരത്തിന് പുറത്തുള്ള സ്ത്രീകൾ രാഷ്ട്രീയത്തിന്റെ മുൻനിരയിലേക്ക് വരുന്നത് തങ്ങളുടെ കുടുംബവാഴ്ചയ്ക്ക് ഭീഷണിയാകുമെന്ന് ഭയപ്പെടുന്നവരാണ് ഇതിനെ എതിർക്കുന്നതെന്ന് അദ്ദേഹം തുറന്നടിച്ചു.
തദ്ദേശ സ്ഥാപനങ്ങളിൽ തങ്ങളുടെ കരുത്ത് തെളിയിച്ച ലക്ഷക്കണക്കിന് സ്ത്രീകൾ ഇപ്പോൾ നിയമസഭകളിലും ലോക്സഭയിലും എത്താൻ ആഗ്രഹിക്കുന്നുണ്ട്. മണ്ഡല പുനർനിർണ്ണയത്തിന് ശേഷം സ്ത്രീകൾക്ക് കൂടുതൽ പ്രാതിനിധ്യം ലഭിക്കുമെന്ന ഭയമാണ് പ്രതിപക്ഷത്തെ വേട്ടയാടുന്നത്. നാരീശക്തി വന്ദൻ നിയമം രാജ്യത്തെ എല്ലാ സംസ്ഥാനങ്ങളെയും ഒരുപോലെ ശക്തിപ്പെടുത്താനാണ് ലക്ഷ്യമിട്ടത്. എന്നാൽ ഇതിനെതിരെ നുണപ്രചാരണങ്ങൾ നടത്തിയും ജനങ്ങളെ വിഭജിച്ചും രാഷ്ട്രീയ നേട്ടം കൊയ്യാനാണ് കോൺഗ്രസും സഖ്യകക്ഷികളും ശ്രമിക്കുന്നത്. രാജ്യത്തെ ഓരോ സ്ത്രീയുടെയും ശബ്ദം പാർലമെന്റിൽ എത്തിക്കാനുള്ള ആത്മാർത്ഥമായ ശ്രമമാണ് ഇപ്പോൾ തടയപ്പെട്ടിരിക്കുന്നതെന്നും പ്രധാനമന്ത്രി വ്യക്തമാക്കി.
